GBU-57 মাৰাত্মক অস্ত্ৰৰে আক্ৰমণ
শেহতীয়াকৈ আমেৰিকা আৰু ইৰাণৰ মাজত উত্তেজনা শিখৰত উপনীত হৈছে। ইৰাণৰ তিনিটা প্ৰধান পাৰমাণৱিক স্থান- ফৰ্ডো, নাটানজ আৰু ইছফাহানত আমেৰিকাই নিখুঁত আৰু সফল বিমান আক্ৰমণ চলাইছে বুলি দাবী কৰিছে আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পে।
অৱশ্যে ইৰাণে এই দাবীসমূহ নাকচ কৰি আক্ৰমণৰ পূৰ্বে এই ঘাটিসমূহ খালী কৰা বুলি উল্লেখ কৰিছে।
এই সমগ্ৰ ঘটনাটোত আটাইতকৈ বেছি চৰ্চা হোৱা অস্ত্ৰটো হ’ল GBU-57, যাক ‘মাছিভ অৰ্ডানেন্স পেনেট্ৰেটৰ’ বুলি কোৱা হয়।
এইটো আমেৰিকাৰ অন্যতম মাৰাত্মক আৰু গধুৰ বোমা যিটো বিশেষভাৱে মাটিৰ তলত থকা লক্ষ্য ধ্বংস কৰিবলৈ ডিজাইন কৰা হৈছে।
মিছৌৰীৰ হোৱাইটমেন এয়াৰ বেছৰ পৰা উৰা মৰা B-2 ষ্টেলথ বোমাৰু বিমানৰ পৰা ইয়াক উৎক্ষেপণ কৰা হয়।
GBU-57 ক বিশেষভাৱে মাটিৰ তলৰ বাংকাৰ আৰু সুৰংগ ধ্বংস কৰিবলৈ ডিজাইন কৰা হৈছে। ইয়াৰ ওজন প্ৰায় ১৩,৬০০ কিলোগ্ৰাম আৰু ই মাটিৰ পৰা ৬১ মিটাৰ তলত সোমাই বিস্ফোৰণ ঘটাব পাৰে।
ইয়াৰ পৃষ্ঠভাগ ইমানেই মজবুত যে অত্যন্ত জোৰেৰে মাটিত প্ৰৱেশ কৰিলেও ই ভাঙি নাযায়।
এই বোমাটো নিক্ষেপ কৰাৰ প্ৰক্ৰিয়াটো অত্যন্ত নিখুঁত। উপগ্ৰহ নেভিগেচন ব্যৱহাৰ কৰি লক্ষ্য নিৰ্ণয় কৰা হয় আৰু গভীৰতাত উপনীত হ’বলৈ উচ্চতাৰ পৰা বোমাটো নিক্ষেপ কৰা হয়।বোমাটোত থকা ডিলে ফিউজ মেকানিজমে নিশ্চিত কৰে যে বিস্ফোৰণ কেৱল নিৰ্ধাৰিত গভীৰতাতহে সংঘটিত হয়। প্ৰায়ে আক্ৰমণত এটাতকৈ অধিক বোমা নিক্ষেপ কৰা হয়, প্ৰথমে বাট মুকলি কৰে আৰু বাকীবোৰে সম্পূৰ্ণ ধ্বংস কৰে।
ৰয়টাৰৰ তথ্য অনুসৰি এই আক্ৰমণত B-2 ষ্টেল্থ বোমাৰু বিমান ব্যৱহাৰ কৰা বুলি আমেৰিকাৰ বিষয়াসকলে নিশ্চিত কৰিছে।
ইয়াৰ পূৰ্বে আমেৰিকাই এই বোমাৰু বিমানখন গুৱামলৈ প্ৰেৰণ কৰা বুলি খবৰ ওলাইছিল। ইৰাণৰ ফৰ্ডোৰ দৰে পাহাৰীয়া ভূগৰ্ভস্থ স্থানত GBU-57 ৰ দৰে অস্ত্ৰ ব্যৱহাৰ কৰা বুলি ধাৰণা কৰা হৈছে।
ড’নাল্ড ট্ৰাম্পে তেওঁৰ ছ’চিয়েল মিডিয়া প্লেটফৰ্ম ‘ট্ৰুথ ছ’চিয়েল’ত দাবী কৰিছিল যে সকলো মিছন সফল হৈছিল আৰু তেওঁৰ সকলো বিমান নিৰাপদে উভতি আহিছিল।তেওঁ আমেৰিকান বাহিনীক অভিনন্দন জনাই কয়, “এতিয়া শান্তিৰ সময়।”
ইৰাণে কয় যে আমেৰিকাৰ আক্ৰমণৰ বাবে কোনো ডাঙৰ ক্ষতি হোৱা নাই কাৰণ ইতিমধ্যে তাৰ পৰা সকলো স্পৰ্শকাতৰ পাৰমাণৱিক সামগ্ৰী আঁতৰাই পেলোৱা হৈছে।যদিও ফৰ্ডোৰ দৰে অঞ্চলত বোমা পৰিল, তথাপিও ইয়াৰ কোনো ডাঙৰ ক্ষতি নহ’ল।
লগতে পঢ়ক: ইজৰাইলৰ বিৰুদ্ধে ক্ষুদ্ধ ইৰাণৰ বৃহৎ প্ৰত্যুত্তৰ; কেইবাখনো চহৰত জৰুৰী অৱস্থা
