যোৱা কেইবছৰমানৰ পৰা ভাৰতে উপসাগৰীয় দেশসমূহৰ সৈতে সম্পৰ্ক আৰু অধিক সুদৃঢ় কৰি তুলিছে । যাৰ প্ৰভাৱ এতিয়া ভাৰতৰ অৰ্থনীতিত দেখা গৈছে । উপসাগৰীয় দেশসমূহৰ সৈতে ভাৰতৰ সুদৃঢ় সম্পৰ্কৰ বাবে বিনিয়োগ বৃদ্ধি পাইছে । এই দেশসমূহৰ পৰা ভাৰতলৈ অহা বিনিয়োগে দেখুৱাইছে যে ভাৰতৰ প্ৰতি সেই দেশসমূহৰ আস্থা বাঢ়িছে । বাণিজ্য আৰু উদ্যোগ মন্ত্ৰালয়ে প্ৰকাশ কৰা প্ৰত্যক্ষ বিদেশী বিনিয়োগৰ তথ্য অনুসৰি বিগত ১০ বছৰত উপসাগৰীয় দেশসমূহৰ পৰা বিনিয়োগ ৮ গুণ বৃদ্ধি পাইছে ।
উপসাগৰীয় দেশসমূহৰ পৰা বৃদ্ধি পাইছে বিনিয়োগ-
বাণিজ্য আৰু উদ্যোগ মন্ত্ৰালয়ে প্ৰকাশ কৰা শেহতীয়া তথ্য অনুসৰি উপসাগৰীয় সহযোগিতা পৰিষদৰ দেশসমূহৰ পৰা ভাৰতলৈ প্ৰত্যক্ষ বিদেশী বিনিয়োগৰ প্ৰবাহ ২০১৩ চনৰ ছেপ্টেম্বৰৰ পৰা ২০২৪ চনৰ ছেপ্টেম্বৰৰ ভিতৰত ২৪.৫৪ বিলিয়ন ডলাৰৰ ওপৰত বৃদ্ধি পাইছে । যিটো ২০০০ চনৰ এপ্ৰিলৰ পৰা ২০১৩ চনৰ ছেপ্টেম্বৰৰ ভিতৰত ৩.০৪৬ বিলিয়ন ডলাৰ আছিল ডলাৰৰ প্ৰত্যক্ষ বিদেশী বিনিয়োগৰ পৰিসংখ্যাৰ তুলনাত ৮গুণ বৃদ্ধি পাইছে ।
কোনখন দেশৰ পৰা কিমান এফ ডি আই আহিছে-
তথ্য অনুসৰি জি চি চি দেশৰ পৰা ভাৰতলৈ ৮৯ শতাংশ প্ৰত্যক্ষ বিদেশী বিনিয়োগ বিগত ১০ বছৰত আহিছে, যিয়ে ভাৰত আৰু উপসাগৰীয় অঞ্চলৰ মাজত ক্ৰমবৰ্ধমান অৰ্থনৈতিক সম্পৰ্কৰ প্ৰতিফলন ঘটায় । বৰ্তমান কুৱেইটে উপসাগৰীয় সহযোগিতা পৰিষদৰ অধ্যক্ষতা কৰি আছে, গতিকে প্ৰধানমন্ত্ৰী নৰেন্দ্ৰ মোদীৰ আমীৰাট ভ্ৰমণে বাহৰেইন, ওমান, কাটাৰ, চৌদি আৰব, ইউ এ ই আৰু কুৱেইটক লৈ গঠিত এই প্ৰভাৱশালী গোটৰ সৈতে ভাৰতৰ সংযোগ বৃদ্ধি কৰাৰ সম্ভাৱনা আছে ।
শনিবাৰে বিয়লি কুৱেইটত উপস্থিত হৈ ৪৩ বছৰৰ ভিতৰত উপসাগৰীয় দেশ ভ্ৰমণ কৰা প্ৰথমজন ভাৰতীয় প্ৰধানমন্ত্ৰী হিচাপে পৰিগণিত হয় প্ৰধানমন্ত্ৰী মোদী । তেওঁ কয় যে কুৱেইট বিনিয়োগ কৰ্তৃপক্ষই ভাৰতত ১০ বিলিয়ন ডলাৰতকৈ অধিক বিনিয়োগ কৰিছে, যাৰ ফলত দুয়োখন দেশৰ আৰ্থিক সম্পৰ্ক সুদৃঢ় হৈছে । প্ৰধানমন্ত্ৰীয়ে লগতে কয় যে কুৱেইট বিনিয়োগ কৰ্তৃপক্ষই ভাৰতত যথেষ্ট বিনিয়োগ কৰিছে আৰু এতিয়া ভাৰতত বিনিয়োগৰ আগ্ৰহ বাঢ়িছে ।
কুৱেইট ভাৰতৰ বাবে এক গুৰুত্বপূৰ্ণ অংশীদাৰ-
কুৱেইট নিউজ এজেন্সীৰ সৈতে হোৱা এক সাক্ষাৎকাৰত প্ৰধানমন্ত্ৰী মোদীয়ে কয় যে বেপাৰ আৰু বাণিজ্য কুৱেইট আৰু ভাৰতৰ মাজত দ্বিপাক্ষিক সম্পৰ্কৰ গুৰুত্বপূৰ্ণ স্তম্ভ হৈ আহিছে, দুমুখীয়া বাণিজ্য বৃদ্ধি পাইছে । কুৱেইট ভাৰতৰ বাবে এক গুৰুত্বপূৰ্ণ অংশীদাৰ, ইয়াৰ ষষ্ঠ বৃহত্তম খাৰুৱা তেলৰ যোগানকাৰী আৰু ভাৰতৰ শক্তিৰ প্ৰয়োজনীয়তাৰ ৩ শতাংশ পূৰণ কৰে । ২০২৩-২৪ চনত দুয়োখন দেশৰ মাজত দ্বিপাক্ষিক বাণিজ্য ১০.৪৭ বিলিয়ন ডলাৰত উপনীত হোৱাৰ বিপৰীতে ভাৰতৰ ৰপ্তানি বছৰৰ পিছত বছৰ ধৰি ৩৪.৭ শতাংশ বৃদ্ধি পাইছে ।
ইফালে, জি চি চি দেশসমূহৰ সৈতে ভাৰতৰ বাণিজ্য ২০২২-২৩ চনত ১৮৪.৪৬ বিলিয়ন ডলাৰৰ শক্তিশালী ৰূপত উপনীত হয় । বিশেষকৈ অটোম’বাইল, বৈদ্যুতিক আৰু যান্ত্ৰিক যন্ত্ৰপাতি আৰু টেলিকমিউনিকেচন খণ্ডত ‘মেড ইন ইণ্ডিয়া’ সামগ্ৰীয়ে কুৱেইটত নতুনকৈ আগ্ৰাসন কৰা দেখি আমি আনন্দিত হৈছো বুলি প্ৰধানমন্ত্ৰী মোদীয়ে কয় ।
