জিএছটি সংগ্ৰহত দেশৰ ভিতৰতে চমক অসমৰ
বিত্তমন্ত্ৰী জয়ন্ত মল্লবৰুৱাই উল্লেখ কৰে যে এই উল্লেখনীয় প্ৰদৰ্শনে অসমক দেশৰ শীৰ্ষ প্ৰদৰ্শনকাৰী প্ৰধান ৰাজ্যসমূহৰ শাৰীলৈ লৈ গৈছে
পণ্য আৰু সেৱা কৰ (GST) সংগ্ৰহৰ ক্ষেত্ৰত ৰাষ্ট্ৰীয় পৰ্যায়ত এক ডাঙৰ সফলতা অৰ্জন কৰিছে অসমে । চলিত ২০২৬ বৰ্ষৰ জুন মাহত ৰাজ্যখনে যোৱা বছৰৰ তুলনাত ১৫ শতাংশ অভিলেখ বৃদ্ধি পঞ্জীয়ন কৰিছে । এই বৃদ্ধি ৰাষ্ট্ৰীয় গড় বৃদ্ধিৰ হাৰ (৯ শতাংশ)তকৈ বহু বেছি ।
শনিবাৰে সামাজিক মাধ্যম এক্স (X)-ত এই গুৰুত্বপূৰ্ণ তথ্য সদৰী কৰিছে ৰাজ্যৰ বিত্তমন্ত্ৰী জয়ন্ত মল্লবৰুৱাই । তেওঁ উল্লেখ কৰে যে এই উল্লেখনীয় প্ৰদৰ্শনে অসমক দেশৰ শীৰ্ষ প্ৰদৰ্শনকাৰী প্ৰধান ৰাজ্যসমূহৰ শাৰীলৈ লৈ গৈছে ।
১,৪৩৭ কোটি টকাৰ অভিলেখ জিএছটি সংগ্ৰহ
বিত্তমন্ত্ৰীগৰাকীয়ে প্ৰকাশ কৰা তথ্য অনুসৰি, ২০২৬ চনৰ জুন মাহত অসমে মুঠ ১,৪৩৭ কোটি টকাৰ জিএছটি সংগ্ৰহ কৰিবলৈ সক্ষম হৈছে । আনহাতে, যোৱা ২০১৫ বৰ্ষৰ জুন মাহত এই সংগ্ৰহৰ পৰিমাণ আছিল ১,২৫৫ কোটি টকা ।
কেৱল জুন মাহেই নহয়, চলিত বিত্তীয় বৰ্ষৰ প্ৰথমটো তিনিমাহিকতো (এপ্ৰিল-জুন) অসমে ৰাজহ সংগ্ৰহত বৃহৎ জাঁপ মাৰিছে । এই ৩ মাহত মুঠ ৪,৪৬৭ কোটি টকা সংগ্ৰহ হৈছে, যাৰ বিপৰীতে যোৱা বছৰৰ এই একে সময়ছোৱাত সংগ্ৰহ হৈছিল ৩,০২৬ কোটি টকা ।
কিদৰে সম্ভৱ হ’ল এই বৃহৎ সফলতা?
ৰাজহ সংগ্ৰহৰ এই অভূতপূৰ্ব বৃদ্ধিৰ আঁৰত চৰকাৰে গ্ৰহণ কৰা কেইবাটাও কঠোৰ আৰু আধুনিক পদক্ষেপ থকা বুলি মন্ত্ৰী জয়ন্ত মল্লবৰুৱাই জানিবলৈ দিয়ে । তেওঁ ইয়াৰ মুখ্য কাৰণসমূহ এনেদৰে উল্লেখ কৰে :
কৰ মান্যতা বৃদ্ধি (Tax Compliance): ব্যৱসায়ী আৰু কৰদাতাসকলক সময়মতে কৰ দিবলৈ উৎসাহিত কৰা ।
ৰাজহ ফাদিল ৰোধ: টেক্স ফ্ৰড বা কৰ ফান্দ ফাদিল কৰাৰ বাবে কঢ়া নজৰ ।
ডিজিটেল কৰ প্ৰশাসন: কৰ ব্যৱস্থা সম্পূৰ্ণৰূপে ডিজিটেল কৰি অধিক স্বচ্ছ কৰি তোলা ।
কৰৰ পৰিসৰ সম্প্ৰসাৰণ: নতুন নতুন ব্যৱসায়ীক কৰৰ আওতালৈ অনা ।
মহাৰাষ্ট্ৰ-পশ্চিম বংগকো পিছ পেলালে অসমে
প্ৰাপ্ত খবৰ অনুসৰি, জুন মাহৰ জিএছটি বৃদ্ধিৰ হাৰৰ ক্ষেত্ৰত অসমে দেশৰ কেইবাখনো ডাঙৰ আৰু ঔদ্যোগিকভাৱে উন্নত ৰাজ্যক চেৰ পেলাইছে । এই তালিকাত মহাৰাষ্ট্ৰ, কৰ্ণাটক, দিল্লী, হাৰিয়ানা আৰু পশ্চিম বংগৰ দৰে ডাঙৰ ৰাজ্যও অন্তৰ্ভুক্ত আছে ।
বিত্তমন্ত্ৰীগৰাকীয়ে স্পষ্ট কৰি দিয়ে যে অসম চৰকাৰ স্বচ্ছ শাসন, শক্তিশালী ৰাজহ সংগ্ৰহ আৰু ৰাজ্যৰ বিত্তীয় স্থিতি সুদৃঢ় কৰাৰ বাবে সম্পূৰ্ণ প্ৰতিশ্ৰুতিবদ্ধ । ইয়াৰ লগতে তেওঁ অসমৰ বিত্তীয় ভেটি শক্তিশালী কৰাৰ সমগ্ৰ কৃতিত্ব মুখ্যমন্ত্ৰী ড° হিমন্ত বিশ্ব শৰ্মাৰ বলিষ্ঠ নেতৃত্বক প্ৰদান কৰে ।
লগতে পঢ়ক : ভাৰতৰ ভিতৰতে প্ৰথম: অসমত আৰম্ভ হ’ল বিশ্ববিখ্যাত ‘মাচ্চা চাহ’ৰ বাণিজ্যিক উৎপাদন