পুৰীৰ ৰথযাত্ৰাত অঘটন: এজন ভক্তৰ মৃত্যু, শতাধিক আহত
পবিত্ৰ ৰথযাত্ৰাৰ সময়ত এক শোকাবহ ঘটনা সংঘটিত হৈছে
ওড়িশাৰ পুৰীত অনুষ্ঠিত বিশ্ববিখ্যাত ভগৱান জগন্নাথৰ পবিত্ৰ ৰথযাত্ৰাৰ সময়ত এক শোকাবহ ঘটনা সংঘটিত হৈছে । উৎসৱৰ উল্লাসৰ মাজতে হঠাতে সৃষ্টি হোৱা এক ঠেলা-হেঁচা সদৃশ পৰিস্থিতিৰ বাবে এজন ভক্তই প্ৰাণ হেৰুৱাবলগীয়া হোৱাৰ বিপৰীতে প্ৰায় ১০০ গৰাকী লোক আহত হৈছে ।
উশাহ-নিশাহ লোৱাত প্ৰচণ্ড কষ্ট পোৱাৰ পিছত মৃত ভক্তগৰাকীক সংকটজনক অৱস্থাত হাস্পতালত ভৰ্তি কৰোৱা হৈছিল যদিও চিকিৎসকে তেওঁক মৃত ঘোষণা কৰে ।
কেনেকৈ ঘটিল এই ঘটনা?
প্ৰকাশিত খবৰ অনুসৰি, পুৰীৰ মুখ্য পথ ‘বৰ দাণ্ডা’ত লাখ লাখ ভক্তই ভগৱান জগন্নাথ, ভগৱান বলভদ্ৰ আৰু দেৱী সুভদ্ৰাৰ পবিত্ৰ ৰথ দৰ্শন কৰিবলৈ তথা ৰথ টানিবলৈ অধীৰ আগ্ৰহেৰে অপেক্ষা কৰি আছিল । ঠিক তেনে সময়তে ভক্তৰ ভিৰৰ বাবে হঠাতে হেঁচা-ঠেলাৰ সৃষ্টি হয় । মুহূৰ্তৰ ভিতৰতে পৰিস্থিতি নিয়ন্ত্ৰণৰ বাহিৰলৈ গুচি যায় আৰু একাংশ ভক্ত মাটিত বাগৰি পৰে, যাৰ ফলত সমগ্ৰ অঞ্চলটোত এক হুৱাদুৱা আৰু আতংকময় পৰিস্থিতিৰ সৃষ্টি হয় ।
ছচিয়েল মিডিয়াত ভাইৰেল হ’ল ঘটনাৰ দৃশ্য
ঘটনাটোৰ কেইবাটাও হাহাকাৰময় ভিডিঅ’ ইতিমধ্যে পোহৰলৈ আহিছে । ভিডিঅ’সমূহত দেখা গৈছে যে ‘বৰ দাণ্ডা’ত ভক্তৰ প্ৰচণ্ড ভিৰৰ হেঁচা ক্ৰমাৎ বৃদ্ধি পাইছে আৰু ভিৰ চম্ভালিবলৈ নিৰাপত্তাৰক্ষীয়ে যথেষ্ট সংগ্ৰাম কৰিবলগীয়া হৈছে । আন কিছুমান দৃশ্যত ৰাজপথত সিঁচৰতি হৈ থকা ভক্তসকলৰ জোতা-চেন্দেল পৰি থকা দেখা গৈছে, যিয়ে ঘটনাৰ ভয়াবহতাৰ প্ৰমাণ দাঙি ধৰিছে ।
প্ৰশাসনৰ ক্ষিপ্ৰ ব্যৱস্থা আৰু তদন্ত
দুৰ্ঘটনাটো সংঘটিত হোৱাৰ ঠিক পিছতেই ওড়িশা দুৰ্যোগ দ্ৰুত সঁহাৰি বাহিনী, আৰক্ষী আৰু স্বাস্থ্য বিভাগৰ উদ্ধাৰকাৰী দল তৎপৰ হৈ পৰে । আহতসকলক ততাতৈয়াকৈ এম্বুলেন্সৰ জৰিয়তে পুৰী জিলা সদৰ হাস্পতাল আৰু ওচৰৰ অন্যান্য চিকিৎসা কেন্দ্ৰসমূহত ভৰ্তি কৰোৱা হয় ।
বৰ্তমান প্ৰশাসনে পৰিস্থিতি সম্পূৰ্ণৰূপে নিয়ন্ত্ৰণলৈ অনা বুলি দাবী কৰিছে আৰু অতিৰিক্ত নিৰাপত্তাৰক্ষী বাহিনী মোতায়েন কৰিছে । অৱশ্যে এতিয়ালৈকে চৰকাৰীভাৱে আহতৰ প্ৰকৃত সংখ্যা আৰু ঘটনাৰ মূল কাৰণ সন্দৰ্ভত কোনো আনুষ্ঠানিক বিবৃতি প্ৰকাশ কৰা নাই ।
লগতে পঢ়ক : সোণম ৱাংচুকৰ অনশনত উদ্বেগ প্ৰকাশ দিল্লী উচ্চ ন্যায়ালয়ৰ