মন্ত্ৰী ৰণজিৎ কুমাৰ দাসে মুখ্যমন্ত্ৰী ড০ হিমন্ত বিশ্ব শৰ্মাক লৈ কৰা এক বিশেষ মন্তব্যই চৰ্চা লাভ কৰিছে । মন্ত্ৰী দাসৰ মতে আৰু ১৫ বছৰৰ পাছতেই দিল্লীলৈ পঠোৱা হ’ব হিমন্ত বিশ্ব শৰ্মাক ।

২০২৬ ৰ বিধানসভা নিৰ্বাচনৰ কাউণ্টডাউন আৰম্ভ হৈছে । ইতিমধ্যে নিৰ্বাচনত এঘড়ী যুঁজিবলৈ সাজু হৈছে শাসক-বিৰোধী । ইয়াৰ মাজতে মন্ত্ৰী ৰণজিৎ কুমাৰ দাসে মুখ্যমন্ত্ৰী ড০ হিমন্ত বিশ্ব শৰ্মাক লৈ কৰা এক বিশেষ মন্তব্যই চৰ্চা লাভ কৰিছে । মন্ত্ৰী দাসৰ মতে, অসমৰ বিকাশৰ স্বাৰ্থত মুখ্যমন্ত্ৰী ড০ শৰ্মাক আৰু ১৫ বছৰৰ প্ৰয়োজন আছে, কিন্তু তাৰ পাছতেই তেওঁক কেন্দ্ৰীয় ৰাজনীতিলৈ পঠিওৱা হ’ব ।

স্মাৰ্ট মুখ্যমন্ত্ৰী আহি আছে !

মন্ত্ৰী ৰণজিৎ কুমাৰ দাসে আত্মবিশ্বাসেৰে কয় যে ড০ হিমন্ত বিশ্ব শৰ্মাই হ’ব অসমত বিজেপিৰ পৰা দ্বিতীয়বাৰৰ বাবে মুখ্যমন্ত্ৰীৰ আসনত বহা প্ৰথমগৰাকী নেতা । মন্ত্ৰীগৰাকীৰ মতে, অসমক উন্নয়নৰ শিখৰলৈ নিবলৈ ড০ শৰ্মাক ১৫ বছৰৰ প্ৰয়োজন । তেওঁ কয়, “মই মুখ্যমন্ত্ৰীক কৈছো যে ১৫ বছৰ একেটা চোলা কিমান পিন্ধি থাকিব ? ১৫ বছৰৰ পিছত তেওঁক দিল্লীলৈ পঠোৱা হ’ব । এয়া মোৰ সিদ্ধান্ত আৰু তেওঁকো এই কথা কোৱা আছে । ইয়াৰ পিছত এজন স্মাৰ্ট মুখ্যমন্ত্ৰী আহি আছে ।”

কংগ্ৰেছক সমালোচনা-

ইফালে কংগ্ৰেছে ‘হু ইজ হিমন্ত বিশ্ব শৰ্মা’ বুলি কৰা প্ৰশ্নৰ সমালোচনা কৰি মন্ত্ৰী দাসে মন্তব্য কয় যে, হিমন্ত বিশ্ব শৰ্মা কোন হয় সেয়া অসমবাসীয়ে জানে । যিয়ে হাজাৰ হাজাৰ কিলোমিটাৰ পথ নিৰ্মাণ কৰিলে, যিয়ে ব্ৰক্ষ্মপুত্ৰৰ ওপৰত কেইবাখনো দলং নিৰ্মাণ কৰিলে, যিয়ে ৰাজ্যত কেইবাখনো মেডিকেল আৰু ইঞ্জিনিয়াৰিং কলেজ নিৰ্মাণ কৰিলে, যাৰ নেতৃত্বত কেইবাটাও আয়ুক্ত কাৰ্যালয় নিৰ্মাণ হ’ল, যাৰ নেতৃত্বত কেইবাটাও ষ্টেডিয়াম, কেইবাখনো বিদ্যালয় নিৰ্মাণ হ’ল । এই কথাখিনি সকলোৱে জানে ।

আনহাতে কংগ্ৰেছে বৰ্তমান যি প্ৰস্তুতি চলাই আছে, সেয়া ২০২৬ নহয়, বৰঞ্চ ২০৩৬ চনৰ বাবেহে চলাইছে বুলি মন্তব্য কৰে মন্ত্ৰীগৰাকীয়ে ।

লগতে পঢ়ক : গৌৰৱ গগৈৰ পত্নীৰ পাকিস্তানত সক্ৰিয় বেংক একাউণ্ট! মুখ্যমন্ত্ৰী ড° হিমন্ত বিশ্ব শৰ্মাৰ বিস্ফোৰক অভিযোগ