অস্ত্ৰ ত্যাগ কৰক অন্যথা বিষম হ’ব পৰিণতি… হামাছক কঠোক সকীয়নি ট্ৰাম্পৰ
ইজৰাইলৰ প্ৰধানমন্ত্ৰীক সাক্ষাৎ কৰাৰ পিছত ট্ৰাম্পে স্পষ্টভাৱে কয় যে যদিহে হামাছে শীঘ্ৰেই অস্ত্ৰ-শস্ত্ৰ ত্যাগ কৰি আত্মসমৰ্পণ নকৰে তেন্তে ভয়াৱহ পৰিণতিৰ সন্মুখীন হ’ব । তেওঁ সকীয়াই দিয়ে যে হামাছক আত্মসমৰ্পণ কৰিবলৈ অতি কম সময় দিয়া হ’ব ।
গাজা সংকট সন্দৰ্ভত হামাছক শেষ সকীয়নি দিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে । ফ্ল’ৰিডাস্থিত তেওঁৰ মাৰ-এ-লাগো এষ্টেটত ইজৰাইলৰ প্ৰধানমন্ত্ৰী বেঞ্জামিন নেতানিয়াহুক সাক্ষাৎ কৰাৰ পিছত ট্ৰাম্পে স্পষ্টভাৱে কয় যে যদিহে হামাছে শীঘ্ৰেই নিজৰ অস্ত্ৰ-শস্ত্ৰ ত্যাগ কৰি আত্মসমৰ্পণ নকৰে তেন্তে ই ভয়াৱহ পৰিণতিৰ সন্মুখীন হ’ব ।
সংবাদ মাধ্যমৰ আগত ট্ৰাম্পে কয় যে গাজাত স্থায়ী শান্তিৰ বাবে হামাছৰ নিৰস্ত্ৰকৰণ অতি প্ৰয়োজনীয় । তেওঁ সকীয়াই দিয়ে যে হামাছক আত্মসমৰ্পণ কৰিবলৈ অতি কম সময় দিয়া হ’ব । যদি নকৰে, তেন্তে তেওঁলোকে ভুগিবলৈ সাজু হোৱা উচিত ।
নেতানিয়াহুৰ সৈতে আলোচনাত কেন্দ্ৰীয় বিষয় হৈ থাকিল গাজা-
ট্ৰাম্পে কয় যে নেতানিয়াহুৰ সৈতে তেওঁৰ আলোচনাৰ মূল এজেণ্ডা আছিল গাজাত যুদ্ধবিৰতি আৰু হামাছৰ ভূমিকা । তেওঁ কয় যে এই বিষয়ত দুয়োখন দেশৰ মাজত সহমত আছে । ট্ৰাম্পৰ মতে, “আমি কেইবাটাও গুৰুত্বপূৰ্ণ সিদ্ধান্তত উপনীত হৈছো । আমি যি দিশত যাব বিচাৰো সেই সন্দৰ্ভত আমাৰ মতভেদ অতি কম ।”
অৱশ্যে ট্ৰাম্পে এই কথাও স্বীকাৰ কৰে যে ৱেষ্ট বেংক সন্দৰ্ভত আমেৰিকা আৰু ইজৰাইলৰ মতামত সম্পূৰ্ণৰূপে একেই নহয় । ৱেষ্ট বেংকত ক্ৰমবৰ্ধমান হিংসাই শান্তি প্ৰক্ৰিয়াৰ ক্ষতি কৰিব পাৰে নেকি বুলি সোধাত তেওঁ কয় যে এই বিষয়টো দীৰ্ঘদিন ধৰি চৰ্চা চলি আহিছে । ট্ৰাম্পে কয় যে ৱেষ্ট বেংকৰ ক্ষেত্ৰত আমি ১০০ শতাংশ একমত বুলি ক’ব নোৱাৰো যদিও আমি নিশ্চিতভাৱে এটা সিদ্ধান্তত উপনীত হ’ম । মতানৈক্যৰ মাজতো ট্ৰাম্পে আস্থা প্ৰকাশ কৰে যে সকলো বিবাদ আলোচনাৰ জৰিয়তে সমাধান কৰিব পৰা যাব । তেওঁ কয় যে আমেৰিকা শান্তিৰ দিশত আগবাঢ়িবলৈ প্ৰতিশ্ৰুতিবদ্ধ আৰু গাজাত স্থিতিশীলতা তেতিয়াহে সম্ভৱ হ’ব যেতিয়া হিংসা আৰু অস্ত্ৰ-শস্ত্ৰৰ সম্পূৰ্ণ অন্ত পৰিব ।
নেতানিয়াহুক প্ৰশংসা ট্ৰাম্পৰ-
ইফালে ইজৰাইলৰ প্ৰধানমন্ত্ৰী বেঞ্জামিন নেতানিয়াহুক মুকলিকৈ প্ৰশংসা কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে । তেওঁলোকৰ বৈঠকৰ সময়ত ট্ৰাম্পে নেতানিয়াহুক যুদ্ধকালীন প্ৰধানমন্ত্ৰী বুলি অভিহিত কৰি কয় যে তেওঁ ইজৰাইলক অতি বিপদজনক সময়ৰ পৰা উলিয়াই আনিছে । ট্ৰাম্পে কয় যে তেওঁ এক কল্পনাতীত কাম কৰিছে । সেই সময়ত যদি ভুল প্ৰধানমন্ত্ৰী থাকিল হেতেন তেন্তে অকপটে ক’বলৈ গ’লে হয়তো আজি ইজৰাইলৰ অস্তিত্বই নাথাকিল হেতেন ।
লগতে পঢ়ক : আমেৰিকা এতিয়া প্ৰকৃত ৰাষ্ট্ৰসংঘঃ ট্ৰাম্পৰ ডাঙৰ ঘোষণা, ভাৰত-পাককে ধৰি ৮ খন যুদ্ধৰ সমাধানৰ দাবী