এক গোপন সূত্ৰৰ পম খেদি চলোৱা এক অভিযানত এটা আন্তঃৰাষ্ট্ৰীয় বন্যপ্ৰাণী সৰবৰাহকাৰী চক্ৰ উৎখাত কৰিবলৈ সক্ষম হয়

বন্যপ্ৰাণী সৰবৰাহৰ বিৰুদ্ধে অসম আৰক্ষীয়ে লাভ কৰিছে এক বৃহৎ সফলতা । অসম আৰক্ষীৰ বিশেষ টাস্ক ফৰ্চে চিৰাং জিলাৰ চিদলীত এক গোপন সূত্ৰৰ পম খেদি চলোৱা এক অভিযানত এটা আন্তঃৰাষ্ট্ৰীয় বন্যপ্ৰাণী সৰবৰাহকাৰী চক্ৰ উৎখাত কৰিবলৈ সক্ষম হয় । এই অভিযানত এছটিএফে ৮টাকৈ বিলুপ্তপ্ৰায় সোণালী বান্দৰ (Golden Langur) উদ্ধাৰ কৰাৰ লগতে ঘটনাৰ সৈতে জড়িত ৯টা সৰবৰাহকাৰীক গ্ৰেপ্তাৰ কৰে ।

সৰবৰাহকাৰীৰ ভিতৰত আছে বাংলাদেশী নাগৰিক

জানিব পৰা মতে এই আন্তঃৰাষ্ট্ৰীয় ৰেকেটটোৰ সৈতে জড়িত থকাৰ অভিযোগত গ্ৰেপ্তাৰ হোৱা ৯ জন লোকৰ ভিতৰত এজন বাংলাদেশৰ নাগৰিক । আনহাতে, ধৃত অভিযুক্তসকলৰ ভিতৰত পাঁচজন পশ্চিমবংগৰ আৰু তিনিজন অসমৰ বাসিন্দা বুলি জানিব পৰা গৈছে । এই দলটোৱে দীৰ্ঘদিনৰে পৰা অসম তথা উত্তৰ-পূৰ্বাঞ্চলক কৰি কৰি বন্যপ্ৰাণীৰ অবৈধ ব্যৱসায় চলাই আহিছিল ।

ভাৰতীয় বন্যপ্ৰাণী আইনৰ অধীনত সংৰক্ষিত সোণালী বান্দৰ

অভিযানৰ সময়ত উদ্ধাৰ হোৱা আঠটা সোণালী বান্দৰ অত্যন্ত দুষ্প্ৰাপ্য আৰু বিপন্ন প্ৰজাতিৰ বুলি চিহ্নিত কৰা হৈছে । উল্লেখ্য যে, এই বিশেষ প্ৰজাতিৰ বান্দৰ কেৱল অসমৰ কিছু অংশ আৰু চুবুৰীয়া দেশ ভূটানৰ পাৰ্বত্য বনাঞ্চলতহে পোৱা যায় । ভাৰত চৰকাৰৰ বন্যপ্ৰাণী সংৰক্ষণ আইনৰ অধীনত এই প্ৰজাতিক কঠোৰ সুৰক্ষা প্ৰদান কৰা হৈছে ।

উদ্ধাৰ হোৱা প্ৰাণীকেইটাক ততাতৈয়াকৈ স্বাস্থ্য পৰীক্ষা আৰু উপযুক্ত পুনৰ্সংস্থাপনৰ বাবে বন বিভাগৰ হাতত অৰ্পণ কৰা হৈছে ।

আন্তঃৰাষ্ট্ৰীয় সীমান্তৰ সিপাৰেও সক্ৰিয় এই নেটৱৰ্ক

আৰক্ষীৰ প্ৰাথমিক তদন্তত সন্দেহ কৰা হৈছে যে এই গোটটোৱে আন্তঃৰাজ্যিক আৰু আন্তঃৰাষ্ট্ৰীয় সীমান্তৰ সিপাৰেও এক বিশাল সংগঠিত নেটৱৰ্ক চলাই আছিল । এই সমগ্ৰ ক’লা বজাৰখনৰ শিপা ক’লৈ ডাল-পাল মেলিছে, সেই সন্দৰ্ভত আৰক্ষীয়ে তদন্ত ক্ষিপ্ৰ কৰি তুলিছে । চিণ্ডিকেটটোৰ আন সদস্যসকলক অতি শীঘ্ৰেই কৰায়ত্ত কৰা হ’ব বুলি এছটিএফে জানিবলৈ দিয়ে ।

লগতে পঢ়ক : অচিৰেই অসমৰ পৰিচয় বহন কৰিব ৪ কিলোমিটাৰ দীঘল ‘সাংস্কৃতিক কৰিডৰ’-এ