বুধবাৰে মহাৰাষ্ট্ৰৰ পুনেত অনুষ্ঠিত ৭৭ সংখ্যক সেনা দিৱসৰ পেৰেড এইবাৰ কিছু অনন্য আৰু আকৰ্ষণীয় দেখা যায় । প্ৰথমবাৰৰ বাবে মহিলা অগ্নিবীৰ দল, নেশ্যনেল কেডেট কৰ্পছৰ মহিলা মাৰ্চিং কনটিজেণ্ট আৰু ৰবটিক সেনাৰ এটা দলে এই পেৰেডত অংশগ্ৰহণ কৰে । এই সময়ছোৱাত সেনাই কিছুমান শেহতীয়া প্ৰযুক্তিৰ জৰিয়তে নিজৰ সামৰিক শক্তি প্ৰদৰ্শন কৰে আৰু উদীয়মান কেডেটসকলেও এই অনুষ্ঠানৰ সময়ত দৃষ্টি আকৰ্ষণ কৰে । বেংগালুৰুৰ কৰ্পছ অৱ মিলিটাৰী পুলিচ (চি এম পি)ত প্ৰশিক্ষণ লৈ থকা এন চি চিৰ গাৰ্ল কেডেট আৰু মহিলা অগ্নিবীৰসকলক অতি সুখী দেখা গৈছিল ।

সেনাবাহিনীৰ দক্ষিণ কমাণ্ডৰ অধীনত থকা পুনেৰ বম্বে ইঞ্জিনিয়াৰিং গ্ৰুপ আৰু চেণ্টাৰত অনুষ্ঠিত হয় এই বাৰ্ষিক পেৰেড । পুনেত প্ৰথমবাৰৰ বাবে এই সন্মানীয় পেৰেড আয়োজন কৰা হয় ।

চোলাপুৰ জিলাৰ অগ্নিবীৰ ঘুগ্ৰে সমীক্ষা বিনোদে কয় যে এইটো আমাৰ বাবে এক বিশেষ দিন । আমি যোৱা নৱেম্বৰ মাহত চি এম পিৰ প্ৰশিক্ষণ সম্পূৰ্ণ কৰিছিলো আৰু যোৱা মাহৰ পৰা পেৰেডৰ বাবে অনুশীলন কৰি আহিছো । ইয়াৰ বাবে আমি বহুত কষ্ট কৰিলোঁ । আমি গৌৰৱ অনুভৱ কৰিছো । সকলোৱে আমাক উৎসাহিত কৰিছিল ।

নেনা ৰাৱট আছিল ছোৱালী কেডেটৰ দলটোৰ অধিনায়ক-

গাৰ্ল কেডেটৰ দলটোৰ কমাণ্ডাৰ হৈ থকা নেনা ৰাৱাটে কয় যে আমি গৌৰৱ অনুভৱ কৰিছো । আমি এই পেৰেডত অংশগ্ৰহণ কৰা এন চি চিৰ ছোৱালী কেডেটৰ প্ৰথমটো বেটচ । আন এগৰাকী কেডেট এলিছ কোৱাক্সীয়ে কয় যে গৌৰৱ আৰু ভৱিষ্যৎৰ অনুভূতিয়ে আমাক আৰু অধিক ছোৱালীক এন চি চি আৰু সশস্ত্ৰ বাহিনীত যোগদান কৰিবলৈ অনুপ্ৰাণিত কৰিব ।

১২জনীয়া ৰবটিক সেনাৰ এটা দলৰ অংশগ্ৰহণ-

পেৰেডত কেইটামান ৰবটিক সেনাও আছিল । দৰ্শকৰ মাজত যথেষ্ট জনপ্ৰিয় হৈ পৰা ১২ জনীয়া ‘ৰবটিক সেনা’ৰ এই দল সেনাবাহিনীৰ আধুনিকীকৰণৰ প্ৰতীক । এই মেচিনসমূহে গধুৰ বোজা তুলিব পৰা আৰু দুৰ্গম অঞ্চলত কাম কৰিব পাৰে ।

পেৰেডৰ বিষয়বস্তু আছিল ‘শক্তিশালী ভাৰত, সক্ষম সেনা’

এইবাৰৰ পেৰেডৰ বিষয়বস্তু আছিল ‘শক্তিশালী ভাৰত, সক্ষম সেনা’, আৰু ইয়াৰ কেন্দ্ৰবিন্দু আছিল সেনাবাহিনীৰ সামৰ্থ্য প্ৰদৰ্শন । পেৰেড খেলপথাৰখন আৰ্মী আৰু চাউদাৰ্ণ কমাণ্ডৰ চিহ্নৰে সজাই পৰাই ‘নাৰী শক্তি’, ‘আত্মনিৰ্ভৰতা’ আদি বিষয়বস্তুৰ পোষ্টাৰো লগোৱা হয় ।

বুধবাৰে ৰাষ্ট্ৰপতি দ্ৰৌপদী মুৰ্মু আৰু প্ৰধানমন্ত্ৰী নৰেন্দ্ৰ মোদীয়ে সেনা দিৱসত ভাৰতীয় সেনাৰ জোৱান, প্ৰবীণ সৈনিক আৰু তেওঁলোকৰ পৰিয়ালক শুভেচ্ছা জ্ঞাপন কৰে । ৰাষ্ট্ৰপতিগৰাকীয়ে কয় যে ৰাষ্ট্ৰৰ সাৰ্বভৌমত্ব ৰক্ষা আৰু ৰাষ্ট্ৰীয় নিৰাপত্তা নিশ্চিত কৰাৰ ক্ষেত্ৰত তেওঁলোকৰ অটল দায়বদ্ধতাই সকলোৰে বাবে প্ৰেৰণা হিচাপে কাম কৰে ।

ছ’চিয়েল মিডিয়া প্লেটফৰ্ম ‘এক্স’ত দিয়া এক পোষ্টত ৰাষ্ট্ৰপতিগৰাকীয়ে কয় যে, “মাতৃভূমিৰ সেৱাত আপোনালোকে আগবঢ়োৱা অগণন ত্যাগক ৰাষ্ট্ৰই কৃতজ্ঞতাৰে স্মৰণ কৰে । সেনা দিৱসৰ দিনা ভাৰতীয় সেনাৰ জোৱান, প্ৰবীণ সৈনিক আৰু তেওঁলোকৰ পৰিয়াললৈ মোৰ শুভেচ্ছা জ্ঞাপন কৰিছোঁ । ৰাষ্ট্ৰৰ সাৰ্বভৌমত্ব ৰক্ষা আৰু ৰাষ্ট্ৰীয় নিৰাপত্তা নিশ্চিত কৰাৰ বাবে আপোনালোকৰ অটল প্ৰতিশ্ৰুতি সকলোৰে বাবে প্ৰেৰণা ।’

ৰাষ্ট্ৰপতিগৰাকীয়ে কয় যে সংকট আৰু দুৰ্যোগৰ সময়ত সেনাই কৰা মানৱীয় কাম-কাজ তেওঁলোকৰ দয়া আৰু সহানুভুতিৰ সাক্ষ্য । আপোনালোকৰ অসাধাৰণ বীৰতা আৰু সাহসে আগন্তুক প্ৰজন্মক অনুপ্ৰাণিত কৰি থাকিব ।

‘চৰকাৰ সশস্ত্ৰ বাহিনী আৰু তেওঁলোকৰ পৰিয়ালৰ কল্যাণৰ প্ৰতি দায়বদ্ধ’

প্ৰধানমন্ত্ৰী মোদীয়ে কয় যে কেন্দ্ৰীয় চৰকাৰ সশস্ত্ৰ বাহিনী আৰু তেওঁলোকৰ পৰিয়ালৰ কল্যাণৰ প্ৰতি দায়বদ্ধ । ‘এক্স’ৰ এটা পোষ্টত প্ৰধানমন্ত্ৰীয়ে কয়, “আজি সেনা দিৱসত আমাৰ ৰাষ্ট্ৰৰ নিৰাপত্তাৰ অভিভাৱক হিচাপে থিয় দিয়া ভাৰতীয় সেনাৰ অদম্য সাহসক আমি প্ৰণাম জনাইছো । প্ৰতিদিনে কোটি কোটি ভাৰতীয়ৰ নিৰাপত্তা সুনিশ্চিত কৰা সাহসী লোকসকলৰ ত্যাগৰ কথাও আমি স্মৰণ কৰোঁ ।”

তেওঁ কয় যে আমাৰ চৰকাৰ সশস্ত্ৰ বাহিনী আৰু তেওঁলোকৰ পৰিয়ালৰ কল্যাণৰ বাবে প্ৰতিশ্ৰুতিবদ্ধ । বিগত বছৰবোৰত, আমি কেইবাটাও সংস্কাৰ কৰিছো আৰু আধুনিকীকৰণৰ ওপৰত গুৰুত্ব আৰোপ কৰিছো । এয়া ভৱিষ্যতে অব্যাহত থাকিব ।

কিয় পালন কৰা হয় সেনা দিৱস ?

১৯৪৯ চনৰ আজিৰ দিনটোতে ভাৰতৰ শেষৰজন ব্ৰিটিছ কমাণ্ডাৰ ইন চিফ জেনেৰেল ফ্ৰান্সিছ বুচাৰৰ ঠাইত তেতিয়াৰ লেফটেনেণ্ট জেনেৰেল কে এম কেৰিয়াপ্পা কামাণ্ডাৰ ইন চীফ হয় । সেইবাবেই প্ৰতি বছৰে ১৫ জানুৱাৰীত সেনা দিৱস পালন কৰা হয় । পৰৱৰ্তী সময়ত কেৰিয়াপ্পা ফিল্ড মাৰ্শ্বাল হৈছিল ।