সাগৰৰ নতুন প্ৰহৰী মহেন্দ্ৰগিৰিয়ে চকুৰ পলকতে ধূলিস্যাৎ কৰিব শত্ৰুৰ ঘাটি

শীঘ্ৰেই আৰু অধিক শক্তি আৰু সামৰ্থ বৃদ্ধি পাব ভাৰতীয় নৌসেনাৰ । অহা ১১ জুলাইত অন্ধ্ৰপ্ৰদেশৰ বিশাখাপট্টনমত এক আনুষ্ঠানিক কাৰ্যসূচীৰ জৰিয়তে প্ৰজেক্ট-১৭এ-ৰ অধীনত নিৰ্মিত থলুৱা প্ৰযুক্তিৰ শক্তিশালী ষ্টীল্থ ফ্ৰিগেট ‘মহেন্দ্ৰগিৰি’-ক নৌসেনাৰ বহৰত আনুষ্ঠানিকভাৱে অন্তৰ্ভুক্ত কৰা হ’ব ।

এই যুদ্ধজাহাজখন কেৱল এক নতুন সামৰিক শক্তিয়েই নহয়, বৰঞ্চ ভাৰতৰ বৰ্ধিত প্ৰতিৰক্ষা প্ৰযুক্তি, স্বাৱলম্বীতা আৰু সামুদ্ৰিক নিৰাপত্তা তথা সাৰ্বভৌমত্বৰ এক নতুন প্ৰতীক । অত্যাধুনিক অস্ত্ৰ-শস্ত্ৰ আৰু উন্নত ষ্টীল্থ প্ৰযুক্তিৰে সজ্জিত INS মহেন্দ্ৰগিৰিয়ে ভাৰত মহাসাগৰীয় অঞ্চলত দেশৰ কৌশলগত ক্ষমতাক বহুখিনি শক্তিশালী কৰি তুলিব ।

‘INS মহেন্দ্ৰগিৰি’ক কিহে ইমান বিশেষ কৰি তুলিছে ?

মহেন্দ্ৰগিৰি হৈছে সম্পূৰ্ণৰূপে ভাৰততে ডিজাইন আৰু নিৰ্মাণ কৰা এখন অত্যাধুনিক নীলগিৰি-শ্ৰেণীৰ ষ্টীল্থ ফ্ৰিগেট । এই যুদ্ধজাহাজখনৰ ডিজাইন ভাৰতীয় নৌসেনাৰ নিজস্ব ‘ৱাৰশ্বিপ ডিজাইন ব্যুৰো’ই প্ৰস্তুত কৰিছে । আনহাতে, মুম্বাইস্থিত আগশাৰীৰ জাহাজ নিৰ্মাণ প্ৰতিষ্ঠান ‘মাজগাওঁ ডক শ্বিপবিল্ডাৰ্ছ লিমিটেড’-এ ইয়াৰ নিৰ্মাণ কাৰ্য সম্পূৰ্ণ কৰিছে ।

বিশেষ ষ্টীল্থ প্ৰযুক্তি ব্যৱহাৰ কৰাৰ বাবে এই যুদ্ধজাহাজখন শত্ৰুপক্ষৰ ৰাডাৰত ধৰা পৰাটো প্ৰায় অসম্ভৱ । যুদ্ধৰ সময়ত এই বিশেষ গুণটোৱে ভাৰতীয় নৌসেনাক এক ডাঙৰ কৌশলগত অগ্ৰাধিকাৰ প্ৰদান কৰিব আৰু শত্ৰুৰ বাবে ইয়াক চিনাক্ত কৰাটো অত্যন্ত কঠিন হ’ব ।

INS মহেন্দ্ৰগিৰিৰ আধুনিক ক্ষমতা আৰু বৈশিষ্ট্যসমূহ :

নৌসেনাৰ এই নতুন যুদ্ধজাহাজখনত বহুতো শক্তিশালী প্ৰযুক্তি আৰু আক্ৰমণাত্মক সঁজুলি একত্ৰিত কৰা হৈছে :

মাৰাত্মক মিছাইল প্ৰণালী: দীৰ্ঘ দূৰত্বৰ নিখুঁত আক্ৰমণৰ বাবে ইয়াত ব্ৰাহ্মছ ছুপাৰচনিক ক্ৰুজ মিছাইল আৰু বায়ু প্ৰতিৰক্ষাৰ বাবে বৰাক-৮ মিছাইল প্ৰণালী সংলগ্ন কৰা হৈছে ।

ইলেক্ট্ৰনিক ৱাৰফেয়াৰ আৰু চেন্সৰ: শত্ৰুৰ আক্ৰমণ বিফল কৰিবলৈ উন্নত ইলেক্ট্ৰনিক যুদ্ধ প্ৰণালী আৰু অত্যাধুনিক ৰাডাৰ তথা চেন্সৰ চিষ্টেম ব্যৱহাৰ কৰা হৈছে ।

চাবমেৰিন প্ৰতিৰোধী ব্যৱস্থা: পানীৰ তলত থকা শত্ৰুৰ চাবমেৰিন ধৰা পেলাব পৰা আৰু আক্ৰমণ কৰিব পৰা আধুনিক টৰ্পেড’ আৰু ৰকেট লাঞ্চাৰ ইয়াত উপলব্ধ ।

স্বয়ংক্ৰিয় নিয়ন্ত্ৰণ: এখন সংহত কম্বেট মেনেজমেণ্ট চিষ্টেম-এ জাহাজখনৰ সকলো অস্ত্ৰ আৰু চেন্সৰ স্বয়ংক্ৰিয়ভাৱে পৰিচালনা কৰে ।

‘আত্মনিৰ্ভৰ ভাৰত’ৰ লক্ষ্যত এক ডাঙৰ সফলতা

প্ৰতিৰক্ষা উৎপাদন ক্ষেত্ৰত আত্মনিৰ্ভৰশীলতাৰ বাবে INS মহেন্দ্ৰগিৰি এক উৎকৃষ্ট উদাহৰণ । এই যুদ্ধজাহাজখনত ৭৫ শতাংশতকৈও অধিক থলুৱা (স্বদেশী) সামগ্ৰী ব্যৱহাৰ কৰা হৈছে । ইয়াৰ নিৰ্মাণ কাৰ্যত দেশৰ ডাঙৰ ডাঙৰ প্ৰতিৰক্ষা কোম্পানীসমূহৰ লগতে দেশৰ শ শ ক্ষুদ্ৰ, লঘু আৰু মজলীয়া উদ্যোগে সক্ৰিয়ভাৱে অংশগ্ৰহণ কৰিছে ।

লগতে পঢ়ক : শত্ৰুৰ বুকু কঁপাই দীৰ্ঘ দূৰত্বৰ ক্ৰুজ মিছাইলৰ সফল পৰীক্ষণ ভাৰতৰ