ৰাজ্যিক বিজেপিৰ মুখ্য কাৰ্যালায়ত অসম প্ৰদেশ কংগ্ৰেছৰ প্ৰাক্তন সভাপতি ভূপেন বৰাই ভাৰতীয় জনতা পাৰ্টিত যোগদান কৰে ।

অসম বিধানসভা নিৰ্বাচনৰ মাত্ৰ কেইসপ্তাহমান পূৰ্বে কংগ্ৰেছৰ ভেটিত কঁপনি তুলি ভাৰতীয় জনতা পাৰ্টীত যোগদান কৰে ভূপেন কুমাৰ বৰাই । ২২ ফেব্ৰুৱাৰীত বশিষ্ঠস্থিত ৰাজ্যিক বিজেপিৰ মুখ্য কাৰ্যালায়ত অসম প্ৰদেশ কংগ্ৰেছৰ প্ৰাক্তন সভাপতি ভূপেন কুমাৰ বৰাই ভাৰতীয় জনতা পাৰ্টিত যোগদান কৰে । ৰাজ্যিক বিজেপিৰ মুখ্য কাৰ্যালয় বাজপেয়ী ভৱনত আয়োজিত এক অনুষ্ঠানত ৰাজ্যিক বিজেপিৰ সভাপতি দিলীপ শইকীয়াৰ উপস্থিতিত তেওঁ শাসকীয় দলটোত যোগদান কৰে ।

১৬ ফেব্ৰুৱাৰীত ভূপেন বৰাই কংগ্ৰেছৰ পদত্যাগ পত্ৰ দাখিল কৰাৰ কেইদিনমানৰ পিছতে এই সিদ্ধান্ত গ্ৰহণ কৰে । তেওঁৰ পদত্যাগে কংগ্ৰেছ নেতৃত্বৰ মাজত তীব্ৰ জোকাৰণিৰ সৃষ্টি কৰিছে আৰু তেওঁক দলত ৰাখিবলৈ নেতৃত্বই যথেষ্ট চেষ্টা চলাইছিল । ৰাজ্যিক পৰ্যায়ৰ জ্যেষ্ঠ নেতাসকলে তেওঁৰ বাসগৃহত সাক্ষাৎ কৰিছিল আৰু আনকি কংগ্ৰেছ নেতা ৰাহুল গান্ধীয়েও তেওঁৰ সৈতে ফোনযোগে কথা পাতিছিল । যদিও বৰাই পুনৰ বিবেচনাৰ বাবে কিছু সময় বিচাৰিছিল, তথাপিও তেওঁৰ ৰাজনৈতিক সিদ্ধান্ত সলনি নকৰি দেওবাৰে বিজেপিত যোগদান কৰে ।

১৭ ফেব্ৰুৱাৰীত মুখ্যমন্ত্ৰী ড০ হিমন্ত বিশ্ব শৰ্মাই ভূপেন বৰাৰ বাসগৃহত উপস্থিত হৈ ৰাজহুৱাকৈ ঘোষণা কৰিছিল যে বৰাই ২২ ফেব্ৰুৱাৰীত বিজেপিত যোগদান কৰিব । দেওবাৰৰ আনুষ্ঠানিক যোগদান কাৰ্যসূচীৰ জৰিয়তে এই কথা নিশ্চিত হ’ল । ইফালে এই একেটা অনুষ্ঠানতে প্ৰাক্তন কংগ্ৰেছ কৰ্মী সঞ্জু বৰাইও বিজেপিত যোগদান কৰে ।

এই দুগৰাকী নেতাৰ লগতে আজি বিজেপিত যোগ দিয়ে দিগন্ত ফুকন, ভৱ বৰা, ৰাজীৱ কুমাৰ যোশী, গগণ চন্দ্ৰ বৰা, ৰমেন বৰা, কংকন দাস, প্ৰাণদ্বীপ ভৰালী, অনুপ শইকীয়া, দিগন্ত হাজৰিকা, বিনোদ শইকীয়া, দিলীপ বৰাসহ কেইবাজনো নেতা-কৰ্মীয়ে ।

আনহাতে বিজেপিত যোগদান কৰিয়েই বিজেপিৰ ৰাজ্যিক কাৰ্যনিৰ্বাহৰ দায়িত্ব লাভ কৰে ভূপেন বৰাই । তেওঁৰ লগতে বিজেপি দলত যোগদান কৰা সঞ্জু বৰুৱা আৰু কিছুদিন পূৰ্বে যোগদান কৰা শংকৰজ্যোতি বৰুৱাক ৰাজ্যিক বিজেপিৰ মিডিয়া পেনেলিষ্টৰ দায়িত্ব প্ৰদান কৰা হয় ।

লগতে পঢ়ক : এতিয়া অসমক কোনেও ৰঙা চকু দেখুৱাব নোৱাৰিবঃ কচুতলীৰ পৰা অবৈধ বাংলাদেশীক হুংকাৰ মুখ্যমন্ত্ৰীৰ