এই পৰাজয়ৰ লগে লগে এছিয়ান গেমছৰ বাবে যোগ্যতা অৰ্জন কৰাৰ আশা সমাপ্ত হ’ল হাৰিয়ানাৰ এইগৰাকী মল্লযোদ্ধাৰ

২০২৬ চনৰ এছিয়ান গেমছত ভাৰতক প্ৰতিনিধিত্ব কৰাৰ সপোন ভংগ হ’ল তাৰকা মল্লযোদ্ধা ভিনেশ ফোগাটৰ । শনিবাৰে নতুন দিল্লীৰ ইন্দিৰা গান্ধী ষ্টেডিয়ামত অনুষ্ঠিত মহিলাৰ ৫৩ কেজি ওজনৰ শ্ৰেণীৰ নিৰ্বাচনী ট্ৰায়েলৰ ছেমি ফাইনেলত তেওঁ মীনাৰ্ক্সীৰ হাতত ৪-৬ ব্যৱধানত পৰাস্ত হয় । এই পৰাজয়ৰ লগে লগে এছিয়ান গেমছৰ বাবে যোগ্যতা অৰ্জন কৰাৰ আশা সমাপ্ত হ’ল হাৰিয়ানাৰ এইগৰাকী মল্লযোদ্ধাৰ ।

ট্ৰায়েলত কি ঘটিছিল ?

দিনটোৰ আৰম্ভণিতে ফোগাটৰ প্ৰদৰ্শন যথেষ্ট আশাব্যঞ্জক আছিল । তেওঁ নিজৰ প্ৰথমখন বাউটত জ্যোতিৰ বিৰুদ্ধে ৭-১ স্কোৰৰ এক শক্তিশালী জয় সাব্যস্ত কৰিছিল । ইয়াৰ পিছত দ্বিতীয় বাউটত তেওঁ নিশুক পৰাস্ত কৰি আত্মবিশ্বাস প্ৰদৰ্শন কৰিছিল । অৱশ্যে, ছেমি ফাইনেলত মীনাৰ্ক্সীৰ বিৰুদ্ধে তীব্ৰ প্ৰতিদ্বন্দ্বিতা আগবঢ়ালেও শেষৰ হাঁহি মাৰিব নোৱাৰিলে ফোগাটে ।

বিতৰ্ক আৰু আইনী যুঁজ-

উল্লেখ্য যে এই নিৰ্বাচনী ট্ৰায়েলত অংশগ্ৰহণ কৰিবলৈ ভিনেশ ফোগাটে এক দীঘলীয়া আইনী যুঁজৰ সন্মুখীন হ’ব লগা হৈছিল । ভাৰতীয় মল্লযুঁজ ফেডাৰেশ্যনে (WFI) তেওঁৰ অংশগ্ৰহণক প্ৰত্যাহ্বান জনাই উচ্চতম ন্যায়ালয়ৰ কাষ চাপিছিল যদিও উচ্চ ন্যায়ালয়ে পূৰ্বে তেওঁক ট্ৰায়েলত অংশ লোৱাৰ অনুমতি প্ৰদান কৰিছিল ।

ন্যায়ালয়ৰ নিৰ্দেশ অনুসৰি, সমগ্ৰ ট্ৰায়েল প্ৰক্ৰিয়াটো ভিডিঅ’ ৰেকৰ্ডিং কৰাৰ লগতে ভাৰতীয় অলিম্পিক সন্থা (IOA) আৰু ভাৰতীয় ক্ৰীড়া প্ৰাধিকৰণৰ (SAI) নিৰপেক্ষ পৰ্যবেক্ষকৰ উপস্থিতিত পৰিচালনা কৰা হৈছিল । পৰ্যবেক্ষক হিচাপে উপস্থিত আছিল আইঅ’এ-ৰ অদিতি চৌহান আৰু এছএআই-ৰ এম এম সোমাইয়া ।

ইপিনে, WFI-এ দাখিল কৰা আবেদনৰ শুনানি অহা ১ জুন, সোমবাৰে পুনৰ উচ্চতম ন্যায়ালয়ত অনুষ্ঠিত হ’ব । যদিও ট্ৰায়েলৰ ফলাফল ইতিমধ্যে নিৰ্ধাৰিত হৈছে, তথাপিও এই সমগ্ৰ আইনী প্ৰক্ৰিয়াটোৱে ক্ৰীড়া মহলত চৰ্চা লাভ কৰিছে ।

লগতে পঢ়ক : আই পি এলৰ পিছত ক্ৰিকেটৰ পৰৱৰ্তী যাত্ৰাৰ বাবে সাজু ‘বেবী বছ’