এই সংগ্ৰহালয়টোৱে ঐতিহাসিক বৃন্দাবনী বস্ত্ৰ সংৰক্ষণ কৰিব, যি এই পবিত্ৰ বস্ত্ৰ অসমলৈ ওভতাই অনাৰ দিশত ৰাজ্য চৰকাৰৰ এক গুৰুত্বপূৰ্ণ পদক্ষেপ হিচাপে বিবেচিত হৈছে ।

মুখ্যমন্ত্ৰী ড০ হিমন্ত বিশ্ব শৰ্মাই ২২ ফেব্ৰুৱাৰী, দেওবাৰে খনাপাৰাত এটা উৎসৰ্গিত সাংস্কৃতিক সংগ্ৰহালয়ৰ আধাৰশিলা স্থাপন কৰে । এই সংগ্ৰহালয়টোৱে ঐতিহাসিক বৃন্দাৱনী বস্ত্ৰ সংৰক্ষণ কৰিব, যি এই পবিত্ৰ বস্ত্ৰ অসমলৈ ওভতাই অনাৰ দিশত ৰাজ্য চৰকাৰৰ এক গুৰুত্বপূৰ্ণ পদক্ষেপ হিচাপে বিবেচিত হৈছে ।

চৰকাৰী জ্যেষ্ঠ বিষয়া, ৰাজ্যৰ বিশিষ্ট সাংস্কৃতিক ব্যক্তিত্ব আৰু জনসাধাৰণৰ উপস্থিতিত সাংস্কৃতিক সংগ্ৰহালয় প্ৰকল্পৰ এই ভূমি পূজন আৰু আনুষ্ঠানিক শুভাৰম্ভ অনুষ্ঠান সম্পন্ন হয় ।

উল্লেখ্য যে,বৃন্দাবনী বস্ত্ৰ হৈছে ১৬ শতিকাৰ মহাপুৰুষ শ্রীমন্ত শংকৰদেৱৰ এক মহান সৃষ্টি । এই বস্ত্ৰত ভগৱান শ্ৰীকৃষ্ণৰ জীৱনৰ বিভিন্ন দৃশ্য অংকন কৰা হৈছে আৰু ইয়াক অসমৰ বয়ন শিল্প তথা ভক্তি কলাৰ এক উৎকৃষ্ট নিদৰ্শন বুলি গণ্য কৰা হয় । ই ৰাজ্যবাসীৰবাবে অতি পবিত্ৰ আৰু এক আবেগ । বৰ্তমান ৰাজ্যৰ বাহিৰত সংৰক্ষিত হৈ থকা এই বস্ত্ৰই অসমৰ বাবে অপৰিসীম ঐতিহাসিক, ধৰ্মীয় আৰু শৈল্পিক গুৰুত্ব বহন কৰে ।

এইসভাত ভাষণ প্ৰদান কৰি মুখ্যমন্ত্ৰীগৰাকীয়ে কয় যে গুৱাহাটীত এক বিশ্বমানৰ সংগ্ৰহালয় নিৰ্মাণ কৰিলে এই পবিত্ৰ বস্ত্ৰ আন্তঃৰাষ্ট্ৰীয় সংৰক্ষণ মানদণ্ড অনুসৰি এক সুৰক্ষিত আৰু জলবায়ু-নিয়ন্ত্ৰিত পৰিৱেশত প্ৰদৰ্শন কৰাটো নিশ্চিত হ’ব । তেওঁ লগতে কয় যে এই পদক্ষেপে অসমৰ সভ্যতাৰ ঐতিহ্য পুনৰুদ্ধাৰ আৰু সংৰক্ষণৰ প্ৰতি ৰাজ্যখনৰ দায়বদ্ধতাকে প্ৰতিফলিত কৰে ।

প্ৰকল্পৰ বিশেষত্ব-

-সংগ্ৰহালয়টোত আধুনিক আৰ্কাইভেল সুবিধা থাকিব ।

-প্ৰদৰ্শনী কক্ষ আৰু ব্যাখ্যা কেন্দ্ৰৰ জৰিয়তে দৰ্শনাৰ্থীসকলক এই বস্ত্ৰৰ সৈতে জড়িত আৰ্থ-সামাজিক তথা আধ্যাত্মিক উত্তৰাধিকাৰৰ বিষয়ে অৱগত কৰা হ’ব ।

-এই প্ৰকল্পই সাংস্কৃতিক পৰ্যটনৰ বিকাশ ঘটোৱাৰ লগতে অসমৰ বৈষ্ণৱ পৰম্পৰা সম্পৰ্কে সজাগতা বৃদ্ধি কৰিব বুলি আশা কৰা হৈছে ।

চৰকাৰে পুনৰ দোহাৰে যে বৃন্দাৱনী বস্ত্ৰ ওভতাই অনাৰ প্ৰক্ৰিয়া অব্যাহত আছে আৰু এই আধাৰশিলা স্থাপন অনুষ্ঠানক ৰাজ্যখনৰ অন্যতম অমূল্য ঐতিহাসিক সম্পদৰ সৈতে পুনৰ সংযোগ স্থাপনৰ এক মাইলৰ খুঁটি বুলি অভিহিত কৰে ।

লগতে পঢ়ক : নতুন ৰাজনৈতিক জীৱনৰ বহুত বহুত শুভেচ্ছাঃ ভূপেন বৰাক বিজেপিলে আদৰণি জনালে মুখ্যমন্ত্ৰী হিমন্ত বিশ্ব শৰ্মাই