অহা ১ জুলাইৰ পৰা অসমত যাত্ৰীবাহী বাহনৰ ভাড়া অস্বাভাৱিকভাৱে বৃদ্ধি পোৱাৰ সম্ভাৱনা প্ৰকট হৈ পৰিছে

ৰাজ্যৰ সৰ্বসাধাৰণ যাত্ৰীৰ বাবে এটা ডাঙৰ খবৰ । অহা ১ জুলাইৰ পৰা অসমত যাত্ৰীবাহী বাহনৰ ভাড়া অস্বাভাৱিকভাৱে বৃদ্ধি পোৱাৰ সম্ভাৱনা প্ৰকট হৈ পৰিছে । ইন্ধনৰ ধাৰাবাহিক মূল্যবৃদ্ধি আৰু যান-বাহন পৰিচালনাৰ খৰচ বৃদ্ধিৰ দোহাই দি ‘অল আছাম মটৰ ট্ৰেন্সপ’ৰ্ট এছ’চিয়েচন’-ই যাত্ৰীবাহী পৰিবহনৰ ভাড়া ৭০ শতাংশ পৰ্যন্ত বৃদ্ধি কৰাৰ কথা ঘোষণা কৰিছে ।

শেহতীয়াকৈ সন্থাই ডিজেলৰ অভাৱনীয় মূল্যবৃদ্ধি আৰু সামগ্ৰিকভাৱে জীৱন ধাৰণৰ ব্যয় বৃদ্ধিৰ ফলত সৃষ্টি হোৱা আৰ্থিক বোজাৰ পৰা পৰিবহন ব্যৱসায়ীসকলক সকাহ দিবলৈ অসমৰ পৰিবহন আয়ুক্তক এখন স্মাৰকপত্ৰ প্ৰদান কৰিছিল । এই স্মাৰকপত্ৰ প্ৰদানৰ পিছতেই এছ’চিয়েচনে ভাড়া বৃদ্ধিৰ এই গুৰুত্বপূৰ্ণ সিদ্ধান্ত গ্ৰহণ কৰিছে ।

২০১১ চনৰ পিছত হোৱা নাই ভাড়াৰ ডাঙৰ সংশোধন

পৰিবহন সন্থাৰ তৰফৰ পৰা জনোৱা হৈছে যে ৰাজ্যত শেষবাৰৰ বাবে ২০১১ চনৰ নৱেম্বৰ মাহত ব্যৱসায়িক বাহনৰ ভাড়া সংশোধন কৰা হৈছিল । সেই সময়ত অসম পৰিবহন বিভাগে ২৫ শতাংশ ভাড়া বৃদ্ধিৰ অনুমোদন দিছিল আৰু ডিজেলৰ মূল্য আছিল প্ৰতি লিটাৰত প্ৰায় ৬৬ টকা । তাৰ পিছৰে পৰা সুদীৰ্ঘ বছৰ ধৰি ইন্ধনৰ মূল্য আকাশলংঘী হোৱাৰ লগতে ক্ৰমবৰ্ধমান মুদ্ৰাস্ফীতি আৰু পৰিচালন ব্যয় বৃদ্ধি পাইছে যদিও ভাড়াৰ কোনো ডাঙৰ সংশোধন হোৱা নাই । ইয়াৰ মাজতো অপাৰেটৰসকলে লোকচান ভৰি সেৱা অব্যাহত ৰাখিবলগীয়া হৈছে বুলি দাবী কৰিছে ।

ব্যৱসায় চলাই নিয়াত তীব্ৰ সংকট

AAMTA-ই উল্লেখ কৰা মতে, কেৱল ইন্ধনৰে নহয়, বৰঞ্চ বাহনৰ স্পেয়াৰ পাৰ্টছ, ৰক্ষণাবেক্ষণ আৰু পৰিবহন সম্পৰ্কীয় অন্যান্য যাৱতীয় খৰচ অভাৱনীয়ভাৱে বৃদ্ধি পাইছে । ইয়াৰ ফলত বৰ্তমানৰ অৰ্থনৈতিক পৰিস্থিতিত বহু পৰিবহন অপাৰেটৰে ব্যৱসায়টো চলাই ৰাখিবলৈ চৰম জীৱন সংগ্ৰাম কৰিবলগীয়া হৈছে ।

নতুন ভাড়াৰ গাঁথনি-

সন্থাই প্ৰস্তাৱ কৰা সংশোধিত ভাড়াৰ গাঁথনি কাৰ্যকৰী হ’লে, অহা ১ জুলাইৰ পৰা বাছৰ সৰ্বনিম্ন ভাড়া বৰ্তমানৰ পৰা বৃদ্ধি পাই ২০ টকা হ’ব ।

চৰকাৰলৈ আহ্বান

পৰিবহন সন্থাই সমগ্ৰ পৰিস্থিতিটো অত্যন্ত গুৰুত্বসহকাৰে ল’বলৈ অসম চৰকাৰক জৰুৰী আহ্বান জনাইছে । তেওঁলোকে স্পষ্ট কৰি দিয়ে যে সমগ্ৰ অসমতে যাত্ৰীবাহী পৰিবহন সেৱা অচল হৈ পৰাৰ পৰা ৰক্ষা কৰিবলৈ আৰু ব্যৱসায়ীসকলক জীয়াই ৰাখিবলৈ এই ভাড়া বৃদ্ধি অপৰিহাৰ্য হৈ পৰিছে । আনহাতে, ৰাজ্যৰ বিভিন্ন পথ আৰু বিভিন্ন শ্ৰেণীৰ বাহনসমূহৰ বিতং সংশোধিত ভাড়াৰ তালিকা অতি শীঘ্ৰেই আনুষ্ঠানিকভাৱে ঘোষণা কৰা হ’ব বুলি সন্থাই জানিবলৈ দিছে ।

লগতে পঢ়ক : গুৱাহাটীত হ’ব ছেটেলাইট চিটী : কেবিনেট বৈঠকত ৰাজ্য চৰকাৰৰ ডাঙৰ সিদ্ধান্ত