ৰাজ্যসভাত ৰাষ্ট্ৰপতিৰ ভাষণৰ ধন্যবাদসূচক প্ৰস্তাৱক লৈ হোৱা আলোচনাৰ সময়ত আজি প্ৰধানমন্ত্ৰী নৰেন্দ্ৰ মোদীয়ে কংগ্ৰেছক আক্ৰমণৰ লক্ষ্য কৰি লয় । বৃহস্পতিবাৰে (৬ ফেব্ৰুৱাৰী, ২০২৫) প্ৰধানমন্ত্ৰী মোদীয়ে কয় যে সবকা সাথ, সবকা বিকাশ তেওঁৰ চৰকাৰৰ মূল মন্ত্ৰ, আনহাতে কংগ্ৰেছৰ মূল মন্ত্ৰ হৈছে পৰিয়াল প্ৰথম । কংগ্ৰেছে এনেধৰণৰ ৰাজনীতিৰ আৰ্হি সৃষ্টি কৰিছে, য’ত মিছা, প্ৰতাৰণা, দুৰ্নীতি, নেপটিজিম আৰু তুষ্টিকৰণৰ মিশ্ৰণ ঘটিছিল বুলিও মন্তব্য কৰে প্ৰধানমন্ত্ৰী মোদিয়ে ।

প্ৰধানমন্ত্ৰীয়ে কয় যে পাঁচ-ছয় দশক ধৰি মানুহৰ হাতত বিকল্প মডেল নাছিল, কিন্তু ২০১৪ চনৰ পিছত দেশে নতুন মডেল দেখা পালে, যিটো তুষ্টিকৰণৰ ওপৰত নহয়, সন্তুষ্টিৰ ওপৰত ভিত্তি কৰি গঢ় লৈ উঠিছে । প্ৰধানমন্ত্ৰী মোদীয়ে কয়, কংগ্ৰেছে ৰাইজক মূৰ্খ সজাই ৰাজনীতি চলাইছিল । বিজেপি নেতৃত্বাধীন চৰকাৰে সম্পদৰ সৰ্বাধিক ব্যৱহাৰৰ ওপৰত গুৰুত্ব আৰোপ কৰিছে ।

প্ৰধানমন্ত্ৰীয়ে কয় যে জীৱন্ত সংবাদ মাধ্যম আৰু গণতন্ত্ৰ থকা এখন দেশে তেওঁক তৃতীয়বাৰৰ বাবে দেশৰ সেৱা কৰাৰ সুযোগ দিছে আৰু সেয়া সম্ভৱ হৈছে কাৰণ জনসাধাৰণে তেওঁৰ উন্নয়নৰ আৰ্হিক পৰীক্ষা কৰি বুজি পাইছে আৰু সমৰ্থন কৰিছে । কংগ্ৰেছক আক্ৰমণ কৰি মোদীয়ে কয় যে তেওঁলোক আনৰ লাইন চুটি কৰাত ব্যস্ত । ইয়াৰ মাজতে প্ৰধানমন্ত্ৰীয়ে নিজৰ চৰকাৰৰ নীতি আৰু জৰুৰীকালীন অৱস্থাৰ বিষয়ত কংগ্ৰেছক আক্ৰমণ কৰে ।

‘বাধ্যত পৰি জয় ভীম কৈছে কংগ্ৰেছে’

প্ৰধানমন্ত্ৰী মোদীয়ে কয়, “কংগ্ৰেছৰ ৰাজপৰিয়ালৰ অৰ্থনৈতিক দুৰ্নীতি আৰু ভুল নীতিৰ বাবে সমগ্ৰ বিশ্বতে সমগ্ৰ দেশক দোষাৰোপ আৰু বদনাম কৰা হৈছিল । কংগ্ৰেছৰ সময়ছোৱাত বিলম্ব কৰাটো তেওঁলোকৰ সংস্কৃতিত পৰিণত হৈছিল । সবকা সাথ সবকা বিকাশ কংগ্ৰেছৰ সৈতে সম্ভৱ নহয় । প্ৰধানমন্ত্ৰী মোদীয়ে কয়, “বাবা চাহেবক কংগ্ৰেছে কেতিয়াও ভাৰতৰত্নৰ যোগ্য বুলি গণ্য কৰা নাছিল । এই দেশৰ জনসাধাৰণে, সমগ্ৰ সমাজে বাবা চাহেবৰ আৱেগক সন্মান কৰিছিল । তাৰ পিছত আজি কংগ্ৰেছে জয় ভীম বুলি ক’বলৈ বাধ্য হৈছে ।”

প্ৰধানমন্ত্ৰীয়ে মোদীয়ে কয়, “কংগ্ৰেছে বাবা চাহেব আম্বেদকাৰক ইমানেই ঘৃণা কৰিছিল, তেওঁৰ বিৰুদ্ধে কংগ্ৰেছত ইমানেই ক্ষোভ আছিল যে তেওঁৰ (বাবা চাহেব) প্ৰতিটো কথাতে বিৰক্ত হৈছিল । ইয়াৰ সকলো নথি-পত্ৰ উপলব্ধ । এই ক্ষোভৰ বাবেই বাবা চাহেবক দুবাৰকৈ পৰাস্ত কৰিবলৈ কি কৰা নহ’ল । নিৰ্বাচনত বাবা চাহেবক পৰাস্ত কৰিবলৈ কি কৰা নাছিল ।”

কংগ্ৰেছৰ পৰা বন্ধু পলাইছে- প্ৰধানমন্ত্ৰী মোদী

প্ৰধানমন্ত্ৰী মোদীয়ে কয় যে আজি কংগ্ৰেছে জাতিবাদৰ বিষ বিয়পাবলৈ চেষ্টা কৰিছে । প্ৰধানমন্ত্ৰীয়ে কয়, “কংগ্ৰেছৰ ৰাজনীতিৰ মন্ত্ৰ সদায় আনৰ সাফল্য চুটি কৰা । ইয়াৰ বাবেই তেওঁলোকে চৰকাৰক অস্থিৰ কৰি তুলিছিল । কোনো ৰাজনৈতিক দলে যদি ক’তো চৰকাৰ গঠন কৰিছিল তেন্তে চৰকাৰক অস্থিৰ কৰি পেলাইছিল । তেওঁলোকে (কংগ্ৰেছে) বাছি লোৱা পথৰ বাবে লোকসভা নিৰ্বাচনৰ পিছত তেওঁলোকৰ লগত থকাসকলো পলাই গৈছে ।”

জৰুৰীকালীন অৱস্থাক লৈ কংগ্ৰেছক তীব্ৰ সমালোচনা কৰে প্ৰধানমন্ত্ৰীয়ে-

ভাষণৰ সময়ত প্ৰধানমন্ত্ৰীয়ে জৰুৰীকালীন অৱস্থাৰ কথাও উল্লেখ কৰি কংগ্ৰেছক লক্ষ্য কৰি কয় যে এই সময়ছোৱাত ক্ষমতাৰ স্বাৰ্থত সংবিধান পদদলিত কৰা হৈছিল । তেওঁ কয় যে জৰুৰীকালীন সময়ত বিখ্যাত অভিনেতা দেৱ আনন্দক ৰাজহুৱাভাৱে সমৰ্থন কৰিবলৈ কোৱা হৈছিল যদিও তেওঁ নাকচ কৰাৰ সময়ত তেওঁৰ সকলো ছবি দূৰদৰ্শনত নিষিদ্ধ কৰা হৈছিল । তেওঁ কয় যে যেতিয়া কিশোৰ কুমাৰে কংগ্ৰেছৰ হৈ গান গাবলৈ অস্বীকাৰ কৰিছিল তেতিয়া তেওঁৰ সকলো গীত অল ইণ্ডিয়া ৰেডিঅ’ত নিষিদ্ধ কৰা হৈছিল ।

প্ৰধানমন্ত্ৰী মোদীয়ে কয়, ‘জৰুৰীকালীন অৱস্থাত জৰ্জ ফাৰ্নাণ্ডেজকে ধৰি দেশৰ বহু মহান ব্যক্তিক হেণ্ডকাফ লগাই শিকলিৰে বান্ধি ৰখা হৈছিল । সংসদৰ সদস্য আৰু দেশৰ বিশিষ্ট নেতাসকলক হাত শিকলিৰে বান্ধি ৰখা হৈছিল । সংবিধান শব্দটো কংগ্ৰেছৰ মুখত খাপ নাখায় । ক্ষমতাৰ স্বাৰ্থত আৰু ৰাজপৰিয়ালৰ অহংকাৰৰ বাবে লাখ লাখ পৰিয়াল ধ্বংস কৰি দেশখন কাৰাগাৰলৈ পৰিণত হৈছিল ।“

আজি (৫ ফেব্ৰুৱাৰী) দিল্লীত বিধানসভা নিৰ্বাচনৰ ভোটগ্ৰহণ অনুষ্ঠিত হৈছে । এইবাৰ বিধানসভা নিৰ্বাচনত বিজেপি, কংগ্ৰেছ আৰু আম আদমী পাৰ্টিয়ে সম্পূৰ্ণ শক্তিৰে ভোট যুদ্ধত অৱতীৰ্ণ হৈছে ।

আজি পুৱা ৭ বজাৰ পৰা দিল্লীৰ সকলো ভোটকেন্দ্ৰতে ভোটগ্ৰহণ আৰম্ভ হৈছে । সন্ধিয়া ৬ বজালৈ ভোটদান কৰিব পাৰিব ৰাইজে । ইফালে ভোটগ্ৰহণৰ পূৰ্বে প্ৰধানমন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহে ৰাইজক বিশেষ আহ্বান জনাইছে ।

প্ৰধানমন্ত্ৰী মোদী আৰু গৃহমন্ত্ৰীৰ আহ্বান-

ছ’চিয়েল মিডিয়াত প্ৰধানমন্ত্ৰী মোদীয়ে লিখিছে, “আজি দিল্লী বিধানসভাৰ নিৰ্বাচনত সকলো আসনৰ বাবে ভোটদান কৰা হ’ব । ভোটাৰসকলক মই গণতন্ত্ৰৰ এই উৎসৱত সম্পূৰ্ণ উৎসাহেৰে অংশগ্ৰহণ কৰি নিজৰ বহুমূলীয়া ভোটদান কৰিবলৈ আহ্বান জনাইছো । এই উপলক্ষে প্ৰথমবাৰৰ বাবে ভোট দান কৰা সকলো যুৱ বন্ধুবৰ্গলৈ মই মোৰ বিশেষ শুভেচ্ছা জনাইছো। মনত ৰাখিব – প্ৰথমে ভোট দিয়ক, তাৰ পিছত জলপান !”

একে সময়তে গৃহমন্ত্ৰী অমিত শ্বাহে কয়, “দিল্লী বিধানসভা নিৰ্বাচনত ভোট দিবলৈ যোৱা মোৰ ভাতৃ-ভগ্নীসকললৈ আহ্বান জনাইছো যে মিছা প্ৰতিশ্ৰুতি, প্ৰদূষিত যমুনা, সুৰাৰ দোকান, ভঙা ৰাস্তা আৰু লেতেৰা পানীৰ বিৰুদ্ধে ভোট দিয়ক । জনকল্যাণৰ এক শক্তিশালী ৰেকৰ্ড আৰু দিল্লীৰ উন্নয়নৰ বাবে এক স্পষ্ট দৃষ্টিভংগী থকা এখন চৰকাৰ সৃষ্টি কৰিবলৈ আজি উৎসাহেৰে ভোট দিয়ক । আপোনাৰ এটা ভোটই দিল্লীক পৃথিৱীৰ আটাইতকৈ উন্নত ৰাজধানী গঢ়ি তুলিব পাৰে । প্ৰথমে ভোট দিয়ক, তাৰ পিছত জলপান খাওক ।”

উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়েও ভোটদানৰ বাবে আবেদন জনায়-

উত্তৰাখণ্ডৰ মুখ্যমন্ত্ৰী পূষ্কৰ সিং ধামীয়েও ৰাইজক ভোটদানৰ আহ্বান জনাই কয় যে, “মই অনুৰোধ কৰিছো যে দিল্লীৰ সকলো জনসাধাৰণে ঘৰৰ পৰা ওলাই আহি বৃহৎ সংখ্যক ভোটদান কৰক আৰু দিল্লীত দুৰ্নীতিগ্ৰস্ত ব্যৱস্থাৰ সমাপ্তিৰ ক্ষেত্ৰত তেওঁলোকৰ অমূল্য ভূমিকা পালন কৰিবলৈ অনুৰোধ জনাইছো ।”

ইফালে নতুন দিল্লী বিধানসভা সমষ্টিৰ কংগ্ৰেছ প্ৰাৰ্থী সন্দীপ দীক্ষিতে কয় যে, “প্ৰতিটো নিৰ্বাচন গুৰুত্বপূৰ্ণ । এতিয়া মই ভোট দিবলৈ যাম । আশা কৰোঁ সকলোৱে ওলাই আহি ভোট দিব ।”

বুধবাৰে প্ৰয়াগৰাজৰ মহাকুম্ভ মেলা পৰিদৰ্শন কৰিব প্ৰধানমন্ত্ৰী নৰেন্দ্ৰ মোদীয়ে । বুধবাৰে সংগমত স্নান কৰাৰ পাছত প্ৰধানমন্ত্ৰী নৰেন্দ্ৰ মোদীয়ে গংগা পূজা কৰিব । প্ৰায় দুঘণ্টা ধৰি প্ৰয়াগৰাজত থাকিব তেওঁ । প্ৰধানমন্ত্ৰীগৰাকীৰ আগমনৰ প্ৰস্তুতি আৰম্ভ কৰিছে মেলা প্ৰশাসনে । মহাকুম্ভ চহৰত শিবিৰ পাতিছে নিৰাপত্তা সংস্থাই ।

অৰাল অঞ্চলত তেওঁৰ সুৰক্ষাৰ বাবে বিশেষ সতৰ্কবাণী জাৰি কৰা হৈছে । প্ৰধানমন্ত্ৰীৰ আগমনৰ বাবে মোতায়েন কৰা হৈছে ৫টা খণ্ডৰ দণ্ডাধীশ । ২০২৪ চনৰ ১৩ ডিচেম্বৰত প্ৰয়াগৰাজলৈ আহি প্ৰধানমন্ত্ৰী মোদীয়ে ৫৫০০ কোটি টকাৰ ১৬৭টা প্ৰকল্পৰ কথা ঘোষণা কৰিছিল ।

প্ৰধানমন্ত্ৰীৰ কাৰ্যসূচী চলি থকা অঞ্চলসমূহ এন এছ জিয়ে দখল কৰিছে । দণ্ডাধীশৰ লগতে বৃহৎ সংখ্যক আৰক্ষী, পি এ চি আৰু আৰ এ এফৰ জোৱান নিয়োগ কৰা হৈছে । গংগা ঘাটসমূহৰ নিৰাপত্তা বৃদ্ধি কৰা হৈছে । মহানগৰীৰ পৰা কুম্ভ চহৰলৈ সন্দেহযুক্ত লোকৰ তালাচী অব্যাহত আছে ।

মুখ্যমন্ত্ৰী আদিত্যনাথৰ লগতে ৰাজ্য চৰকাৰৰ কেইবাজনো মন্ত্ৰীয়েও প্ৰধানমন্ত্ৰীক সংগ দিব । মেলাৰ বিষয়া বিজয় কিৰণ আনন্দই কয় যে প্ৰধানমন্ত্ৰীৰ কাৰ্যসূচীৰ সকলো প্ৰস্তুতি সম্পূৰ্ণ হৈছে । পাঁচজন দণ্ডাধীশ আৰু বৃহৎ সংখ্যক আৰক্ষী বাহিনী মোতায়েন কৰা হৈছে । প্ৰধানমন্ত্ৰীয়ে সংগমত স্নান কৰি গংগাক পূজা কৰিব ।

২০১৯ চনৰ কুম্ভত অংশগ্ৰহণ কৰিছিল প্ৰধানমন্ত্ৰী মোদীয়ে-

পি এম অ’ই কয় যে ভাৰতৰ আধ্যাত্মিক আৰু সাংস্কৃতিক ঐতিহ্যৰ প্ৰসাৰ আৰু সংৰক্ষণৰ প্ৰতি থকা প্ৰতিশ্ৰুতি অনুসৰি প্ৰধানমন্ত্ৰীয়ে তীৰ্থস্থানত আন্তঃগাঁথনি আৰু সা-সুবিধা বৃদ্ধিৰ বাবে নিৰন্তৰ সক্ৰিয় পদক্ষেপ গ্ৰহণ কৰিছে । ইয়াৰ পূৰ্বে ২০২৪ চনৰ ১৩ ডিচেম্বৰত প্ৰয়াগৰাজ ভ্ৰমণৰ সময়ত প্ৰধানমন্ত্ৰীয়ে সাধাৰণ জনতাৰ সংযোগ, সুবিধা আৰু সেৱাৰ উন্নতিৰ বাবে ৫৫০০ কোটি টকাৰ ১৬৭টা উন্নয়নমূলক প্ৰকল্প উদ্বোধন কৰিছিল বুলি বিবৃতিটোত উল্লেখ কৰা হৈছে । ইয়াৰ পূৰ্বে ২৪ ফেব্ৰুৱাৰীত ২০১৯ চনৰ কুম্ভ মেলাৰ সময়ত তেওঁ গংগাত স্নান কৰি চাফাই কৰ্মীৰ ভৰি ধুইছিল ।

দিল্লী বিধানসভা নিৰ্বাচনী প্ৰচাৰ শেষ হোৱাৰ পূৰ্বে সকলো দলে ভোটাৰৰ মন জয় কৰিবলৈা যৎপৰোনাস্তি চেষ্টা কৰিছে । প্ৰধানমন্ত্ৰী নৰেন্দ্ৰ মোদীয়ে দেওবাৰে আৰ কে পুৰমত এক সভা অনুষ্ঠিত কৰে । ইয়াত তেওঁ কয়, ‘দিল্লীত এটাও বস্তি ভঙা নহ’ব ।’ দৰাচলতে বিগত কেইবাদিনো ধৰি অৰবিন্দ কেজৰিৱালে ৰাজহুৱা সভাত অভিযোগ উত্থাপন কৰি আহিছে যে বিজেপি ক্ষমতালৈ আহিলে বস্তিবোৰ ভাঙি পেলাব । এইবাৰ দিল্লী বিধানসভা নিৰ্বাচনত বস্তিৰ বিষয়টো বহু চৰ্চিত হৈছে ।

এই সমাৱেশত প্ৰধানমন্ত্ৰী মোদীয়ে কয় যে দিল্লীত এটাও বস্তি ভঙা নহ’ব । তেওঁ কয় যে দিল্লীত কোনো জনকল্যাণমূলক আঁচনি বন্ধ নহয় ৷ আমি আপৰ দৰে কেৱল ঘোষণাৰ স্বাৰ্থত ঘোষণা নকৰো, বাজেটতো তাৰ ব্যৱস্থা কৰোঁ ।

‘দিল্লীত এটাও বস্তি নাভাগে’

প্ৰধানমন্ত্ৰীয়ে কয়, ‘এই ‘আপ-দা’ সকলে উৰাবাতৰি বিয়পাইছে কিন্তু মনত ৰাখিব, দিল্লীত এটা বস্তিও নাভাগে । কোনো জনকল্যাণমূলক আঁচনি বন্ধ নহয় । পূৰ্বাঞ্চল আৰু বিহাৰৰ ভাই-ভনীৰ পৰা বাৰ্তা পাইছোঁ । তেওঁলোকৰ বাৰ্তা আহি আছে কাৰণ মোদী পূৰ্বাঞ্চলৰ সাংসদ হিচাবে ক্ষমতালৈ আহিছে ।‘

তেওঁ কয়, ‘কভিডৰ নামত মোৰ পূৰ্বাঞ্চলৰ ভাই-ভনীক দিল্লীৰ পৰা খেদি পঠিওৱা হৈছে । পূৰ্বাঞ্চল আৰু বিহাৰৰ ৰাইজক সহায় কৰি যাব বিজেপি চৰকাৰে । এইবাৰৰ বাজেট মধ্যবিত্ত শ্ৰেণীৰ বাবে বন্ধুত্বপূৰ্ণ বাজেট ।‘

ইমান ডাঙৰ সকাহ কেতিয়াও পোৱা নাই”

প্ৰধানমন্ত্ৰী মোদীয়ে কয়, ‘বছৰত ১২ লাখ টকা উপাৰ্জন কৰা মানুহে ইমান ডাঙৰ সকাহ কেতিয়াও পোৱা নাই । নেহৰুৰ দিনত যদি আপুনি ১২ লাখ টকা উপাৰ্জন কৰিছিল তেন্তে চৰকাৰে আপোনাৰ উপাৰ্জনৰ এক চতুৰ্থাংশ ঘূৰাই ল’ব । ইন্দিৰা গান্ধীৰ চৰকাৰত ১২ লাখ টকা উপাৰ্জন কৰিলে ১০ লাখ টকা পৰ্যন্ত দিব লাগিব । ১০-১২ বছৰ আগলৈকে কংগ্ৰেছ চৰকাৰৰ দিনত ১২ লাখ টকা উপাৰ্জন কৰিলে ২,৬০,০০০ টকা কৰ ঘূৰাই দিব লাগিছিল ।‘

‘ভুলতো ‘আপ-দা’  চৰকাৰ আহিব নালাগে’

প্ৰধানমন্ত্ৰী মোদীয়ে কয়, ‘এইবাৰ দিল্লীত বিজেপি চৰকাৰ গঠন হ’বলৈ গৈ আছে । দিল্লীৰ ‘আপ-দা’ পাৰ্টিয়ে ইয়াত ১১ বছৰ নষ্ট কৰিলে । দিল্লীৰ প্ৰতিটো পৰিয়ালক অনুৰোধ জনাইছো যে মোক দিল্লীবাসীক সেৱা আগবঢ়োৱাৰ সুযোগ দিয়ক । মই নিশ্চয়তা দিছো যে আপোনালোকৰ প্ৰতিটো সমস্যা সমাধানৰ বাবে মই সকলো চেষ্টা কৰিম । দিল্লীৰ সেৱা কৰা, দিল্লীক সুন্দৰ কৰি তোলা চৰকাৰ এখন আমি গঠন কৰিব লাগিব । এতিয়া ভুলতো ইয়ালৈ ‘আপ-দা’ চৰকাৰ আহিব নালাগে ।