শ্ৰীলংকাৰ ৰাষ্ট্ৰপতি অনুৰা কুমাৰ দিছানায়াকে প্ৰধানমন্ত্ৰী নৰেন্দ্ৰ মোদীৰ ভ্ৰমণক গুৰুত্বপূৰ্ণ আখ্যা দিয়ে । তেওঁ কয় যে প্ৰধানমন্ত্ৰী মোদীৰ এই ভ্ৰমণে ভাৰতৰ ‘চুবুৰীয়া প্ৰথম নীতি’ আৰু ‘সাগৰ’ দৃষ্টিভংগীত শ্ৰীলংকাৰ অতি গুৰুত্বপূৰ্ণ ।

দেওবাৰে ৰাষ্ট্ৰপতি দিছানায়াকেৰ কাৰ্যালয়ে এক বিবৃতি প্ৰকাশ কৰে । য’ত কোৱা হৈছে যে প্ৰধানমন্ত্ৰী মোদীৰ এই ভ্ৰমণ ‘শতিকা পুৰণি বন্ধুত্ব আৰু সমৃদ্ধিশালী ভৱিষ্যতৰ প্ৰতি দায়বদ্ধতা’ বিষয়বস্তুৰ ওপৰত আধাৰিত, যি ভাৰত আৰু শ্ৰীলংকাৰ মাজৰ সম্পৰ্ক আৰু অধিক সুদৃঢ় কৰি তুলিছে । বিবৃতিটোত আৰু কোৱা হৈছে যে প্ৰধানমন্ত্ৰী মোদীৰ এই ভ্ৰমণে দুয়োখন দেশৰ অৰ্থনৈতিক, সাংস্কৃতিক আৰু ঐতিহাসিক সম্পৰ্ক আৰু অধিক বৃদ্ধি কৰাৰ লগতে তেওঁলোকৰ বহুমুখী অংশীদাৰিত্বও অধিক শক্তিশালী কৰিছে ।

পাৰস্পৰিক বিকাশ আৰু প্ৰগতিৰ দিশত ভাল ফলাফল পোৱাৰ আশা-

ৰাষ্ট্ৰপতিৰ কাৰ্যালয়ৰ বিবৃতিত আৰু কোৱা হৈছে যে প্ৰধানমন্ত্ৰী মোদীৰ এই ভ্ৰমণে ভাৰতৰ ‘চুবুৰীয়া প্ৰথম নীতি’ আৰু কূটনৈতিক সম্পৰ্কৰ ‘সাগৰ’ দৃষ্টিভংগীত শ্ৰীলংকাৰ গুৰুত্বপূৰ্ণ ভূমিকা প্ৰতিফলিত কৰিছে । প্ৰধানমন্ত্ৰী মোদীৰ এই ভ্ৰমণে ‘পাৰস্পৰিক বিকাশ আৰু প্ৰগতি’ৰ দিশত সহযোগিতামূলক পদক্ষেপৰ ওপৰত ভাল ফলাফল দিব বুলি আশা কৰা হৈছে ।

এই ভ্ৰমণৰ সময়ত কেইবাখনো চুক্তিত স্বাক্ষৰ কৰে প্ৰধানমন্ত্ৰী মোদীয়ে-

উল্লেখ্য যে দেওবাৰে প্ৰধানমন্ত্ৰী মোদীয়ে শ্ৰীলংকা ভ্ৰমণ সম্পূৰ্ণ কৰে । ভ্ৰমণৰ সময়ত তেওঁ ৰাষ্ট্ৰপতি দিছানায়াকেক সাক্ষাৎ কৰি আলোচনাত মিলিত হয় । ইয়াৰ মাজতে দুয়োগৰাকী নেতাই প্ৰতিৰক্ষা, শক্তি আৰু ডিজিটেলাইজেশ্যনৰ দৰে ক্ষেত্ৰত সহযোগিতা বৃদ্ধিৰ বাবেও কেইবাখনো চুক্তিত স্বাক্ষৰ কৰে । ৰাষ্ট্ৰপতি দিছানায়াকেৰ আমন্ত্ৰণত শ্ৰীলংকাত উপস্থিত হৈছিল প্ৰধানমন্ত্ৰী মোদী । ২০১৫ চনৰ পিছত মোদীৰ এয়া চতুৰ্থবাৰৰ বাবে শ্ৰীলংকা ভ্ৰমণ । যোৱা বছৰৰ ছেপ্টেম্বৰ মাহত ৰাষ্ট্ৰপতি নিৰ্বাচনত জয়লাভ কৰাৰ পিছত দিল্লীলৈ শ্ৰীলংকাৰ নেতাগৰাকীয়ে প্ৰথম আনুষ্ঠানিক ভ্ৰমণ কৰিছিল ।

মহাবোধী মন্দিৰ দৰ্শন-

দেওবাৰে ভাৰতলৈ ঘূৰি অহাৰ পূৰ্বে প্ৰধানমন্ত্ৰী মোদীয়ে শ্ৰীলংকাৰ ঐতিহাসিক চহৰ অনুৰাধাপুৰাৰ জয় শ্ৰী মহাবোধী মন্দিৰ দৰ্শন কৰে । বৌদ্ধ মন্দিৰত প্ৰাৰ্থনাও কৰে তেওঁ । এই সময়ছোৱাত অনুৰাধাপুৰাৰ আঠটা মহান বৌদ্ধ তীৰ্থস্থান (আত্মস্থানধিপতি)ৰ মুখ্য বিষয়া পল্লেগামা হেমৰাথন নায়াকে থেৰাৰ সৈতেও তেওঁৰ আন্তৰিক আলোচনা হয় ।

প্ৰধানমন্ত্ৰী নৰেন্দ্ৰ মোদীয়ে আজি তিনিদিনীয়া শ্ৰীলংকা ভ্ৰমণৰ অন্তিম দিনটোত ৰাষ্ট্ৰপতি অনুৰা কুমাৰ দিছানায়কেৰ সৈতে অনুৰাধাপুৰা ভ্ৰমণ কৰি জয় শ্ৰী মহাবোধী মন্দিৰত প্ৰাৰ্থনা কৰে । মন্দিৰত বৌদ্ধ ভিক্ষুৰ পৰা আশীৰ্বাদ লয় প্ৰধানমন্ত্ৰী মোদীয়ে । ইয়াৰ পিছতে প্ৰধানমন্ত্ৰী মোদীয়ে শ্ৰীলংকাৰ উত্তৰ অঞ্চলটোক ৰাজধানী কলম্বোৰ সৈতে সংযোগ কৰা ৰে’ল প্ৰকল্পৰ শুভাৰম্ভ কৰে । এই প্ৰকল্প সম্পূৰ্ণ কৰাৰ ক্ষেত্ৰত ভাৰতে শ্ৰীলংকাক কাৰিকৰী আৰু আৰ্থিক সাহায্য আগবঢ়াইছে । উল্লেখ্য যে ভাৰতৰ প্ৰধানমন্ত্ৰীয়ে শ্ৰীলংকালৈ তিনিদিনীয়া ভ্ৰমণৰ বাবে ৪ এপ্ৰিলৰ সন্ধিয়া ৰাজধানী কলম্বোত উপস্থিত হৈছিল ।

যোৱা বছৰৰ ছেপ্টেম্বৰ মাহত অনুৰা কুমাৰ দিছানায়াকে শ্ৰীলংকাৰ দশম ৰাষ্ট্ৰপতি হিচাপে শপত গ্ৰহণ কৰিছিল । ইয়াৰ পিছত তেওঁ প্ৰথম বিদেশ ভ্ৰমণৰ বাবে ভাৰতক বাছি লৈছিল । একে সময়তে দিছনায়কে ৰাষ্ট্ৰপতি হোৱাৰ পিছত শ্ৰীলংকা ভ্ৰমণ কৰা প্ৰথমজন বিদেশী নেতা প্ৰধানমন্ত্ৰী মোদী । প্ৰধানমন্ত্ৰী নৰেন্দ্ৰ মোদীয়ে আজি অনুৰাধাপুৰাত মহো-অনুৰাধাপুৰা ৰে’লৱে চিগনেলিং চিষ্টেম আৰু মহো-ওমন্থাই ৰে’ল লাইন আনুষ্ঠানিকভাৱে উদ্বোধন কৰে । এই দুয়োটা প্ৰকল্প ভাৰত চৰকাৰৰ সহায়ত প্ৰতিষ্ঠা কৰা হৈছে । প্ৰধানমন্ত্ৰী মোদীৰ ভ্ৰমণৰ সময়ত বিশেষ সদিচ্ছাৰ ইংগিত হিচাপে শ্ৰীলংকাই ১৪ জন ভাৰতীয় মাছমৰীয়াক মুকলি কৰি দিয়ে ।

বিশ্ব ঐতিহ্য সম্পত্তি অনুৰাধাপুৰা-

অনুৰাধাপুৰা এখন বৌদ্ধ তীৰ্থনগৰ আৰু বিশ্ব ঐতিহ্য সম্পত্তি । ইয়াৰ উপৰিও শ্ৰীলংকা, কম্বোডিয়া, লাওছ আৰু ম্যানমাৰৰ প্ৰধান ধৰ্ম থেৰাভাদা বৌদ্ধ ধৰ্মৰ জন্মস্থান । বৌদ্ধ ধৰ্মৰ এই ৰূপ ভাৰত, চীন, বাংলাদেশ, নেপাল আৰু ভিয়েটনামতো প্ৰচলিত । অনুৰাধাপুৰা শ্ৰীলংকাৰ প্ৰাচীন ৰাজধানীও আছিল, যিখন আশীৰ দশকৰ পৰা ইউনেস্ক’ৰ সহযোগত সংৰক্ষিত হৈ আহিছে । শ্ৰীলংকা চৰকাৰে জাফনা আৰু কেণ্ডীৰ লগতে অনুৰাধাপুৰাকো ঐতিহ্যমণ্ডিত চহৰ হিচাপে গঢ়ি তোলাৰ পৰিকল্পনা কৰিছে ।