কেন্দ্ৰীয় গৃহমন্ত্ৰী অমিত শ্বাহে বৃহস্পতিবাৰে প্ৰধানমন্ত্ৰীৰ প্ৰশংসাত পঞ্চমুখ হৈ পৰিছে। তেওঁ কৈছে যে দৰিদ্ৰ পৰিয়ালত জন্ম গ্ৰহণ কৰা স্বত্বেও প্ৰধানমন্ত্ৰী নৰেন্দ্ৰ মোদীয়ে কেতিয়াও কোনো নেতিবাচকতা পোষণ কৰা নাছিল।

তেওঁ দৰিদ্ৰতাক সহানুভূতিলৈ পৰিৱৰ্তন কৰিছিল আৰু জনসাধাৰণৰ কল্যাণৰ বাবে অক্লান্ত পৰিশ্ৰম কৰিছিল। শ্বাহে কয় যে ২০১৪ চনত প্ৰধানমন্ত্ৰী হোৱাৰ পিছত মোডীয়ে গৃহ, শৌচালয়, পানী, গেছ আৰু বিদ্যুৎ সংযোগ, সুলভ মূল্যত ঔষধ আৰু বিনামূলীয়া ৰেচনৰ দৰে বিভিন্ন সুবিধা প্ৰদান কৰি কোটি কোটি দৰিদ্ৰ লোকৰ জীৱন সলনি কৰিছিল।

গুজৰাট ভ্ৰমণলৈ অহা শ্বাহে মেহছানা জিলাৰ মোডীৰ গৃহভূমি ভাদনগৰত তিনিটা গুৰুত্বপূৰ্ণ প্ৰকল্প উদ্বোধন কৰাৰ পিছত এক সমাৱেশক সম্বোধন কৰি এই ভাষণ দিয়ে। এই প্ৰকল্পবোৰৰ ভিতৰত আছে এখন পুনৰ্বিকশিত বিদ্যালয়, য’ত মোডীয়ে প্ৰাৰম্ভিক শিক্ষা লাভ কৰিছিল।

তেওঁ লগতে কয় যে “মনোবিজ্ঞানত, এইটো শিকোৱা হয় যে দৰিদ্ৰতা আৰু বঞ্চনাত ডাঙৰ হোৱা শিশু এটা নেতিবাচকতাৰ দ্বাৰা চালিত হয়।

এনে শিশুৱেও ধ্বংসাত্মক চিন্তা ধাৰণ কৰে আৰু তেওঁলোকে প্ৰতিশোধৰ অনুভূতিৰে ডাঙৰ হয়। কিন্তু, চাহ বিক্ৰেতাৰ পৰিয়ালত জন্ম গ্ৰহণ কৰা মোডীজীয়ে তেওঁৰ দৰিদ্ৰতাক প্ৰয়োজনীয় লোকসকলৰ প্ৰতি সহানুভূতিলৈ ৰূপান্তৰিত কৰিছিল ’’ ।

“যেতিয়া সেই দৰিদ্ৰ শিশুটোৱে ৰাজ্যৰ (মুখ্যমন্ত্ৰী হিচাপে) আৰু তাৰ পিছত দেশৰ শাসনভাৰ গ্ৰহণ কৰিছিল, তেতিয়া তেওঁৰ মনত কেতিয়াও কোনো নেতিবাচকতা নাছিল। তেওঁ সমগ্ৰ দেশৰ দৰিদ্ৰ লোকসকলৰ কল্যাণৰ বাবে কাম কৰিছিল, যাতে আন কোনো শিশুৱে তেওঁ সন্মুখীন হোৱা দৰিদ্ৰতাৰ সন্মুখীন নহয়’’ বুলিও তেওঁ মন্তব্য কৰে।

কেন্দ্ৰীয় মন্ত্ৰীগৰাকীয়ে কয় যে জীৱনৰ প্ৰাৰম্ভিক বছৰবোৰত প্ৰতিকূলতাৰ সন্মুখীন হোৱা স্বত্বেও কেৱল ঈশ্বৰৰ কৃপা আৰু প্ৰতিভাশালী আত্মা থকা শিশুৱেহে কোনো নেতিবাচকতাৰ কথা মনত নপৰাকৈ সমগ্ৰ সমাজৰ কল্যাণৰ কথা ভাবিব পাৰে। ১৮৮৮ চনত নিৰ্মাণ কৰা বিদ্যালয়খন এতিয়া “প্ৰেৰণা কমপ্লেক্স” হিচাপে পুনৰ বিকশিত কৰা হৈছে, যাক শ্বাহে উদ্বোধন কৰিছিল।

বিজেপিৰ প্ৰাক্তন সভাপতিজনে কৈছিল যে মোডীয়ে ২০০১ চনত গুজৰাটৰ মুখ্যমন্ত্ৰী হিচাপে দায়িত্ব গ্ৰহণ কৰাৰ পিছৰে পৰা শিক্ষাক সৰ্বাধিক অগ্ৰাধিকাৰ দিছিল।

“তেওঁৰ প্ৰচেষ্টাৰ বাবে, তেওঁ মুখ্যমন্ত্ৰী হোৱাৰ সময়ত শিশুৰ ড্ৰপআউটৰ হাৰ ৩৭ শতাংশৰ পৰা ২০১৪ চনত মাত্ৰ এক শতাংশলৈ হ্ৰাস পাইছে।  তেওঁ গুজৰাটৰ জনসাধাৰণে সন্মুখীন হোৱা সমস্যাবোৰ জানিবলৈ আৰ এছ এছৰ প্ৰচাৰক (পূৰ্ণ-সময়ৰ স্বেচ্ছাসেৱক) হিচাপে ৰাজ্যখনৰ প্ৰতিটো কোণলৈ ভ্ৰমণ কৰিছিল। মুখ্যমন্ত্ৰী হোৱাৰ পিছত, তেওঁ সেই সকলোবোৰ সমস্যা এটা এটাকৈ সমাধান কৰিছে। ’’