এক আৱেগিক পৰিৱেশত সম্পন্ন হ’ল কেথলিক গীৰ্জাৰ সৰ্বোচ্চ ধৰ্মীয় নেতা পোপ ফ্ৰান্সিছৰ অন্ত্যেষ্টিক্ৰিয়া । শনিবাৰে ভেটিকান চহৰৰ ছেইণ্ট পিটাৰ স্কোৱাৰত পোপৰ অন্ত্যেষ্টিক্ৰিয়া সম্পন্ন হয় । এই অনুষ্ঠানত সমগ্ৰ বিশ্বৰ প্ৰায় ২ লাখ লোক, য’ত ৰাষ্ট্ৰপতি, ৰাজপৰিয়ালৰ সদস্য আৰু সাধাৰণ ভক্তই অংশগ্ৰহণ কৰে ।

ৰঙা কাপোৰ পৰিধান কৰা কাৰ্ডিনেলসকলে কফিনটো কঢ়িয়াই নিয়ে । যেতিয়া কফিনটো চেণ্ট পিটাৰ স্কোৱাৰলৈ নিয়া হয় লগে লগে উপস্থিত সকলোৱে জোৰেৰে হাতচাপৰিৰে পোপক শেষ শ্ৰদ্ধাঞ্জলি জনায় ।

পোপ ফ্ৰান্সিছে নিজেই ‘সাধাৰণ সমাধি’ৰ ইচ্ছা প্ৰকাশ কৰিছিল, গতিকে তেওঁক ভেটিকানৰ ভিতৰত নহয়, ৰোমৰ বাহিৰৰ বেচিলিকা ডি চান্টা মাৰিয়া মাজ’ৰত সমাধিস্থ কৰা হ’ব । ইয়াৰ পূৰ্বে পোপসকলক চেণ্ট পিটাৰ বেচিলিকাত সমাধিস্থ কৰা হৈছিল ।

ইতিমধ্যে বিগত তিনিদিনত ২.৫ লাখৰো অধিক ভক্তই পোপক চাবলৈ ভেটিকান ভ্ৰমণ কৰিছে আৰু শুকুৰবাৰে ৰাজহুৱা দৰ্শনৰ অন্ত পৰাৰ পূৰ্বে তেওঁক শেষবাৰ বাবে দেখা পাই সকলোৱে । ইয়াৰ পিছত পোপৰ কফিনটো আনুষ্ঠানিকভাৱে ছীল কৰা হয় ।

বিশ্ব নেতাসকলৰ উপস্থিতি-

পোপ ফ্ৰান্সিছৰ অন্ত্যেষ্টিক্ৰিয়াত অংশগ্ৰহণ কৰে বিভিন্ন দেশৰ ৫৪জন ৰাষ্ট্ৰপতি আৰু বিশ্বৰ ১২টা ৰাজপৰিয়ালৰ সদস্যই । ইয়াৰ ভিতৰত আছিল আমেৰিকাৰ ৰাষ্ট্ৰপতি ড’নাল্ড ট্ৰাম্প, ভাৰতৰ ৰাষ্ট্ৰপতি দ্ৰৌপদী মুৰ্মু, ব্ৰিটেইনৰ ৰাজকুমাৰ উইলিয়াম, ফ্ৰান্সৰ ৰাষ্ট্ৰপতি ইমানুৱেল মেক্ৰন, স্পেইনৰ ৰজা ফেলিপে ষষ্ঠ আৰু ৰাণী লেটিজিয়া আৰু ব্ৰাজিলৰ ৰাষ্ট্ৰপতি লুলা দা ছিলভা । এই অনুষ্ঠানলৈ এনে বহু নেতাও আহিছিল যিয়ে পোপ ফ্ৰান্সিছৰ মতৰ সৈতে অসন্মতি ব্যক্ত কৰিছিল, কিন্তু এই তেখেতক শেষ শ্ৰদ্ধাঞ্জি জনাবলৈ একত্ৰিত হৈছিল । উল্লেখ্য যে, লেটিন আমেৰিকাৰ পৰা নিৰ্বাচিত হোৱা প্ৰথমজন পোপ পোপ ফ্ৰান্সিছৰ ২১ এপ্ৰিলত ৮৮ বছৰ বয়সত মৃত্যু হৈছিল ।

ভেটিকানৰ প্ৰথমজন লেটিন আমেৰিকান পন্টিফ পোপ ফ্ৰান্সিছৰ সোমবাৰে মৃত্যু হয় । মৃত্যুৰ সময়ত তেওঁৰ বয়স আছিল ৮৮ বছৰ । ফ্ৰান্সিছৰ মৃত্যুৰ পিছত এতিয়া আৰম্ভ হৈছে এক সপ্তাহজোৰা প্ৰক্ৰিয়া য’ত মানুহে তেওঁক শেষবাৰৰ বাবে চাব পাৰিব । প্ৰথমে ভেটিকানৰ বিষয়াসকলে চেণ্ট মাৰ্টা চেপেলত আৰু তাৰ পিছত চেণ্ট পিটাৰছত সাধাৰণ জনতাই তেওঁক শ্ৰদ্ধাঞ্জলি জনাব ।

ইয়াৰ পিছত তেওঁৰ অন্ত্যেষ্টিক্ৰিয়া পৰিচালনা কৰিব কলেজ অৱ কাৰ্ডিনেলছৰ ডীন কাৰ্ডিনেল জিওভানি বাটিষ্টা ৰেই । পোপ ফ্ৰান্সিছৰ ইচ্ছা অনুসৰি চহৰৰ সিপাৰৰ ছেইণ্ট মেৰী মেজৰ বেচিলিকাত সমাধিস্থ কৰা হ’ব তেওঁক । কিন্তু যুগ যুগ ধৰি চেণ্ট পিটাৰ বেচিলিকা বা ইয়াৰ গুহাত মৃত পোপসকলক সমাধিস্থ কৰাটো এটা পৰম্পৰা হৈ আহিছে । কিন্তু পোপ ফ্ৰান্সিছে প্ৰৱৰ্তন কৰা সংস্কাৰৰ ফলত মৃত পোপসকলক ভেটিকানৰ বাহিৰত সমাধিস্থ কৰিব পৰা যায় । এই সংস্কাৰৰ উদ্দেশ্য পোপৰ অন্ত্যেষ্টিক্ৰিয়া এই জগতৰ এজন শক্তিশালী ব্যক্তি হিচাপে নহয়, এজন ধৰ্মগুৰু আৰু প্ৰভু যীশুৰ অনুগামী হিচাপে হোৱাৰ ওপৰত অধিক গুৰুত্ব দিয়া ।

অন্তিম সংস্কাৰত তিনিটা পদ্ধতি পালন কৰা হয়-

-পোপৰ মৃত্যুৰ পিছত মূলতঃ অন্ত্যেষ্টিক্ৰিয়াৰ সৈতে জড়িত তিনিটা গুৰুত্বপূৰ্ণ পদ্ধতি অনুসৰণ কৰা হয় । ভেটিকানৰ স্বাস্থ্য সেৱাৰ মুৰব্বীয়ে মৃতদেহ পৰীক্ষা কৰি মৃত্যুৰ কাৰণ নিৰ্ণয় কৰে আৰু প্ৰতিবেদন প্ৰস্তুত কৰে । মৃতদেহটোক বগা কাপোৰ পিন্ধোৱা হয় । মৃত্যুৰ আনুষ্ঠানিক ঘোষণা নোহোৱালৈকে মৃতদেহটো পোপৰ ব্যক্তিগত চেপেলত ৰখা হয় ।

-পৰম্পৰাৰ পৰিৱৰ্তনৰ বাবে আৰু চাইপ্ৰাছ, কাঁচ আৰু ওক গছৰ দ্বাৰা নিৰ্মিত তিনিটা পৰম্পৰাগত কফিনত মৃতদেহটো ৰখাৰ প্ৰয়োজন নাই । পোপৰ মৃতদেহ এতিয়া কাঠৰ কফিনত ৰখা হৈছে, যাৰ ভিতৰত জিংকৰ কফিন আছে । পোপক ৰঙা চোলা আৰু উলৰ ষ্টোল পিন্ধোৱা হয় । ওচৰতে তেওঁৰ পবিত্ৰ লাঠি ৰখা হয় ।

-যেতিয়া মৃতদেহটো বেচিলিকালৈ অনা হয় তেতিয়া লিটনি অৱ চেণ্টছ গোৱা হয় । অন্ত্যেষ্টিক্ৰিয়াৰ আগদিনা ৰাতি আন জ্যেষ্ঠ কাৰ্ডিনেলৰ উপস্থিতিত কেমাৰলেংগোৰ তত্বাৱধানত কফিনটো বন্ধ কৰি ছীল কৰা হয় । পোপৰ মুখৰ ওপৰত বগা কাপোৰ এখন ৰখা হয় । কফিনটোত পোপ হিচাপে তেওঁৰ কাৰ্যকালত মুদ্ৰাৰে ভৰা এটা বেগ ৰখা হয় । পোপ হিচাপে তেওঁৰ কাৰ্যকালৰ লিখিত বিৱৰণো ৰখা হয় । জিংকৰ কফিন আৰু কাঠৰ কফিনৰ কভাৰ দুয়োটাতে ‘ক্ৰছ’ আৰু পোপৰ প্ৰতীক অংকিত থাকে ।