আমেৰিকাত প্ৰচণ্ড তুষাৰপাতে স্বাভাৱিক জীৱনযাত্ৰা যথেষ্ট ব্যাঘাত জন্মাইছে । বিমান চলাচলো ভয়াৱহভাৱে প্ৰভাৱিত হৈছে ।

উত্তৰ-পূব আমেৰিকাৰ উত্তৰ-পূব অঞ্চলত বৰফ আৰু প্ৰচণ্ড তুষাৰপাতে স্বাভাৱিক জীৱনযাত্ৰা যথেষ্ট ব্যাঘাত জন্মাইছে । শনিবাৰে বেয়া বতৰৰ বাবে অসংখ্য বিমান বাতিল বা পলম হোৱাৰ বাবে বৰদিনৰ পিছত যাত্ৰা কৰা হাজাৰ হাজাৰ ভ্ৰমণকাৰী যথেষ্ট অসুবিধাৰ সন্মুখীন হয় । ইয়াৰ মাজতে নিউয়ৰ্ক আৰু নিউ জাৰ্চিত বতৰৰ জৰুৰীকালীন অৱস্থা ঘোষণা কৰা হয় ।

বতৰ বিজ্ঞান কেন্দ্ৰৰ মতে, শনিবাৰে পুৱা সমগ্ৰ নিউয়ৰ্ক, নিউ জাৰ্চি, কানেকটিকাট আৰু ইয়াৰ আশে-পাশে থকা অঞ্চলত বৰফ আৰু প্ৰচণ্ড তুষাৰপাত হয় । বিপদজনক পৰিস্থিতিৰ বাবে পথলৈ নোলাবলৈ পৰামৰ্শ দিছে প্ৰশাসনে ।

সাৱধানতা অৱলম্বন কৰাৰ আহ্বান-

নিউয়ৰ্কৰ গৱৰ্ণৰ কেথী হোচুলে কয় যে, “নিউয়ৰ্কৰ লোকসকলৰ সুৰক্ষা মোৰ শীৰ্ষ অগ্ৰাধিকাৰ । এই দুৰ্যোগৰ সময়ত সকলোকে অত্যন্ত সাৱধান হ’বলৈ আহ্বান জনাইছো ।”

নেচনেল ৱেদাৰ চাৰ্ভিচৰ (NWS) তথ্য অনুসৰি চেণ্ট্ৰেল নিউয়ৰ্কত, চিৰাকিউজৰ পৰা লং আইলেণ্ডলৈকে ৬ৰ পৰা ১০ ইঞ্চি (১৫ৰ পৰা ২৫ চেণ্টিমিটাৰ) বৰফ পৰিছে । নিউয়ৰ্ক চহৰত নিশাটোৰ ভিতৰত ২ৰ পৰা ৪ ইঞ্চি বৰফ পৰিছিল, চেণ্ট্ৰেল পাৰ্কত ৪.৩ ইঞ্চি বৰফ পৰিছিল, যিটো ২০২২ চনৰ পিছত সৰ্বাধিক ।

বিমান চলাচল ভয়াৱহভাৱে প্ৰভাৱিত-

তুষাৰপাত কমিছে যদিও ভ্ৰমণকাৰীৰ ওপৰত ইয়াৰ প্ৰভাৱ স্পষ্টকৈ দেখা গৈছে । ফ্লাইট ট্ৰেকিং ৱেবছাইট ফ্লাইটএৱেৰৰ মতে, শনিবাৰে পুৱালৈকে আমেৰিকাৰ ভিতৰত ১৪,৪০০ৰো অধিক ঘৰুৱা বিমান বাতিল বা পলম হয় । নিউয়ৰ্ক অঞ্চলৰ প্ৰধান বিমানবন্দৰ, জন এফ কেনেডি আন্তঃৰাষ্ট্ৰীয় বিমানবন্দৰ, লাগাৰ্ডিয়া বিমানবন্দৰ আৰু নেৱাৰ্ক লিবাৰ্টি আন্তঃৰাষ্ট্ৰীয় বিমানবন্দৰ আদি আটাইতকৈ বেছি ক্ষতিগ্ৰস্ত হয় ।

ইয়াৰ উপৰিও আমেৰিকালৈ অহা-যোৱা কৰা প্ৰায় ২১০০খন আন্তঃৰাষ্ট্ৰীয় বিমানো বাতিল কৰা হৈছে ।

আমেৰিকান এয়াৰলাইন্স, ইউনাইটেড এয়াৰলাইন্স আৰু জেটব্লু এয়াৰৱেজে বতৰৰ ফলত প্ৰভাৱিত ভ্ৰমণৰ বাবে পুনৰ বুকিঙৰ বাবে পৰিৱৰ্তন মাচুল ৰেহাই দি ভ্ৰমণকাৰীসকলক সকাহ প্ৰদান কৰিছে ।

লগতে পঢ়ক : বাংলাদেশত অব্যাহত আছে সংখ্যালঘুৰ বিৰুদ্ধে হিংসা… আন এজন হিন্দু যুৱকক বৰ্বৰ হত্যা