প্ৰধানমন্ত্ৰী মোদীলৈ নামিবিয়াৰ সৰ্বোচ্চ সন্মান

নামিবিয়াই প্ৰধানমন্ত্ৰী নৰেন্দ্ৰ মোদীক সৰ্বোচ্চ অসামৰিক সন্মানেৰে সন্মানিত কৰিছে । বুধবাৰে প্ৰধানমন্ত্ৰী মোদীক নামিবিয়াৰ সৰ্বোচ্চ অসামৰিক সন্মান ‘অৰ্ডাৰ অৱ দ্য মষ্ট এনচিয়েণ্ট ৱেলৱিটচিয়া মিৰাবিলিছ’ প্ৰদান কৰা হয় । ২০১৪ চনৰ মে’ মাহত প্ৰধানমন্ত্ৰী মোদীয়ে কাৰ্যভাৰ গ্ৰহণ কৰাৰ পিছত এয়া বিদেশী চৰকাৰে তেওঁক দিয়া ২৭ সংখ্যক আন্তঃৰাষ্ট্ৰীয় সন্মান । ইয়াৰ পূৰ্বে প্ৰধানমন্ত্ৰী নৰেন্দ্ৰ মোদী আৰু ৰাষ্ট্ৰপতি নন্দি-নদৈতৱাই দ্বিপাক্ষিক আলোচনাত মিলিত হয়, তাৰ পিছত শক্তি আৰু স্বাস্থ্যসেৱাকে ধৰি কেইবাটাও ক্ষেত্ৰত দ্বিপাক্ষিক সহযোগিতা বৃদ্ধিৰ বাবে দুয়োখন দেশে চাৰিখন চুক্তিত স্বাক্ষৰ কৰে ।

ৰাষ্ট্ৰপতি ড০ নেটুম্বো নন্দি-ন্দৈতৱাহে কয় যে নামিবিয়াৰ সংবিধানে মোৰ ওপৰত দিয়া ক্ষমতাৰ অধীনত ভাৰতৰ প্ৰধানমন্ত্ৰী নৰেন্দ্ৰ মোদীক নামিবিয়া আৰু বিশ্বজুৰি শান্তি আৰু ন্যায়ৰ প্ৰসাৰৰ ক্ষেত্ৰত উল্লেখযোগ্য অৱদান আগবঢ়োৱাৰ বাবে ‘অৰ্ডাৰ অৱ দ্য মষ্ট এনচিয়েণ্ট ৱেলৱিটচিয়া মিৰাবিলিছ’ প্ৰদান কৰি সন্মানিত হৈছো ।

‘১৪০ কোটি ভাৰতীয়ৰ হৈ এই সন্মান বিনম্ৰতাৰে গ্ৰহণ কৰো’

সন্মানিত হোৱাৰ পাছত প্ৰধানমন্ত্ৰী নৰেন্দ্ৰ মোদীয়ে কয়, ‘এই বঁটাৰে সন্মানিত হোৱাটো মোৰ বাবে অপৰিসীম গৌৰৱ আৰু সন্মানৰ বিষয় । ৰাষ্ট্ৰপতি, নামিবিয়া চৰকাৰ আৰু দেশখনৰ জনসাধাৰণৰ প্ৰতি আন্তৰিক কৃতজ্ঞতা জ্ঞাপন কৰিছো । ১৪০ কোটি ভাৰতীয়ৰ হৈ এই সন্মান বিনম্ৰতাৰে গ্ৰহণ কৰো ।

প্ৰধানমন্ত্ৰী মোদীয়ে কয়, ‘এয়া ভাৰত আৰু নামিবিয়াৰ বন্ধুত্বৰ সাক্ষ্য । আজি ইয়াৰ লগত জড়িত হৈ মই অত্যন্ত গৌৰৱ অনুভৱ কৰিছো । এই সন্মান নামিবিয়া আৰু ভাৰতৰ জনসাধাৰণ, তেওঁলোকৰ অবিৰত প্ৰগতি আৰু বিকাশ আৰু আমাৰ অবিচ্ছেদ্য বন্ধুত্বৰ প্ৰতি উৎসৰ্গা কৰিছো । এজন প্ৰকৃত বন্ধুক কঠিন সময়তহে চিনি পোৱা যায় । ভাৰত আৰু নামিবিয়াই স্বাধীনতা সংগ্ৰামৰ পৰাই কাষত থিয় দিছে । আমাৰ বন্ধুত্ব কেৱল ৰাজনীতিৰ পৰা উদ্ভৱ হোৱা নাই, সংগ্ৰাম, সহযোগিতা আৰু পাৰস্পৰিক বিশ্বাসৰ পৰাও উদ্ভৱ হৈছে । ইয়াক গণতান্ত্ৰিক মূল্যবোধ আৰু উজ্জ্বল ভৱিষ্যতৰ সপোনেৰে লালন-পালন কৰা হৈছে । ভৱিষ্যতেও আমি উন্নয়নৰ পথত ইখনে সিখনৰ হাতত ধৰি আগবাঢ়ি যাম ।’

লগতে পঢ়ক : ‘যিকোনো সময়তে ড’নাল্ড ট্ৰাম্পক কৰিব পাৰে আক্ৰমণ’; খামেইনীৰ ঘনিষ্ঠই দিলে ধমকি