• June 4, 2026
Facebook-f Instagram Youtube Linkedin-in

মনু ভাকৰ, ডি গুকেশ আৰু এই ৪ গৰাকীলৈ খেলৰত্ন… ৩২ গৰাকীক প্ৰদান কৰা হৈছে অৰ্জুন বঁটা

January 2, 2025 ·

ভাৰত চৰকাৰে মনু ভাকৰ আৰু ডি গুকেশকে ধৰি ৪ গৰাকী খেলুৱৈক খেলৰত্ন বঁটা প্ৰদানৰ সিদ্ধান্ত গ্ৰহণ কৰিছে । আনহাতে ৩২ গৰাকী খেলুৱৈয়ে অৰ্জুন বঁটা লাভ কৰিছে । মনু ভাকৰ আৰু ডি গুকেশৰ উপৰিও হকী খেলুৱৈ হৰমনপ্ৰীত সিং আৰু পেৰা এথলীট প্ৰবীণ কুমাৰকো খেলৰত্ন বঁটা প্ৰদান কৰা হৈছে । ইয়াৰ উপৰিও ৩২ গৰাকী খেলুৱৈয়ে অৰ্জুন বঁটা লাভ কৰিছে ।

যুৱ পৰিক্ৰমা আৰু ক্ৰীড়া মন্ত্ৰালয়ে আজি (২ জানুৱাৰী) ৰাষ্ট্ৰীয় ক্ৰীড়া বঁটা ২০২৪ ঘোষণা কৰে । ২০২৫ চনৰ ১৭ জানুৱাৰী (শুকুৰবাৰ) পুৱা ১১ বজাত ৰাষ্ট্ৰপতি ভৱনত অনুষ্ঠিত হ’বলগীয়া বিশেষ অনুষ্ঠানত বঁটাপ্ৰাপকসকলে ভাৰতৰ ৰাষ্ট্ৰপতিৰ পৰা বঁটা গ্ৰহণ কৰিব । সমিতিৰ পৰামৰ্শৰ ভিত্তিত আৰু যথাযথ নিৰীক্ষণৰ অন্তত চৰকাৰে তলত উল্লেখ কৰা ক্ৰীড়াবিদ, প্ৰশিক্ষক, বিশ্ববিদ্যালয় আৰু প্ৰতিষ্ঠানক বঁটা প্ৰদান কৰাৰ সিদ্ধান্ত লৈছে ।

এই খেলুৱৈসকলে ২০২৪ চনৰ ধ্যানচান্দ খেলৰত্ন বঁটা লাভ কৰিছে-

-গুকেশ ডি (দবা)

-হৰমনপ্ৰীত সিং (হকী)

-প্ৰবীণ কুমাৰ (পেৰা এথলেটিকছ)

-মনু ভাকৰ (শ্বুটিং)

মনু ভাকৰে প্ৰথমে পেৰিছ অলিম্পিকত ১০ মিটাৰ এয়াৰ পিষ্টলত প’ডিয়ামত স্থান লাভ কৰাৰ পিছত ছৰবজোত সিঙৰ সৈতে মিলি ১০ মিটাৰ মিক্সড দলত দ্বিতীয়টো ব্ৰঞ্জৰ পদক লাভ কৰে । এইদৰেই এই মহান ক্ৰীড়া প্ৰতিযোগিতাৰ একেটা অধিবেশনত দুটা পদক লাভ কৰা প্ৰথমগৰাকী ভাৰতীয় খেলুৱৈ হিচাপে পৰিগণিত হয় তেওঁ ।

ডি গুকেশ দবাৰ ইতিহাসৰ আটাইতকৈ কম বয়সীয়া বিশ্ব চেম্পিয়ন হিচাপে পৰিগণিত হয় । ২০২৪ চনত চেন্নাইৰ ১৮ বছৰীয়া গুকেশৰ ৰূপত নতুন আদৰ্শৰ সৃষ্টি হৈছে । ১৪ ৰাউণ্ডৰ খিতাপৰ মেচখনৰ পূৰ্বেও গুকেশক শক্তিশালী প্ৰতিদ্বন্দ্বী হিচাপে গণ্য কৰা হৈছিল, গতিকে হেঁচা অনিবাৰ্য আছিল । ৩য়, একাদশ আৰু ১৪ ৰাউণ্ডত জয়ী হৈ তেওঁ বিশ্ব চেম্পিয়নৰ খিতাপ দখল কৰে ।

পেৰিছ অলিম্পিকত ব্ৰঞ্জৰ পদক লাভ কৰি হৰমনপ্ৰীত সিঙৰ নেতৃত্বত ভাৰতীয় দলটোৱে প্ৰমাণ কৰিলে যে টকিঅ’ গেমছত ব্ৰঞ্জৰ পদক কোনো দুৰ্ঘটনা নাছিল । হৰমনপ্ৰীতে পেৰিছ অলিম্পিকত ১০টা গ’ল দিছিল, যাৰ ভিত্তিত তেওঁক তৃতীয়বাৰৰ বাবে এফ আই এইচৰ বছৰৰ শ্ৰেষ্ঠ পুৰুষ খেলুৱৈ হিচাপে সন্মানিত কৰা হৈছে ।

চাওক অৰ্জুন বঁটা কোনে পালে-

-জ্যোতি ইয়াৰাজী (এথলেটিকছ)

-অন্নু ৰাণী (এথলেটিকছ)

-নীতু (বক্সিং)

-চুইটি (বক্সিং)

-বন্তিকা আগৰৱালা (দবা)

-ছালিমা টেটে (হকী)

-অভিষেক (হকী)

-সঞ্জয় (হকী)

-জৰ্মনপ্ৰীত সিং (হকী)

-সুখজিৎ সিং (হকী)

-ৰাকেশ কুমাৰ (পাৰা আৰ্চাৰী)

-প্ৰীতি পাল (পেৰা এথলেটিকছ)

-জীৱনজী দীপ্তি (পেৰা এথলেটিকছ)

-অজিত সিং (পেৰা এথলেটিকছ)

-শচীন চাৰ্জেৰাও খিলাৰী (পেৰা এথলেটিকছ)

-ধৰমবীৰ (পেৰা এথলেটিকছ)

-প্ৰণৱ সুৰমা (পেৰা এথলেটিকছ)

-এইচ হোকাটো ছেমা (পেৰা এথলেটিকছ)

-ছিমৰান জি (পেৰা এথলেটিকছ)

-নৱদীপ (পেৰা এথলেটিকছ)

-নিতেশ কুমাৰ (পেৰা বেডমিণ্টন)

-থুলাচিমাথি মুৰুগেছান (পাৰা বেডমিণ্টন)

-নিত্য শ্ৰী সুমতী শিৱন (পাৰা বেডমিণ্টন)

-মনীষা ৰামদাস (পাৰা বেডমিণ্টন)

-কপিল পৰমাৰ (পেৰা জুডো)

-মোনা আগৰৱালা (পেৰা শ্বুটিং)

-ৰুবিনা ফ্ৰান্সিছ (পেৰা শ্বুটিং)

-স্বপ্নীল সুৰেশ কুছালে (শ্বুটিং)

-সৰবজোত সিং (শ্বুটিং)

-অভয় সিং (স্কুৱাছ)

-সাজন প্ৰকাশ (সাঁতোৰ)

-আমান (মল্লযুঁজ)

ক্ৰীড়াত অসাধাৰণ প্ৰদৰ্শনৰ বাবে অৰ্জুন বঁটা (জীৱনজোৰা)

-সুচা সিং (এথলেটিকছ)

-মুৰ্লিকান্ত ৰাজাৰাম পেটকাৰ (পেৰা-সাঁতোৰ)

দ্ৰোনাচাৰ্য বঁটা (নিয়মীয়া শ্ৰেণী)

-সুভাষ ৰাণা (পেৰা-শ্বুটিং)

-দীপালী দেশপাণ্ডে (শ্বুটিং)

-সন্দীপ সাংৱান (হকী)

দ্ৰোনাচাৰ্য বঁটা (আজীৱন শ্ৰেণী)

-এছ. মুৰালিথাৰন (বেডমিণ্টন)

-আৰ্মাণ্ডো এগনেলো কোলাকো (ফুটবল)

ৰাষ্ট্ৰীয় ক্ৰীড়া প্ৰচাৰ বঁটা

-ভাৰতীয় শাৰীৰিক শিক্ষা ন্যাস

মৌলানা আবুল কালাম আজাদ ট্ৰফী ২০২৪

-চণ্ডীগড় বিশ্ববিদ্যালয় (সামগ্ৰিক বিজয়ী বিশ্ববিদ্যালয়)

-লাভলী প্ৰফেচনেল ইউনিভাৰ্চিটি, (১ম ৰানাৰ্ছ আপ ইউনিভাৰ্চিটি)

-গুৰু নানক দেৱ বিশ্ববিদ্যালয়, অমৃতসৰ (দ্বিতীয় ৰানাৰ্ছ আপ বিশ্ববিদ্যালয়)

ভাৰতীয় গ্ৰেণ্ডমাষ্টাৰ ডি গুকেশক সাক্ষাৎ প্ৰধানমন্ত্ৰী মোদীৰ, বিশ্ব দবা চেম্পিয়নৰ খিতাপ জয়ৰ বাবে অভিনন্দন

December 28, 2024 ·

প্ৰধানমন্ত্ৰী নৰেন্দ্ৰ মোদীয়ে শনিবাৰে ভাৰতীয় গ্ৰেণ্ডমাষ্টাৰ ডি গুকেশক সাক্ষাৎ কৰি বিশ্ব দবা চেম্পিয়নশ্বিপৰ খিতাপ জয়ৰ বাবে তেওঁক অভিনন্দন জনায় । এই সময়ছোৱাত গুকেশৰ পিতৃ-মাতৃ উপস্থিত আছিল । উল্লেখ্য যে, চলিত মাহত বিশ্ব দবা চেম্পিয়নশ্বিপৰ চতুৰ্দশ আৰু অন্তিম ৰাউণ্ডত চীনৰ ডিং লিৰেনক পৰাস্ত কৰি খিতাপ দখল কৰিছিল গুকেশে । লিৰেনক পৰাস্ত কৰি তেওঁ বিশ্বৰ আটাইতকৈ কম বয়সীয়া দবা চেম্পিয়ন হয় । ১৮ বছৰ বয়সত তেওঁ সৃষ্টি কৰে এই ইতিহাস ।

গুকেশক সাক্ষাৎ কৰে প্ৰধানমন্ত্ৰী মোদীয়ে-

প্ৰধানমন্ত্ৰী বাসগৃহত হোৱা এই সাক্ষাতৰ ছবি শ্বেয়াৰ কৰি মোদীয়ে নিজৰ এক্স  হেণ্ডেলত লিখিছে- দবা চেম্পিয়ন আৰু ভাৰতৰ গৌৰৱ ডি গুকেশৰ সৈতে এক সুন্দৰ বাৰ্তালাপত মিলিত হলো । যোৱা কেইবছৰমানৰ পৰা তেওঁৰ সৈতে ঘনিষ্ঠভাৱে মত বিনিময় কৰি আহিছো, আৰু তেওঁৰ বিষয়ে মোক আটাইতকৈ বেছি আপ্লুত কৰা কথাটো হ’ল তেওঁৰ দৃঢ়তা আৰু নিষ্ঠা । তেওঁৰ আত্মবিশ্বাস সঁচাকৈয়ে প্ৰেৰণাদায়ক । আচলতে কেইবছৰমান পূৰ্বে তেওঁৰ এটা ভিডিঅ’ মনত আছে য’ত তেওঁ কৈছিল যে তেওঁ এতিয়ালৈকে সৰ্বকণিষ্ঠ বিশ্ব চেম্পিয়ন হ’ব– যিটো ভৱিষ্যদ্বাণী এতিয়া তেওঁৰ নিজৰ প্ৰচেষ্টাৰ বাবেই সঁচা হৈছে ।

গুকেশৰ পিতৃ-মাতৃকো সাক্ষাৎ কৰে প্ৰধানমন্ত্ৰী মোদীয়ে

এই সময়ছোৱাত প্ৰধানমন্ত্ৰী মোদীয়ে গুকেশৰ পিতৃ-মাতৃৰ সৈতেও বাৰ্তালাপ কৰে । তেওঁ কয়-প্ৰতিগৰাকী খেলুৱৈৰ সফলতাত তেওঁলোকৰ পিতৃ-মাতৃয়ে গুৰুত্বপূৰ্ণ ভূমিকা পালন কৰে । প্ৰতিটো কঠিন পৰিস্থিতিত গুকেশক পিতৃ-মাতৃয়ে সহায় কৰাৰ বাবে মই শলাগ লৈছিলো । তেওঁৰ এই সমৰ্পণে ক্ৰীড়াক কেৰিয়াৰ হিচাপে লোৱাৰ সপোন দেখা যুৱ আকাংক্ষীৰ অগণন অভিভাৱকক অনুপ্ৰাণিত কৰিব ।

গুকেশে প্ৰধানমন্ত্ৰীক বিশেষ উপহাৰ দিয়ে-

এই বৈঠকত গুকেশেও প্ৰধানমন্ত্ৰী মোদীক বিশেষ উপহাৰ দিয়ে । তেওঁ প্ৰধানমন্ত্ৰীক দবা বৰ্ড উপহাৰ দিয়ে । প্ৰধানমন্ত্ৰীয়ে আৰু লিখিছে – গুকেশৰ পৰা তেওঁ জয়ী হোৱা খেলখনৰ মূল দবা বৰ্ডখনো পাই সুখী হৈছো । তেওঁ আৰু ডিং লিৰেন দুয়োৰে স্বাক্ষৰিত দবা ফলকখন এক বহুমূলীয়া স্মৃতি ।

গুকেশৰ বিজয়ত বিশ্ব দবাৰ মহাশক্তি হিচাপে আত্মপ্ৰকাশ কৰিলে ভাৰতে, ঐতিহাসিক আছিল অলিম্পিয়াডৰ ৬টা স্বৰ্ণ পদক

December 26, 2024 ·

চলিত বছৰটোৰ শেষৰ ফালে বিজয়ৰ উজ্জ্বলতা লৈ দুবাহু মেলি হাঁহি থকা ডি গুকেছৰ প্ৰকাশ পোৱা ছবিখন এক বিলিয়নতকৈও অধিক ভাৰতীয়ৰ স্মৃতিত চিৰদিনৰ বাবে খোদিত হৈ ৰ’ল । ছিংগাপুৰত অনুষ্ঠিত বিশ্ব দবা চেম্পিয়নশ্বিপ মেচত চীনৰ ডিং লিৰেনক পৰাস্ত কৰাৰ ঠিক পিছতে তোলা ছবিসমূহ বিশ্বনাথন আনন্দ যুগৰ পিছত বিশ্ব দবাৰ মানচিত্ৰত ভাৰতৰ উচ্চতা বৃদ্ধি পোৱাৰ সাক্ষ্য ।

২০২৪ চনটো আছিল ভাৰতীয় দবা খেলৰ উত্থানৰ বছৰ যাৰ ব্লুপ্ৰিণ্ট প্ৰস্তুত কৰিছিল আনন্দে । দবাৰ ইতিহাসৰ আটাইতকৈ কম বয়সীয়া বিশ্ব চেম্পিয়ন হিচাপে পৰিগণিত হয় গুকেশ । এই যাত্ৰা আৰম্ভ হৈছিল এপ্ৰিল মাহত FIDE Candidates Tournament ৰ জৰিয়তে । তেওঁ প্ৰতিযোগিতাখনত জয়ী হোৱা আটাইতকৈ কম বয়সীয়া খেলুৱৈ হিচাপে পৰিগণিত হোৱাৰ লগতে ৩২ বছৰীয়া লিৰেনৰ বিৰুদ্ধে বিশ্ব চেম্পিয়নশ্বিপৰ মেচতো যোগ্যতা অৰ্জন কৰে ।

ইয়াৰ পিছত ১৪ ৰাউণ্ডৰ খিতাপৰ মেচখনৰ পূৰ্বেও গুকেশক শক্তিশালী প্ৰতিদ্বন্দ্বী হিচাপে গণ্য কৰা হৈছিল, যাৰ বাবে চাপ বৃদ্ধি হোৱাটো নিশ্চিত আছিল । তৃতীয়, একাদশ আৰু ১৪ ৰাউণ্ডত জয়লাভ কৰি গুকেশে বিশ্ব চেম্পিয়নৰ খিতাপ দখল কৰে । সমগ্ৰ দেশৰ আশাৰ বোজা বহন কৰি গুকেশে এক চমৎকাৰ প্ৰদৰ্শন আগবঢ়ায় । এই কৃতিত্ব তেওঁৰ সহায়ক কৰ্মচাৰীলৈও যায়, য’ত আছিল ভাৰতত দবা বিপ্লৱৰ সূচনা কৰা আনন্দ আৰু প্ৰখ্যাত মানসিক কণ্ডিচনিং প্ৰশিক্ষক পেডী আপটন ।

গুকেশৰ জয়ৰ পূৰ্বে ভাৰতে ছেপ্টেম্বৰ মাহত বুডাপেষ্টত অনুষ্ঠিত হোৱা দবা অলিম্পিয়াডত দলীয় আৰু ব্যক্তিগত শাখাত ৬টাকৈ স্বৰ্ণ পদক লাভ কৰিছিল । পুৰুষৰ দলীয় ফাইনেলত স্লোভেনিয়া আৰু মহিলা শাখাত আজাৰবাইজানক পৰাস্ত কৰে ভাৰতে । একেখন অলিম্পিয়াডতে পুৰুষ আৰু মহিলা দুয়োটা খিতাপ দখল কৰা আন দুখন দেশ হ’ল চীন আৰু পূৰ্বৰ ছোভিয়েট ইউনিয়ন । ব্যক্তিগত শাখাত গুকেশ, অৰ্জুন এৰিগাইছি, দিব্য দেশমুখ আৰু ৱন্তিকা আগৰৱালাই স্বৰ্ণ পদক লাভ কৰে ।

যোৱা বছৰ ২৫০০ ই এল অ’ ৰেটিং অতিক্ৰম কৰা গ্ৰেণ্ডমাষ্টাৰ আৰ প্ৰাজ্ঞানন্দ আৰু আৰ বৈশালীয়ে কেনডিডেটছত খেলা প্ৰথমটো ভাতৃ-ভগ্নী যুটি হিচাপে পৰিগণিত হয় । তেওঁলোক গ্ৰেণ্ডমাষ্টাৰ নৰ্ম লাভ কৰা প্ৰথম ভাতৃ-ভগ্নী । মে’ মাহত নৰৱে চেছত ঘৰুৱা মাটিত ক্লাছিকেল ফৰ্মেটত বিশ্বৰ এক নম্বৰ মেগনাছ কাৰ্লছনক পৰাস্ত কৰিছিল প্ৰজ্ঞানন্দই ।

আনন্দৰ পিছত ২৮০০ ই এল অ’ ৰেটিং মাৰ্ক অতিক্ৰম কৰা দ্বিতীয়জন ভাৰতীয় হিচাপে পৰিগণিত হয় এৰিগাচি । বৰ্তমান তেওঁ কাৰ্লচেন (২৮৩১), ফেবিয়ানো কাৰুয়ানা (২৮০৫) আৰু হিকাৰু নাকামুৰা (২৮০২)ৰ পিছতে ২৮০১ পইণ্টেৰে চতুৰ্থ স্থানত আছে।  ফিডে দলৰ ৰেংকিঙত ভাৰত চতুৰ্থ স্থানত আছে । ভাৰতত ৬৪ জন গ্ৰেণ্ডমাষ্টাৰ আছে আৰু ইয়াৰে অধিকাংশই ২৫ বছৰৰ তলৰ । অহা বছৰ ফ্ৰীষ্টাইল চেছ গ্ৰেণ্ড শ্লেম ট্যুৰ, ফিডে মহিলা জিপি, ফিডে মহিলা বিশ্বকাপ আৰু এছিয়ান চেম্পিয়নশ্বিপত প্ৰত্যাহ্বান জনাব । গতিকে, ছবিখন এতিয়াও বাকী আছে ।

১০ বছৰৰ অপেক্ষাৰ অন্ত ;  বিশ্ব চেম্পিয়ন হোৱাৰ পিছতেই উচুপি উঠিল ডি গুকেশে

December 12, 2024 ·

ভাৰতীয় দবা খেলুৱৈ ডি গুকেশে মাত্ৰ ১৮ বছৰ বয়সতে বিশ্ব দবা চেম্পিয়নশ্বিপ জিকি ইতিহাস ৰচিলে। বৃহস্পতিবাৰে ছিংগাপুৰত অনুষ্ঠিত ফাইনেলত তেওঁ ডিফেণ্ডিং চেম্পিয়ন ডিং লিৰেনক পৰাস্ত কৰি খিতাপ জয় কৰে।

১৪ খন খেলৰ শৃংখলাৰ অন্তিম খন ধ্ৰুপদী খেলত, গুকেশ ৭.৫-৬.৫পইণ্টত বিজয়ী হৈছিল। এই কৃতিত্বৰ সৈতে, গুকেশ বিশ্ব চেম্পিয়ন হোৱা আটাইতকৈ কম বয়সীয়া খেলুৱৈ হয়।

দবা জগতত এক নতুন ইতিহাস ৰচনা কৰা ডি গুকেশে চেম্পিয়ন হোৱাৰ লগে লগে উচুপি উঠে। সদায় শান্ত দেখা খেলুৱৈজনে বিশ্ব চেম্পিয়ন হোৱাৰ পিছত নিজৰ আৱেগ নিয়ন্ত্ৰণ কৰিব নোৱাৰিলে।

বিশ্ব চেম্পিয়নশ্বিপ জয় কৰি ডি গুকেশে কয় যে ‘এইটো এটা সফলতা যিটো সকলোৱে সপোন দেখে, তেওঁ ও দেখিছিল কিন্তু আশা কৰা নাছিল যে তেওঁ ইমান সোনকালে চেম্পিয়ন হ’ব। হয়তো সেইকাৰণেই তেওঁ ৰখাব নোৱাৰিলে চকুপানী ।

ভাৰতৰ ডি গুকেশে বৃহস্পতিবাৰে ফিডে বিশ্ব দবা চেম্পিয়নশ্বিপৰ ফাইনেলত ডিফেণ্ডিং চেম্পিয়ন ডিং লিৰেনক পৰাস্ত কৰে।

ইয়াৰ পূৰ্বৰ অভিলেখটো ৰাছিয়াৰ গেৰী কাস্পাৰোভৰ হাতত আছিল, যিয়ে ২২ বছৰ বয়সত খিতাপ জয় কৰিছিল। পাঁচবাৰ খিতাপ জয় কৰা বিশ্বনাথন আনন্দৰ পিছত গুকেশ হৈছে বিশ্ব দবা চেম্পিয়নশ্বিপৰ খিতাপ জয় কৰা দ্বিতীয়জন ভাৰতীয়।