২০ জানুৱাৰীত আমেৰিকাৰ ৰাজধানী ৱাশ্বিংটনত বিশ্বৰ বিভিন্ন প্ৰান্তৰ বৃহৎ উদ্যোগপতি আৰু বিশ্বৰ নেতাসকলে সমবেত হ’ব । কিয়নো আমেৰিকাৰ নৱনিৰ্বাচিত ৰাষ্ট্ৰপতি ড’নাল্ড ট্ৰাম্পে ২০ জানুৱাৰীত ৰাষ্ট্ৰপতি হিচাপে শপত গ্ৰহণ কৰিব । এই শপত গ্ৰহণ অনুষ্ঠান বহু দিশত বিশেষ হ’ব । শপতগ্ৰহণ অনুষ্ঠানলৈ আমেৰিকাই নিজৰ মিত্ৰ দেশৰ নেতাসকলক আমন্ত্ৰণ জনাইছে । এই নিমন্ত্ৰণ লাভ কৰাসকলৰ ভিতৰত ভাৰতো অন্যতম । একে সময়তে সমগ্ৰ বিশ্বৰ উদ্যোগপতিসকলেও শপতগ্ৰহণ অনুষ্ঠানত অংশগ্ৰহণ কৰিবলৈ অপেক্ষা কৰি আছে । বহু চেলিব্ৰিটিয়ে ভি আই পি পাছ ল’বলৈ যৎপৰোনাস্তি চেষ্টা কৰিছে যাতে তেওঁলোকে নতুন চৰকাৰৰ ওচৰ চাপিবলৈ সুযোগ পায় ।

ভাৰতৰ পৰা উপস্থিত থাকিব বৈদেশিক মন্ত্ৰী ড০ জয়শংকৰ-

ট্ৰাম্পৰ শপত গ্ৰহণ অনুষ্ঠানত ভাৰতক প্ৰতিনিধিত্ব কৰিব বৈদেশিক পৰিক্ৰমা মন্ত্ৰী ড০ এছ জয়শংকৰে । ভাৰতৰ বৈদেশিক মন্ত্ৰালয়ে এই তথ্য দিছে । বৈদেশিক মন্ত্ৰীগৰাকীয়ে আমেৰিকা ভ্ৰমণৰ সময়ত ট্ৰাম্প চৰকাৰৰ আন প্ৰতিনিধিকো সাক্ষাৎ কৰিব পাৰে । অৱশ্যে কোনজন নেতাক সাক্ষাৎ কৰিব সেই সম্পৰ্কে তথ্য দিয়া হোৱা নাই । ভাৰতে নতুন চৰকাৰৰ সৈতেও বছৰ বছৰ ধৰি আমেৰিকাৰ সৈতে সম্পৰ্ক শক্তিশালী কৰাৰ গতি বজাই ৰাখিবলৈ চেষ্টা কৰিছে ।

শপত গ্ৰহণ অনুষ্ঠানত কোন কোন বিশ্ব নেতাই অংশগ্ৰহণ কৰিব-

পৰম্পৰাগতভাৱে আমেৰিকাৰ ৰাষ্ট্ৰপতিৰ শপত গ্ৰহণ অনুষ্ঠানলৈ বিশ্বৰ নেতাসকলক নিমন্ত্ৰণ কৰা নহয় যদিও এইবাৰ ট্ৰাম্পে এই পৰম্পৰা ভংগ কৰিছে । ট্ৰাম্পে ব্যক্তিগতভাৱে চীনৰ ৰাষ্ট্ৰপতি জি জিনপিঙক শপতগ্ৰহণ অনুষ্ঠানত অংশগ্ৰহণ কৰিবলৈ আমন্ত্ৰণ জনাইছে । ট্ৰাম্পৰ প্ৰথম কাৰ্যকালত আমেৰিকা আৰু চীনৰ মাজত প্ৰতিদ্বন্দ্বিতা আছিল বাবেই জিনপিঙক আমন্ত্ৰণ জনোৱাৰ কথা যথেষ্ট চৰ্চা হৈছে । আমেৰিকাই চীনৰ ওপৰত গধুৰ শুল্ক আৰোপ কৰিছিল, যাৰ বাবে দুয়োখন দেশৰ মাজত উত্তেজনা সৃষ্টি হৈছিল । অৱশ্যে জিনপিঙক দ্বিতীয় কাৰ্যকালৰ শপতগ্ৰহণ অনুষ্ঠানলৈ আমন্ত্ৰণ জনাই ট্ৰাম্পে বিভিন্ন বিষয়ত আলোচনা কৰিবলৈ সাজু বুলি ইংগিত দিছে ।

অৱশ্যে জিনপিঙে এতিয়াও ট্ৰাম্পৰ শপত গ্ৰহণ অনুষ্ঠানত অংশগ্ৰহণ কৰাটো নিশ্চিত কৰা নাই আৰু তেওঁৰ ঠাইত চীনৰ উপ-ৰাষ্ট্ৰপতি হান ঝেং বা চীনৰ বৈদেশিক মন্ত্ৰী ৱাং য়িও আমেৰিকালৈ যাব পাৰে বুলিও চৰ্চা চলিছে । চীনৰ ৰাষ্ট্ৰপতিৰ উপৰিও এল ছালভাডৰৰ ৰাষ্ট্ৰপতি নাইব বুকেলে, ইটালীৰ প্ৰধানমন্ত্ৰী জৰ্জিয়া মেলোনি আৰু আৰ্জেণ্টিনাৰ ৰাষ্ট্ৰপতি জেভিয়াৰ মিলীকো আমন্ত্ৰণ জনোৱা হৈছে । অৱশ্যে আন ৰাষ্ট্ৰপতিৰ তথ্য পোহৰলৈ অহা নাই ।

ট্ৰাম্পে বিচাৰে বিশাল অনুষ্ঠান-

আমেৰিকাৰ সংবাদ মাধ্যমৰ বাতৰি অনুসৰি ট্ৰাম্পে বিচাৰে যে তেওঁৰ শপত গ্ৰহণ অনুষ্ঠানটো বিশাল হওক আৰু সমগ্ৰ বিশ্বৰ নেতাসকলে ইয়াত অংশগ্ৰহণ কৰক । শেহতীয়াকৈ ফ্ৰান্সৰ এটা ঐতিহাসিক গীৰ্জা পুনৰ নিৰ্মাণৰ পিছত উদ্বোধনী অনুষ্ঠানত ট্ৰাম্পে অংশগ্ৰহণ কৰিছিল । সেই কাৰ্যসূচীত প্ৰায় ৮০খন দেশৰ নেতা গোট খাইছিল । এতিয়া ট্ৰাম্পে বিচাৰে যে তেওঁৰ শপত গ্ৰহণ অনুষ্ঠানো একেধৰণৰ হওক ।

অভিলেখ সংখ্যক অনুদান-

ট্ৰাম্পৰ শপত গ্ৰহণ অনুষ্ঠানৰ বাবে লাভ কৰিছে অভিলেখ অনুদান । দৰাচলতে নতুন চৰকাৰখনক সন্তুষ্ট কৰিবলৈ বৃহৎ উদ্যোগপতিসকলে শপতগ্ৰহণ অনুষ্ঠানত উপস্থিত থাকিবলৈ বৰঙণি আগবঢ়াইছে । সংবাদ মাধ্যমৰ বাতৰি অনুসৰি এতিয়ালৈকে ১৭ কোটি ডলাৰৰ ধন সংগ্ৰহ কৰা হৈছে আৰু ই ২০ কোটি ডলাৰ অতিক্ৰম কৰাৰ সম্ভাৱনা আছে । বয়িং, মেটা, মাইক্ৰ’ছফ্ট, গুগল আদি ডাঙৰ ডাঙৰ কোম্পানীয়ে বিপুল অনুদান আগবঢ়াইছে ।

২০ জানুৱাৰীত আমেৰিকাৰ ৰাষ্ট্ৰপতি হিচাপে শপত গ্ৰহণ কৰিব ড’নাল্ড ট্ৰাম্পে । ইয়াৰ পূৰ্বে মঙলবাৰে ফ্ল’ৰিডাৰ নিজৰ মাৰ-এ-লাগো বাসগৃহত এখন সংবাদমেল অনুষ্ঠিত কৰি তেওঁ নাটো, গাজাত ইজৰাইলৰ পণবন্দী, গ্ৰীণলেণ্ড ক্ৰয় কৰা আৰু পানামা কেনেল নিয়ন্ত্ৰণকে ধৰি নিজৰ এজেণ্ডা তথা কৰ্মসূচীৰ ৰূপৰেখা দাঙি ধৰে । ইলন মাস্কক লৈও তেওঁ নিজৰ মতামত প্ৰকাশ কৰে আৰু কানাডাক আমেৰিকাৰ ৫১ সংখ্যক ৰাজ্য হিচাপে কৰা জল্পনা-কল্পনাৰ বিষয়েও প্ৰকাশ কৰে ।

কানাডাৰ বিষয়ে কয় ট্ৰাম্পে-

কানাডাৰ বিষয়ে প্ৰশ্ন কৰাত ট্ৰাম্পে কয় যে কানাডা আমেৰিকাৰ এখন ৰাজ্য হ’ব লাগে । ৰাষ্ট্ৰীয় নিৰাপত্তাৰ বাবে এয়া ভাল হ’ব বুলিও তেওঁ কয় । ট্ৰাম্পে কয় যে মোৰ কানাডাত বহুত বন্ধু আছে, মই কানাডাৰ জনসাধাৰণক ভাল পাওঁ, কিন্তু আমেৰিকাই আৰু কানাডাক অৰ্থনৈতিকভাৱে সহায় কৰিব নোৱাৰে । কানাডাৰ ওপৰত শুল্ক আৰোপ কৰাৰ ইংগিতো দিয়ে তেওঁ । তেওঁ কয় যে আমি কানাডাক আমেৰিকাৰ অংশ হিচাপে গঢ়ি তুলিবলৈ অৰ্থনৈতিক শক্তি ব্যৱহাৰ কৰিম ।

হামাছক সকীয়াই দিলে ট্ৰাম্পে-

গাজাত ইজৰাইলী পণবন্দীক লৈ হামাছক সকীয়াই দিছে ট্ৰাম্পে । তেওঁ কয় যে যদি মই কাৰ্যভাৰ গ্ৰহণ কৰাৰ পূৰ্বে ইজৰাইলী পণবন্দীসকলক ঘূৰাই নিদিয়ে তেন্তে মধ্যপ্ৰাচ্যৰ সকলো ধ্বংস হ’ব । তেওঁ কয় যে এইটো হামাছকে ধৰি কাৰো বাবে ভাল নহ’ব ।

মেক্সিকো উপসাগৰৰ নাম সলনি কৰি কৰা হ’ব আমেৰিকা উপসাগৰ-

সংবাদমেলত আমেৰিকাৰ নৱনিৰ্বাচিত ৰাষ্ট্ৰপতি ড’নাল্ড ট্ৰাম্পে এক চাঞ্চল্যকৰ ঘোষণা কৰে । তেওঁ কয় যে তেওঁ গালফ অৱ মেক্সিকোৰ নাম সলনি কৰি গালফ অৱ আমেৰিকা কৰিবলৈ ওলাইছে । তেওঁ কয়, কি সুন্দৰ নাম এয়া । এইটো যুক্তিসংগতও । অৱশ্যে ইয়াৰ বাবে কোনো সময়সীমা দিয়া নাই তেওঁ ।

পানামা কেনেল-গ্ৰীনলেণ্ড দখলৰ দাবী পুনৰবাৰ উল্লেখ কৰে-

আমেৰিকাৰ নৱনিৰ্বাচিত ৰাষ্ট্ৰপতি ড’নাল্ড ট্ৰাম্পে পুনৰবাৰ পানামা কেনেল আৰু গ্ৰীণলেণ্ড দখল কৰাৰ দাবী পুনৰবাৰ প্ৰকাশ কৰিছে । এই দুয়োটা অঞ্চলৰ নিয়ন্ত্ৰণ দখল কৰিবলৈ সামৰিক শক্তিৰ ব্যৱহাৰ নুই নকৰে বুলিও তেওঁ কয় । তেওঁ কয় যে এই দুয়োটা ক্ষেত্ৰতে আমেৰিকাৰ নিয়ন্ত্ৰণ ৰাষ্ট্ৰীয় নিৰাপত্তাৰ বাবে গুৰুত্বপূৰ্ণ । তেওঁ কয় যে পানামা কেনেল চীনে চলাই আছে, আনহাতে আমি কেনেলটো পানামাক দিছিলোঁ । তেওঁলোকে ইয়াৰ অপব্যৱহাৰ কৰিছে । এইটো নিৰ্মাণ কৰা কেতিয়াও উচিত নাছিল ।

প্ৰতিৰক্ষা ব্যয় বৃদ্ধিৰ বাবে নাটো দেশসমূহৰ ওপৰত হেঁচা প্ৰয়োগ কৰিছে ট্ৰাম্পে-

সংবাদমেলৰ সময়ত ড’নাল্ড ট্ৰাম্পে নাটোৰ সদস্যসকলক তেওঁলোকৰ প্ৰতিৰক্ষা ব্যয় মুঠ ঘৰুৱা উৎপাদনৰ (জি ডি পি) পাঁচ শতাংশলৈ বৃদ্ধি কৰিবলৈ হেঁচা প্ৰয়োগ কৰে । তেওঁ কয় যে নাটো দেশসমূহে ইয়াৰ সামৰ্থ্য আছে, কিন্তু সেয়া দুই শতাংশ নহয়, পাঁচ শতাংশ হ’ব লাগে । ট্ৰাম্পে আৰু কয়, ‘আমাৰ হাতত থকা ধনৰ অতি কম অংশহে ইউৰোপে পাব । আমাৰ মাজত এক সাগৰ আছে, ইউৰোপতকৈ ট্ৰিলিয়ন ডলাৰ বেছি টকা খৰচ কৰিম কিয় ?’

বাইডেনৰ পুৰণি সিদ্ধান্তও সলনি হ’ব-

সংবাদমেলৰ সময়ত তেওঁ বৰ্তমানৰ ৰাষ্ট্ৰপতিগৰাকীৰ বহু সিদ্ধান্ত সলনি কৰাৰ ইংগিতো দিয়ে । তেওঁ ঘোষণা কৰে যে কাৰ্যভাৰ গ্ৰহণ কৰাৰ লগে লগে তেওঁ গেছ আৰু তেলৰ বাবে অফশ্ব’ৰ ড্ৰিলিঙৰ ওপৰত থকা নিষেধাজ্ঞা উঠাই ল’ব । উল্লেখযোগ্য যে জো বাইডেনে বহু অঞ্চলত সাগৰত তেল আৰু গেছ খনন নিষিদ্ধ কৰিছিল । ইয়াৰ আঁৰৰ কাৰণ তেওঁৰ জলবায়ু এজেণ্ডাক অগ্ৰাধিকাৰ দিয়া বুলিও তেওঁ কয় । একে সময়তে ট্ৰাম্পে ইয়াক বাতিলৰ দিশে আগবাঢ়িছে ।