বুধবাৰে চীনৰ ওপৰত শুল্ক ১২৫ শতাংশলৈ বৃদ্ধি কৰাৰ সিদ্ধান্তৰ পক্ষ লয় আমেৰিকাৰ ৰাষ্ট্ৰপতি ড’নাল্ড ট্ৰাম্পে । তেওঁ কয়, কোনোবাই এয়া কৰিবই লাগিব । হোৱাইট হাউছত ৰজাৰ ছিয়াৰ্ল পেনস্কেৰ সৈতে বৈঠকত অংশ লয় ট্ৰাম্প । এই সময়ছোৱাত NASCAR, INDY আৰু IMSA ৰেচিঙৰ চেম্পিয়নসকলো উপস্থিত আছিল ।

ইয়াৰ মাজতে ট্ৰাম্পে কয় যে আন কোনো আমেৰিকান নেতাই ইমান সাহসী পদক্ষেপ গ্ৰহণ নকৰিলেহেঁতেন । এই পদক্ষেপৰ প্ৰয়োজন আছিল কাৰণ চীনৰ সৈতে পূৰ্বৰ বাণিজ্যিক ভাৰসাম্যহীনতা সাময়িক আছিল । তেওঁ কয় যে যোৱা বছৰ চীনে আমেৰিকাৰ সৈতে বাণিজ্যৰ পৰা এক ট্ৰিলিয়ন ডলাৰ উপাৰ্জন কৰিছিল আৰু তেওঁলোকে নিজৰ আক্ৰমণাত্মক শুল্ক কৌশলৰ জৰিয়তে ইয়াক ওলোটাই দিছে ।

‘যোৱা বছৰ চীনে আমেৰিকাৰ পৰা এক ট্ৰিলিয়ন ডলাৰ উপাৰ্জন কৰিছিল’

ট্ৰাম্পে কয় যে মই কৰা ধৰণে আন কোনো ৰাষ্ট্ৰপতিয়ে নকৰিলেহেঁতেন…কোনোবাই কৰিব লাগিবই । ইয়াক বন্ধ কৰাৰ প্ৰয়োজন আছিল কাৰণ ই বহনক্ষম নাছিল । যোৱা বছৰ চীনে আমেৰিকাৰ সৈতে বাণিজ্যৰ পৰা এক ট্ৰিলিয়ন ডলাৰ উপাৰ্জন কৰিছিল…এতিয়া মই ইয়াক ওলোটাই দিলোঁ ।’

‘মই কৈছিলোঁ যে ওভতি ধৰিলে মই শুল্ক দুগুণ কৰিম’

ৰাষ্ট্ৰপতি ট্ৰাম্পে ৭৫খনতকৈও অধিক দেশৰ বাবে পাৰস্পৰিক শুল্কৰ ওপৰত ৯০ দিনৰ বাবে নিষেধাজ্ঞা আৰোপ কৰি কয় যে, “যিসকলে প্ৰতিশোধমূলক শুল্ক আৰোপ নকৰিলে মই তেওঁলোকৰ ওপৰত ৯০ দিনৰ সকাহ দিছো  কাৰণ মই তেওঁলোকক কৈছিলো যে যদি তেওঁলোকে প্ৰতিশোধ লয় তেন্তে আমি ইয়াক দুগুণ কৰিম…আৰু মই চীনৰ সৈতে সেইটোৱেই কৰিলোঁ কাৰণ তেওঁলোকে প্ৰতিশোধ লৈছে ।”

‘টেৰিফ নীতিয়ে দীৰ্ঘকালীনভাৱে আমেৰিকাৰ বাবে আচৰিত কাম কৰিব’

এই বাণিজ্যিক পৰিস্থিতিয়ে দীৰ্ঘম্যাদীভাৱে আমেৰিকাৰ বাবে আচৰিত কাম কৰিব বুলি তেওঁ আত্মবিশ্বাস প্ৰকাশ কৰে । ট্ৰাম্পে লগতে কয় যে বছৰৰ শেষলৈকে বা হয়তো তাৰ আগতেও দেশখনত এনে এক চুক্তি হ’ব যিটো কোনেও কল্পনা কৰা নাছিল ।

বিশ্বৰ দুখন মহাশক্তি আমেৰিকা আৰু চীনৰ মাজত বাণিজ্য যুদ্ধ পুনৰ তীব্ৰতৰ হৈ পৰিছে । আমেৰিকাৰ ৰাষ্ট্ৰপতি ড’নাল্ড ট্ৰাম্পে চীনৰ পৰা অহা সকলো সামগ্ৰীৰ ওপৰত ১০৪% শুল্ক আৰোপ কৰিছে, তাৰ পিছত চীনেও তীব্ৰ প্ৰতিক্ৰিয়া প্ৰকাশ কৰিছে । চীনে ইয়াক ভাবুকি বুলি অভিহিত কৰি কয় যে তেওঁলোক শেষ উশাহলৈকে যুঁজিবলৈ সাজু ।

আমেৰিকাৰ শুল্ক বনাম চীনৰ শুল্ক-

ইয়াৰ পূৰ্বে ড’নাল্ড ট্ৰাম্পে চীনৰ ওপৰত ৩৪% অতিৰিক্ত শুল্ক আৰোপ কৰাৰ কথা ঘোষণা কৰিছিল । যেতিয়া চীনেও আমেৰিকাৰ সামগ্ৰীৰ ওপৰত ৩৪% কৰ আৰোপ কৰিছিল, তেতিয়া ট্ৰাম্পে আৰু ৫০% শুল্ক সংযোজন কৰিছিল । ইতিমধ্যে আৰোপ কৰা কৰকে ধৰি মুঠ শুল্ক এতিয়া ১০৪% হৈ পৰিছে । অৰ্থাৎ চীনৰ পৰা আমেৰিকালৈ অহা প্ৰতিটো বস্তুৰ দাম আগৰ তুলনাত দুগুণতকৈও অধিক হ’ব ।

কি উত্তৰ দিলে চীনে ?

ইউৰোপীয় সংঘৰ সভাপতি উৰ্চুলা ভন ডেৰ লেয়েনৰ সৈতে আলোচনাত চীনৰ প্ৰধানমন্ত্ৰী লি কেকিয়াঙে কয় যে এনে অনিশ্চয়তাক মনত ৰাখি ইতিমধ্যে চীনৰ অৰ্থনৈতিক নীতি প্ৰণয়ন কৰা হৈছে । তেওঁ কয়- চীন যিকোনো বাহ্যিক জোকাৰণিৰ সৈতে মোকাবিলা কৰিবলৈ সম্পূৰ্ণৰূপে সাজু আৰু ২০২৫ চনতো আমাৰ অৰ্থনীতি শক্তিশালী হৈ থাকিব । লি কেকিয়াঙে আমেৰিকাই একপক্ষীয় নীতি গ্ৰহণ কৰা, অৰ্থনৈতিক হেঁচা প্ৰয়োগ কৰা আৰু বিশ্ব বাণিজ্যৰ নিয়ম উলংঘা কৰাৰ অভিযোগ উত্থাপন কৰে । তেওঁ লগতে কয় যে সুৰক্ষাবাদে কাৰো উপকাৰ নকৰে – মুকলি আৰু সহযোগিতা সঠিক পথ ।

বিশ্বত ট্ৰাম্পৰ শুল্কৰ প্ৰভাৱ-

এই নতুন শুল্কৰ পিছত বিশ্বৰ বজাৰ হ্ৰাস পাইছে । আমেৰিকাৰ শ্বেয়াৰ বজাৰতো তীব্ৰ অৱনতি ঘটিছে । বিনিয়োগকাৰীৰ মাজত মন্দাৱস্থাৰ উদ্বেগ বৃদ্ধি পাইছে । বহু দেশৰ চৰকাৰে এতিয়া আমেৰিকাক প্ৰত্যুত্তৰ জনাবলৈ সাজু হৈছে ।

এই দেশসমূহে ট্ৰাম্পৰ শুল্কৰ প্ৰত্যুত্তৰ দিছে-

কানাডাই কয় যে বুধবাৰৰ পৰা আমেৰিকাৰ অটোম’বাইলৰ ওপৰত কৰ আৰোপ কৰিব । ইউৰোপীয় সংঘই সৰিয়হ, মটৰ চাইকেল, জিন্সকে ধৰি আমেৰিকাৰ সামগ্ৰীৰ ওপৰত ২৫% কৰ আৰোপ কৰিব বুলি প্ৰকাশ কৰিছে । ইফালে ফ্ৰান্সৰ ৰাষ্ট্ৰপতি মেক্ৰনে ট্ৰাম্পক তেওঁৰ সিদ্ধান্ত পুনৰ বিবেচনা কৰিবলৈ আবেদন জনায় । যদি আমেৰিকাই পিছুৱাই নাযায়, তেন্তে ইউৰোপেও ইয়াৰ উত্তৰ দিব ।

শনিবাৰে আমেৰিকাৰ ৰাজপথত দেখা গ’ল এক বৃহৎ আন্দোলন । দেশজুৰি হাজাৰ হাজাৰ লোক ৰাজপথলৈ ওলাই আহি ৰাষ্ট্ৰপতি ড’নাল্ড ট্ৰাম্প আৰু তেওঁৰ ঘনিষ্ঠ ব্যৱসায়ী তথা উদ্যোগপতি ইলন মাস্কৰ বিৰুদ্ধে প্ৰতিবাদ সাব্যস্ত কৰে । চৰকাৰৰ ব্যাপক কৰ্তন, ৰাজহুৱা সেৱা হ্ৰাস আৰু বিতৰ্কিত সামাজিক নীতিৰ বিৰুদ্ধে জনতাই সাব্যস্ত কৰে এই প্ৰতিবাদ ।

প্ৰকাশিত বাতৰি অনুসৰি ‘হেণ্ডছ অফ!’ এই প্ৰতিবাদৰ অধীনত আমেৰিকাৰ ৫০খন ৰাজ্যতে ‘ৰেলী’ অনুষ্ঠিত হয়, য’ত নাগৰিক অধিকাৰ সংগঠন, শ্ৰমিক সংঘ, এল জি বি টি কিউ+ গোট, প্ৰবীণ সৈনিক আৰু অন্যান্য সংগঠনে অংশগ্ৰহণ কৰে । প্ৰধান প্ৰতিবাদ স্থানসমূহৰ ভিতৰত আছিল ৱাশ্বিংটন ডি চিৰ নেচনেল মল, বিভিন্ন ৰাজ্যৰ ৰাজধানী আৰু নিউয়ৰ্কৰ পৰা লছ এঞ্জেলছলৈকে কেইবাখনো চহৰৰ কেন্দ্ৰ ।

চৰকাৰী সংস্থাসমূহত কৰ্তনৰ অভিযোগ মাস্কৰ বিৰুদ্ধে-

প্ৰতিবাদকাৰীসকলে ট্ৰাম্প প্ৰশাসনে গণতান্ত্ৰিক প্ৰতিষ্ঠানসমূহ দুৰ্বল কৰাৰ অভিযোগ উত্থাপন কৰে । ৱাশ্বিংটনত ৰাইজক সম্বোধন কৰি কৰ্মী গ্ৰেলন হেগলাৰে কয় যে, “তেওঁলোকে শুই থকা দৈত্যক জগাই তুলিছে, আৰু এয়া মাত্ৰ আৰম্ভণিহে ।”

টেছলা, স্পেচএক্স আৰু ছ’চিয়েল মিডিয়া প্লেটফৰ্ম এক্সৰ চি ই অ’ ইলন মাস্ক, যি সদ্যগঠিত ‘গভৰ্ণমেণ্ট ইফিচিয়েন্সি বিভাগৰ মুৰব্বীও আৰু ট্ৰাম্পৰ অতি ঘনিষ্ঠ, চৰকাৰী সংস্থাসমূহত ব্যাপক কৰ্তনৰ প্ৰচাৰৰ অভিযোগ উত্থাপন হৈছে । যদিও মাস্কে দাবী কৰে যে ইয়াৰ ফলত কৰদাতাসকলৰ কোটি কোটি ডলাৰ ৰাহি হৈছে, বহু আমেৰিকান লোকে ইয়াক অত্যাৱশ্যকীয় সেৱাসমূহৰ নিষ্কাশন বুলি ভাবে ।

সামাজিক সুৰক্ষা, ছুটী, পুঁজি কৰ্তন…

সামাজিক সুৰক্ষাৰ কাৰ্যালয় বন্ধ কৰা, চৰকাৰী কৰ্মচাৰীক বৃহৎ পৰিসৰৰ ছুটী দিয়া, স্বাস্থ্য সেৱা আৰু এইচ আই ভিৰ পুঁজি কৰ্তনৰ বাবে প্ৰতিবাদকাৰীয়ে ট্ৰাম্প প্ৰশাসনক লক্ষ্য কৰি লয় ।

এয়া মাত্ৰ আৰম্ভণিহে !

ট্ৰাম্প হোৱাইট হাউছলৈ ঘূৰি অহাৰ পিছত সঘনাই প্ৰতিবাদ সংঘটিত হৈছে যদিও “হেণ্ডছ অফ!” মহিলাৰ মাৰ্চ ২০১৭ আৰু ব্লেক লাইভছ মেটাৰ আন্দোলন ২০২০ৰ পিছত এই প্ৰতিবাদ সৰ্ববৃহৎ গণ আন্দোলন হিচাপে বিবেচিত হৈছে । কিন্তু বহু প্ৰতিবাদকাৰীয়ে সকীয়াই দিছে যে শনিবাৰৰ এই ঢৌ মাত্ৰ আৰম্ভণিহে ।