কৰ্তব্য পথত এইবাৰৰ গণতন্ত্ৰ দিৱসৰ পেৰেড কিছু ব্যতিক্ৰম হ’ব । এই পেৰেডে এইবাৰ ইতিহাস ৰচিবলৈ সাজু হৈছে ।

৭৬ সংখ্যক গণৰাজ্য দিৱস উদযাপনৰ বাবে সাজু হৈছে দেশবাসী । ২৬ জানুৱাৰী, গণৰাজ্য দিৱসত ভাৰতে পুনৰবাৰ কৰ্তব্য পথত নিজৰ শক্তি প্ৰদৰ্শন কৰিব । গণতন্ত্ৰ দিৱস উপলক্ষে প্ৰতিবছৰেই কৰ্তব্য পথত অনুষ্ঠিত হয় পেৰেড । এই পেৰেডত ভাৰতৰ শৌৰ্য-বীৰ্য, শক্তিৰ লগতে দেশৰ বৈচিত্ৰময় সংস্কৃতিৰ আভাসো প্ৰদৰ্শন কৰা হয় ।

২০২৬ বৰ্ষৰ গণৰাজ্য দিৱসৰ পেৰেড পূৰ্বতকৈ কিছু ব্যতিক্ৰম হ’ব । এই পেৰেডে ইতিহাস ৰচিবলৈ সাজু হৈছে, কিয়নো প্ৰথমবাৰৰ বাবে গণৰাজ্য দিৱসৰ পেৰেডত কেন্দ্ৰীয় সংৰক্ষিত আৰক্ষী বাহিনীৰ পুৰুষ ইউনিটৰ নেতৃত্ব দিব এগৰাকী মহিলাই । ২৬ বছৰীয়া ছিমৰন বালাক দিয়া হৈছে এই দায়িত্ব । সামাজিক মাধ্যমত এতিয়া ছিমৰন বালাক লৈ ব্যাপক চৰ্চা হোৱা পৰিলক্ষিত হৈছে ।

কোন হয় ছিমৰন বালা ?

জম্মু-কাশ্মীৰৰ ৰাজৌৰী জিলাৰ নৌশ্বেৰাৰ বাসিন্দা ২৬ বছৰীয়া ছিমৰন বালাই চি আৰ পি এফত এচিষ্টেণ্ট কমাণ্ডেণ্ট হিচাপে কাৰ্যনিৰ্বাহ কৰি আছে । এইবাৰৰ গণৰাজ্য দিৱসৰ পেৰেডত চি আৰ পি এফৰ পুৰুষ ইউনিটৰ নেতৃত্ব দিব ছিমৰনে । এই ইউনিটত ১৪০ জনতকৈ অধিক পুৰুষ কৰ্মী আছে । ছিমৰন ৰাজৌৰী জিলাৰ প্ৰথমগৰাকী মহিলা যিয়ে চি আৰ পি এফত বিষয়া হিচাপে যোগদান কৰিছে ।

বৰ্তমান চি আৰ পি এফত সহকাৰী অধিনায়ক হিচাপে কাৰ্যনিৰ্বাহ কৰা ২৬ বছৰীয়া ছিমৰান বালাই ২০২৩ চনত এই বাহিনীত যোগদান কৰিছিল । ২০২৩ বৰ্ষত প্ৰথম প্ৰচেষ্টাতে ইউ পি এছ চিৰ কেন্দ্ৰীয় সশস্ত্ৰ আৰক্ষী বাহিনীৰ পৰীক্ষাত উত্তীৰ্ণ হৈ সৰ্বভাৰতীয় ৮২ সংখ্যক লাভ কৰে তেওঁ । ২০২৩ চনত জম্মু-কাশ্মীৰৰ পৰা নিৰ্বাচিত হোৱা একমাত্ৰ মহিলা প্ৰাৰ্থী আছিল ছিমৰন ।

কেনেকৈ পুৰুষ ইউনিটৰ কমাণ্ড লাভ কৰিলে ছিমৰনে ?

দিল্লীৰ কৰ্তব্য পথত অনুষ্ঠিত হ’ব লগা গণৰাজ্য দিৱসৰ পেৰেডত চি আৰ পি এফৰ পুৰুষ ইউনিটৰ নেতৃত্ব দি ইতিহাস ৰচনা কৰিবলৈ সাজু হৈছে ২৬ বছৰীয়া ছিমৰন বালা । গণৰাজ্য দিৱসৰ পেৰেড আখৰাত তেওঁৰ আকৰ্ষণীয় প্ৰদৰ্শনৰ পিছত পুৰুষ ইউনিটটোৰ নেতৃত্ব দিয়াৰ দায়িত্ব ছিমৰনক দিয়া হয় । ড্ৰিলৰ সময়ত তেওঁৰ আত্মবিশ্বাস, নিখুঁততা আৰু কমাণ্ড আছিল ব্যতিক্ৰমী । ইয়াৰ ফলত ২৬ জানুৱাৰীত চি আৰ পি এফ ইউনিটৰ নেতৃত্ব দিয়াৰ গৌৰৱ লাভ কৰে ছিমৰন বালাই ।

লগতে পঢ়ক : বাজেট অধিৱেশনৰ পূৰ্বে সৰ্বদলীয় বৈঠক আহ্বান কেন্দ্ৰীয় চৰকাৰৰ