অভিনেতা গোবৰ্ধন আছৰানিৰ শেষ ইচ্ছা

২০ অক্টোবৰ সোমবাৰে সন্ধিয়া প্ৰবীণ অভিনেতা গোবৰ্ধন আছৰানিয়ে শেষ নিশ্বাস ত্যাগ কৰে । ৮৪ বছৰ বয়সত ইহ সংসাৰ ত্যাগ কৰে যশস্বী অভিনেতাগৰাকীয়ে । । স্বাস্থ্যজনিত সমস্যাৰ বাবে প্ৰায় পাঁচ দিন পূৰ্বে মুম্বাইৰ জুহুৰ আৰোগ্য নিধি চিকিৎসালয়ত ভৰ্তি কৰোৱা হৈছিল তেওঁক ।

সোমবাৰে সন্ধিয়া ছান্টাক্ৰুজ শ্মশানত তেওঁৰ অন্ত্যেষ্টিক্ৰিয়া সম্পন্ন কৰা হয় । কেৱল পৰিয়ালৰ ঘনিষ্ঠ সদস্যসকলেহে অংশগ্ৰহণ কৰে তেওঁৰ অন্ত্যেষ্টিক্ৰিয়াত । দীপাৱলীৰ নিশাৰ এই মৰ্মান্তিক খবৰে তেওঁৰ অনুৰাগী তথা চলচ্চিত্ৰ জগতক শোকাহত কৰি তুলিছে ।

আছৰানিৰ শেষ ইচ্ছা-

মৃত্যুৰ মাত্ৰ কেইঘণ্টামান পূৰ্বে আছৰানিয়ে নিজৰ ইনষ্টাগ্ৰাম ষ্ট’ৰীত সকলোকে দীপাৱলীৰ শুভেচ্ছা জনাইছিল । যোৱা কিছুদিন তেওঁৰ স্বাস্থ্যৰ বিষয়ে ভুৱা উৰাবাতৰি প্ৰচাৰিত হৈছিল, যাৰ বাবে বহুতে প্ৰথম অৱস্থাত তেওঁৰ মৃত্যুৰ খবৰ ভুৱা বুলি বুলি বিশ্বাস কৰিছিল । কিন্তু অনুৰাগীসকলে যেতিয়া তেওঁৰ অফিচিয়েল ছ’চিয়েল মিডিয়া একাউণ্টট চাই কৰিলে, তেতিয়া তেওঁলোকে এই কঠিন সত্য জানিব পাৰে ।

প্ৰবীণ অভিনেতাগৰাকীৰ পৰিয়ালৰ মতে গোবৰ্ধন আছৰানিয়ে সদায় এক সহজ আৰু শান্তিপূৰ্ণ বিদায় বিচাৰিছিল । তেওঁ পত্নী মঞ্জুক কৈছিল যে তেওঁৰ মৃত্যুৰ পিছত কোনো ধৰণৰ ৰাজহুৱা অনুষ্ঠান বা সংবাদ মাধ্যমৰ ভিৰ হ’ব নালাগে ।

এই বাবই তেওঁৰ অন্ত্যেষ্টিক্ৰিয়া অতি ব্যক্তিগতভাৱে ৰখা হৈছিল । আছৰানিৰ পৰিয়ালে তেওঁ বিচৰা ধৰণে তেওঁক শেষ বিদায় দিয়ে । শেষকৃত্য সম্পন্ন হোৱাৰ পিছতহে বলিষ্ঠ অভিনেতাগৰাকীৰ মৃত্যুৰ খবৰ ৰাজহুৱা হৈছিল ।

উল্লেখ্য যে, হিন্দী চিনেমাৰ অন্যতম জনপ্ৰিয় কৌতুক অভিনেতা আছিল আছৰানি । ৫০ বছৰতকৈয়ো অধিক সময়ৰ কেৰিয়াৰত তেওঁ ৩৫০ খনতকৈও অধিক ছবিত অভিনয় কৰিছিল । পুনেৰ ফিল্ম এণ্ড টেলিভিছন ইনষ্টিটিউট অৱ ইণ্ডিয়া (এফ টি আই আই)ত অধ্যয়ন কৰি ১৯৬০ চনৰ মাজভাগত তেওঁ চলচ্চিত্ৰত জগতত প্ৰৱেশ কৰিছিল তেওঁ । বলীউডৰ বহু চলচ্চিত্ৰত তেওঁ বহু স্মৰণীয় চৰিত্ৰত অভিনয় কৰি দৰ্শকক মুগ্ধ কৰিছিল । প্ৰখ্যাত পৰিচালক ৰমেশ চিপ্পিৰ চলচ্চিত্ৰ ‘শ্বোলে’ত কৰা জেইলাৰৰ চৰিত্ৰৰ বাবে তেওঁ বিপুল জনপ্ৰিয়তা অৰ্জন কৰিছিল ।

লগতে পঢ়ক : দীপাৱলীৰ দিনটোতে জীৱন নাট সামৰিলে প্ৰখ্যাত বলীউড অভিনেতা গোবৰ্দ্ধন আছৰানিয়ে