মঙলবাৰে হিউষ্টন ষ্টেডিয়ামত উজবেকিস্তানৰ বিৰুদ্ধে পৰ্তুগালৰ গ্ৰুপ কে মেচত গ’ল দি ক্রিষ্টিয়ানো ৰোনাল্ডোৱে ইতিহাসৰ সৃষ্টি কৰে৷ ফিফা বিশ্বকাপৰ ছটা ভিন্ন সংস্কৰণত গ’ল দিয়া প্ৰথমজন ফুটবলাৰ হিচাপে পৰিগণিত হৈছে।

ফুটবল জগতৰ অভিলেখৰ ৰজা তথা পৰ্তুগালৰ তাৰকা খেলুৱৈ ক্ৰিষ্টিয়ানো ৰোনাল্ডোৱে আন এক বিশেষ কৃতিত্ব অৰ্জন কৰি ইতিহাস ৰচনা কৰিছে। ৰোনাল্ডোৱে মঙলবাৰে (২৩ জুন) নিশা ‘ফিফা বিশ্বকাপ ২০২৬’ত উজবেকিস্তানৰ বিৰুদ্ধে গ্ৰুপ-K লীগৰ মেচখনত এক চমকপ্ৰদ প্ৰদৰ্শন দাঙি ধৰে। এই মেচখনত দুটাকৈ গ’ল দি ৰোনাল্ডোৱে বিশ্বকাপৰ ইতিহাসত এখন মেচতে দুটা গ’ল কৰা আটাইতকৈ বয়োজ্যেষ্ঠ খেলুৱৈ হিচাপে এক নতুন বিশ্ব অভিলেখ নিজৰ নামত কৰে। এই প্ৰদৰ্শনেৰে তেওঁ পুনৰবাৰ প্ৰমাণ কৰিলে যে বয়স মাথোঁ এটা সংখ্যাহে আৰু তেওঁৰ দক্ষতা অলপো হ্ৰাস পোৱা নাই। ইয়াৰ উপৰিও, ৪০ বছৰ বয়সত ফিফা বিশ্বকাপৰ এখন মেচত দুটা গ’ল কৰা ৰোনাল্ডো বিশ্বৰ প্ৰথমগৰাকী খেলুৱৈ হিচাপে পৰিগণিত হয়।

২৩ জুন ২০২৬ লৈকে ৰোনাল্ডোৰ বয়স ৪১ বছৰ আৰু ১৩৮ দিন। হিউষ্টনৰ এনআৰজি (NRG) ষ্টেডিয়ামত দৰ্শকেৰে উপচি পৰা খেলপথাৰত পৰ্তুগালৰ হৈ খেলিবলৈ নমা ৰোনাল্ডোৱে মেচৰ ষষ্ঠ মিনিটতে প্ৰথমটো গ’ল কৰি দলৰ খাত খোলে। ইয়াৰ পিছত মেচখন নিজৰ নিয়ন্ত্ৰণলৈ আনি ৩৯ মিনিটত দ্বিতীয়টো গ’ল কৰি নিজৰ দলক এক ডাঙৰ অগ্ৰগতি প্ৰদান কৰে। মেচখনত দুটা গ’ল কৰাৰ লগে লগে তেওঁ ছটা ভিন্ন ফিফা বিশ্বকাপ সংস্কৰণত (২০০৬, ২০১০, ২০১৪, ২০১৮, ২০২২, ২০২৬) গ’ল কৰা পৃথিৱীৰ একমাত্ৰ খেলুৱৈ হৈ পৰে। আনহাতে, মেছিৰো এইখন ষষ্ঠ বিশ্বকাপ আছিল যদিও তেওঁ ২০১০ চনৰ বিশ্বকাপত এটাও গ’ল কৰিব পৰা নাছিল।

উল্লেখযোগ্য যে, আৰ্জেণ্টিনাৰ তাৰকা খেলুৱৈ লিয়নেল মেছিয়ে ৰোনাল্ডোৰ ঠিক এদিন আগত, অৰ্থাৎ ২২ জুনে দুটা গ’ল কৰি আটাইতকৈ বেছি বয়সত দুটা গ’ল কৰাৰ অভিলেখ গঢ়িছিল। মেছিয়ে অট্ৰিয়াৰ বিৰুদ্ধে গ্ৰুপ-J মেচত সুন্দৰ প্ৰদৰ্শন কৰি দুটা গ’ল দিছিল। সেই সময়ত মেছিৰ বয়স আছিল ৩৮ বছৰ আৰু ৩৬৩ দিন। কিন্তু মেছিৰ এই নতুন অভিলেখৰ আনন্দ ২৪ ঘণ্টাও পাৰ হ’বলৈ নৌপাওঁতেই ৪১ বছৰীয়া ৰোনাল্ডোৱে উজবেকিস্তানৰ বিৰুদ্ধে দুটা গ’ল দি মেছিৰ অভিলেখ ভংগ কৰে।

ইয়াৰ উপৰিও, উজবেকিস্তানৰ বিৰুদ্ধে এই দুটা গ’লৰ সহায়ত ৰোনাল্ডোৱে নিজৰ দেশৰ বাবে আন এক ঐতিহাসিক অভিলেখ গঢ়িছে। তেওঁ বিশ্বকাপৰ ইতিহাসত পৰ্তুগালৰ হৈ আটাইতকৈ বেছি গ’ল কৰা খেলুৱৈ হৈ পৰিছে। ৰোনাল্ডোৱে এতিয়ালৈকে খেলা ২৪ খন বিশ্বকাপ মেচত মুঠ ১০ টা গ’ল কৰিছে। ইয়াৰ পূৰ্বে পৰ্তুগালৰ মহান ফুটবলাৰ ইউছেবিঅ’ই ১৯৬৬ চনৰ বিশ্বকাপৰ এটা টুৰ্নামেণ্টতে ৯ টা গ’ল কৰি কেইবা দশক ধৰি শীৰ্ষত আছিল। ৰোনাল্ডোৱে নিজৰ শেহতীয়া মেচখনত সেই অভিলেখো ভংগ কৰে।

অৱশ্যে ৰোনাল্ডোৰ হাতত এই মেচখনত হেট্ৰিক কৰাৰো এটা সুযোগ আছিল, কিন্তু দুৰ্ভাগ্যবশতঃ সেয়া সম্ভৱ হৈ নুঠিল। যদি তেওঁ তৃতীয়টো গ’ল কৰিব পাৰিলেহেঁতেন, তেন্তে তেওঁ বিশ্বকাপৰ ইতিহাসত ‘হেট্ৰিক’ (এখন মেচতে তিনিটা গ’ল) কৰা আটাইতকৈ বয়োজ্যেষ্ঠ খেলুৱৈ হিচাপেও বিশ্ব অভিলেখ গঢ়িলেহেঁতেন। কিন্তু সেই অভিলেখ বৰ্তমান লিয়নেল মেছিৰ নামত অক্ষুণ্ণ আছে। মেছিয়ে ২০২৬ বিশ্বকাপত ১৬ জুনত আলজেৰিয়াৰ বিৰুদ্ধে খেলা মেচখনত এক দৰ্শনীয় হেট্ৰিক অৰ্জন কৰিছিল। সেই সময়ত মেছিৰ বয়স আছিল ৩৮ বছৰ আৰু ৩৫৭ দিন।

পৰ্তুগালৰ দলে এই টুৰ্নামেণ্টত আশা কৰা ধৰণেই প্ৰদৰ্শন কৰিলে। তেওঁলোকে উজবেকিস্তানক ৫-০ ব্যৱধানত পৰাজিত কৰে। প্ৰথমখন মেচত ডিআৰ কংগোৰ সৈতে ১-১ গ’লত ড্ৰ’ খেলি হতাশ কৰা পৰ্তুগালে এই মেচখনত আৰম্ভণিৰে পৰাই নিজৰ আধিপত্য বজাই ৰাখে। এই বিশাল জয়ৰ সৈতে পৰ্তুগালে গ্ৰুপ ষ্টেজত নিজৰ অৱস্থিতি মজবুত কৰিলে। পৰ্তুগালৰ হৈ ক্ৰিষ্টিয়ানো ৰোনাল্ডোৰ দুটা গ’লৰ উপৰিও নুনো মেণ্ডেছ, জোয়াও ফেলিক্স আৰু ৰাফেল লিয়াৱে এটাকৈ গ’ল কৰে।

লগতে পঢ়ক: ফিফা বিশ্বকাপৰ পৰা বাহিৰ হ’ল পানামা; ১-০ গ’লত ক্ৰ’ৱেছিয়াৰ জয় লাভ