আঠ বছৰৰ মূৰত অনুষ্ঠিত হ’বলৈ যোৱা চেম্পিয়নছ ট্ৰফী প্ৰতিযোগিতাৰ বাবে ঘোষণা কৰা হৈছে ভাৰতীয় দল । শনিবাৰে মুখ্য নিৰ্বাচক অজিত আগৰকাৰ আৰু অধিনায়ক ৰোহিত শৰ্মাই মুম্বাইত সংবাদমেলৰ জৰিয়তে দল ঘোষণা কৰে । ১৫ জনীয়া দলটোত আছে ৭ জন বেটছমেন, ৪ জন অল ৰাউণ্ডাৰ আৰু ৪ জন বলাৰ । ১৯ ফেব্ৰুৱাৰীৰ পৰা আৰম্ভ হ’বলগীয়া চেম্পিয়নছ ট্ৰফী প্ৰতিযোগিতাখনৰ বিপৰীতে ৯ মাৰ্চত অনুষ্ঠিত হ’ব চূড়ান্ত খেল । এই প্ৰতিযোগিতাখন হাইব্ৰিড মডেলত অনুষ্ঠিত হ’ব । পাকিস্তানৰ বাহিৰেও ডুবাইত অনুষ্ঠিত হ’ব ইয়াৰ মেচ ।

ভাৰতে নিজৰ সকলো খেল ডুবাইত খেলিব, আনহাতে আন দলসমূহে পাকিস্তানত খেলিব । ডিফেণ্ডিং চেম্পিয়ন পাকিস্তান, নিউজীলেণ্ড আৰু বাংলাদেশৰ লগতে ভাৰতক গ্ৰুপ এত স্থান দিয়াৰ বিপৰীতে অষ্ট্ৰেলিয়া, দক্ষিণ আফ্ৰিকা, আফগানিস্তান আৰু ইংলেণ্ড গ্ৰুপ বিত আছে । এই প্ৰতিযোগিতাত ভাৰতৰ যাত্ৰা সহজ নহ’ব কাৰণ এই টুৰ্ণামেন্টত পাকিস্তান আৰু নিউজীলেণ্ডৰ বিৰুদ্ধে ভাৰতৰ অভিলেখ বিশেষ সন্তোষজনক নহয় । পাকিস্তানৰ বিৰুদ্ধে ভাৰত এই প্ৰতিযোগিতাত জয়ী হোৱাতকৈ অধিক মেচত পৰাস্ত হৈছে ।

পাকিস্তান-

২৩ ফেব্ৰুৱাৰীত মুখামুখি হ’ব চিৰ প্ৰতিদ্বন্দ্বী ভাৰত আৰু পাকিস্তান । এই মেচখন ডুবাইত অনুষ্ঠিত হ’ব । অৱশ্যে এই মিনি বিশ্বকাপত ভাৰতীয় দলটোৱে পাকিস্তানৰ বিৰুদ্ধে জয়তকৈ বেছি পৰাজয়ৰ সন্মুখীন হৈছে । এই প্ৰতিযোগিতাত দুয়োটা দলে ৫ বাৰ মুখামুখি হৈছে আৰু ইয়াৰে দুখনত জয়লাভ কৰিছে টিম ইণ্ডিয়াই । তিনিবাৰকৈ পৰাজয়ৰ সন্মুখীন হৈছে ভাৰত । ইয়াৰ ভিতৰত ২০১৭ চনৰ চেম্পিয়নছ ট্ৰফীৰ ফাইনেলো অন্তৰ্ভুক্ত । কিন্তু আই চি চিৰ সকলো ধৰণৰ প্ৰতিযোগিতা অৰ্থাৎ চেম্পিয়নছ ট্ৰফী, এদিনীয়া বিশ্বকাপ, টি-২০ বিশ্বকাপ আৰু বিশ্ব টেষ্ট চেম্পিয়নশ্বিপত দুয়োটা দলৰ অভিলেখৰ কথা ক’বলৈ গ’লে,  তেন্তে ২১ বাৰ সংঘৰ্ষ হৈছে ।

ইয়াৰে ভাৰতে ১৬খন মেচত জয়লাভ কৰাৰ বিপৰীতে পাকিস্তানে চাৰিখন মেচত জয়লাভ কৰিছে । এখন মেচ টাই হয় । শেষবাৰৰ বাবে ভাৰতে ২০২১ চনত আই চি চি টুৰ্ণামেণ্টত পাকিস্তানৰ হাতত পৰাজিত হৈছিল, যেতিয়া বাবৰ আজমৰ দলে টি-২০ বিশ্বকাপত কোহলীৰ দলক ১০ উইকেটত পৰাস্ত কৰিছিল । এদিনীয়াত সামগ্ৰিক অভিলেখৰ ক্ষেত্ৰত, ভাৰত আৰু পাকিস্তানে মুঠ ১৩৫ বাৰ মুখামুখি হৈছে । ভাৰতে ৫৭ খন মেচ জিকিছে আৰু পাকিস্তানে ৭৩ খন মেচ জিকিছে । পাঁচখন খেল ফলাফল অবিহনে সমাপ্ত হৈছিল ।

নিউজীলেণ্ড-

২ মাৰ্চত ভাৰত আৰু নিউজীলেণ্ডৰ মাজত এখন খেল অনুষ্ঠিত হ’ব । দুয়োটা দলে চেম্পিয়নছ ট্ৰফীত মাত্ৰ এবাৰহে মুখামুখি হৈছে । ২০০০ চনত খেলা সেই মেচখনত নিউজীলেণ্ডে ভাৰতক চাৰি উইকেটত পৰাস্ত কৰিছিল । আই চি চি প্ৰতিযোগিতাত কিৱিৰ বিৰুদ্ধে ভাৰতৰ অভিলেখ সন্তোষজনক নহয় । ২০২৩ চনৰ এদিনীয়া বিশ্বকাপতহে ভাৰতে কিৱি দলক পৰাস্ত কৰিবলৈ সক্ষম হৈছিল । অন্যথা বেছিভাগ সময় নিউজীলেণ্ডে আধিপত্য বিস্তাৰ কৰি আহিছে । দুয়োটা দলে আই চি চি প্ৰতিযোগিতাত মুঠ ২২ বাৰ মুখামুখি হৈছে । ইয়াৰে টিম ইণ্ডিয়াই মাত্ৰ ৬খন মেচত জয়লাভ কৰাৰ বিপৰীতে নিউজীলেণ্ডে ১৫খন মেচত জয়লাভ কৰিছে। এখন মেচ ড্ৰ’ হৈছিল ।

সীমিত অভাৰৰ আই চি চি টুৰ্ণামেণ্টৰ মেচত নিউজীলেণ্ডৰ হাতত ভাৰতৰ অন্তিমটো পৰাজয় আছিল ২০২১ চনত, টি-২০ বিশ্বকাপত । এই মেচত ডুবাইত নিউজীলেণ্ডে ভাৰতক ৮ উইকেটত পৰাস্ত কৰিছিল । মুঠৰ ওপৰত ভাৰত আৰু নিউজীলেণ্ডৰ দল দুটাই এদিনীয়াত মুঠ ১১৮ বাৰ মুখামুখি হৈছে । ইয়াৰে ভাৰতে ৬০খন মেচত জয়ী হোৱাৰ লগতে কিৱি দলে ৫০খন মেচত জয়লাভ কৰিছে । এখন মেচ টাই হৈছিল, আনহাতে ৭খন মেচৰ কোনো ফলাফল ওলোৱা নাছিল ।

বাংলাদেশ-

২০ ফেব্ৰুৱাৰীত বাংলাদেশৰ বিৰুদ্ধে এখন খেলৰ জৰিয়তে ভাৰতে চেম্পিয়নছ ট্ৰফীত অভিযান আৰম্ভ কৰিব । দুয়োটা দলে আই চি চি প্ৰতিযোগিতাত মুঠ ১৭ বাৰ মুখামুখি হৈছে । ইয়াত ভাৰতীয় দলে আধিপত্য বিস্তাৰ কৰিছে । টিম ইণ্ডিয়াই ১৭খন খেলৰ ভিতৰত ১৬খন খেলত জয়ী হোৱাৰ লগতে এখনত পৰাস্ত হৈছে । দুয়োটা দল চেম্পিয়নছ ট্ৰফীত মাত্ৰ এবাৰহে মুখামুখি হৈছে । ২০১৭ চনত বাৰ্মিংহামত খেলা সেই মেচখনত ভাৰতীয় দলটোৱে ৯ উইকেটত জয়লাভ কৰিছিল ।

আই চি চি টুৰ্ণামেণ্টত ভাৰতীয় দলৰ একমাত্ৰ পৰাজয় ২০০৭ চনৰ এদিনীয়া বিশ্বকাপত বাংলাদেশৰ বিৰুদ্ধে আছিল । সেই সময়ত প’ৰ্ট অৱ স্পেইনত ভাৰতক ৫ উইকেটত পৰাস্ত কৰে বাংলাদেশে ।

অষ্ট্ৰেলিয়াৰ বিৰুদ্ধে পৰাজয়ৰ পাছত বি চি চি আই (বৰ্ড অৱ কণ্ট্ৰল ফৰ ক্ৰিকেট ইন ইণ্ডিয়া)লৈছে এটা ডাঙৰ সিদ্ধান্ত । এতিয়া ক্ৰিকেটাৰৰ পত্নীৰ বাবে কঠোৰ নিয়ম বান্ধি দিয়া হৈছে । নতুন নিয়ম অনুসৰি যদি কোনো প্ৰতিযোগিতা ৪৫ দিন বা তাতকৈ অধিক সময়ৰ বাবে হয়, তেন্তে পত্নীক খেলুৱৈগৰাকীৰ লগত মাত্ৰ ১৪ দিনৰ বাবেহে থাকিবলৈ দিয়া হ’ব আৰু যদি ভ্ৰমণ কম দিনৰ হয় তেন্তে সেয়া ৭ দিনৰ বাবে হ’ব পাৰে ।

নতুন নিয়ম অনুসৰি সমগ্ৰ প্ৰতিযোগিতাখনৰ সময়ছোৱাত পত্নীসকল খেলুৱৈৰ সৈতে থাকিব নোৱাৰিব । পত্নী মাত্ৰ ২ সপ্তাহ একেলগে থাকিব পাৰিব । লগতে সকলো খেলুৱৈ দলৰ বাছত যাত্ৰা কৰিব লাগিব ।

গৌতম গম্ভীৰৰ ব্যক্তিগত মেনেজাৰকো ভি আই পি বক্স বা টিম বাছত বহিবলৈ দিয়া নহ’ব । তেওঁ আন কোনো হোটেলত থাকিব লাগিব । যদি খেলুৱৈসকলৰ লাগেজ ১৫০ কিলোগ্ৰামতকৈ অধিক হয় তেন্তে বি চি চি আইয়ে খেলুৱৈসকলক অতিৰিক্ত লাগেজৰ চাৰ্জ নিদিয়ে ।

অলপতে বি চি চি আইয়ে অষ্ট্ৰেলিয়া ছিৰিজৰ পিছত ৰোহিত শৰ্মা আৰু গৌতম গম্ভীৰৰ সৈতে এক পৰ্যালোচনা বৈঠক অনুষ্ঠিত কৰে । এই সময়ছোৱাত বি চি চি আইয়ে দলৰ সংমিশ্ৰণ সন্দৰ্ভত কোনো ধৰণৰ খৰখেদাকৈ প্ৰতিক্ৰিয়া নিদিবলৈ সিদ্ধান্ত লয় । বুজা গৈছে যে অহা ছয় সপ্তাহত চেম্পিয়নছ ট্ৰফীৰ দৰে গুৰুত্বপূৰ্ণ এদিনীয়া প্ৰতিযোগিতা অনুষ্ঠিত হ’বলগীয়া হোৱাৰ বাবে তাৎক্ষণিক যিকোনো প্ৰতিক্ৰিয়াই দলটোৰ লগতে সহায়ক কৰ্মচাৰীৰ ওপৰতো নেতিবাচক প্ৰভাৱ পেলাব ।

অষ্ট্ৰেলিয়া আৰু নিউজীলেণ্ডৰ বিৰুদ্ধে টেষ্ট শৃংখলাত দুৰ্বল প্ৰদৰ্শনৰ পিছত ভাৰতে প্ৰথমে টি-২০ আৰু তাৰ পিছত ইংলেণ্ডৰ বিৰুদ্ধে এদিনীয়া শৃংখলা খেলিব । ইয়াৰ পিছত দলটোৱে ফেব্ৰুৱাৰী মাহত চেম্পিয়নছ ট্ৰফীত অংশগ্ৰহণ কৰিব ।

অষ্ট্ৰেলিয়া ভ্ৰমণত ভাৰতৰ শোচনীয় প্ৰদৰ্শন-

অষ্ট্ৰেলিয়াৰ বিৰুদ্ধে সদ্য সমাপ্ত পাঁচখনীয়া খেলৰ বৰ্ডাৰ গাভাস্কাৰ টেষ্ট শৃংখলাত ১-৩ ব্যৱধানত শোচনীয় পৰাজয়ৰ সন্মুখীন হ’বলগীয়া হৈছিল টিম ইণ্ডিয়া । ইয়াৰ বাবে ভাৰতীয় দলটোৱে বিশ্ব টেষ্ট চেম্পিয়নশ্বিপলৈ যোগ্যতা অৰ্জন কৰাত ব্যৰ্থ হয় । এই কাৰণেই ভাৰতীয় দলটোৱে বিশ্ব টেষ্ট চেম্পিয়নশ্বিপৰ তিনিটা ছিজনত প্ৰথমবাৰৰ বাবে ডব্লিউ টি চি ফাইনেলৰ বাবে যোগ্যতা অৰ্জন কৰিব নোৱাৰিলে ।

ৰোহিত শৰ্মাৰ নেতৃত্বাধীন ভাৰতীয় দলটোৱে অষ্ট্ৰেলিয়াৰ হাতত বৰ্ডাৰ-গাভাস্কাৰ ট্ৰফীত আত্মসমৰ্পণ কৰে । ইয়াৰ পূৰ্বে ঘৰুৱা খেলপথাৰত নিউজীলেণ্ডৰ বিৰুদ্ধে ০-৩ ব্যৱধানত পৰাজয়ৰ সন্মুখীন হ’বলগীয়া হৈছিল টিম ইণ্ডিয়া । এই দুটা বিপৰ্যয়ৰ বাবে ভাৰতে বিশ্ব টেষ্ট চেম্পিয়নশ্বিপৰ ফাইনেল খেলাৰ পৰা বঞ্চিত হয় ।