লৰ্ডছত শতক অৰ্জন কৰি ইতিহাস ৰচনা কে এল ৰাহুলৰ

ইংলেণ্ড ভ্ৰমণত নিজৰ শক্তিশালী ফৰ্ম অব্যাহত ৰাখি ইতিহাস সৃষ্টি কৰিছে কে এল ৰাহুলে । টেষ্ট শৃংখলাৰ প্ৰথমখন মেচত শতক অৰ্জন কৰাৰ পিছত এতিয়া লৰ্ডছতো ৰাহুলে শতক অৰ্জন কৰিছে । লৰ্ডছ টেষ্টৰ তৃতীয় দিনা কে এল ৰাহুলে নিজৰ নৱমটো টেষ্ট শতক সম্পূৰ্ণ কৰে । ইয়াৰ লগে লগে ৰাহুলে সেই কৃতিত্ব অৰ্জন কৰিলে যিটো পূৰ্বে ভাৰতীয় ক্ৰিকেটৰ ইতিহাসত মাত্ৰ এবাৰহে হৈছে । এই ঐতিহাসিক খেলপথাৰত টেষ্টত এটাতকৈ অধিক শতক অৰ্জন কৰা ভাৰতৰ মাত্ৰ দ্বিতীয়জন বেটছমেন হিচাপে পৰিগণিত হয় ৰাহুল ।

লৰ্ডছত অনুষ্ঠিত টেষ্ট শৃংখলাৰ তৃতীয়খন খেলৰ তৃতীয় দিনা শনিবাৰে টিম ইণ্ডিয়াৰ প্ৰথম ইনিংছত এই কৃতিত্ব অৰ্জন কৰে ৰাহুলে । দ্বিতীয় দিনা অৰ্ধশতক অৰ্জন কৰি ৫৩ ৰানত অপৰাজিত হৈ উভতি অহা ৰাহুলে দ্বিতীয় দিনা কিছু আগ্ৰাসী শৈলী দেখুৱাই বাউণ্ডেৰী সংগ্ৰহত মনোনিৱেশ কৰে । ইয়াৰ মাজতে ৰাহুলে ব্ৰাইডন কাৰ্ছৰ এটা অভাৰত একেৰাহে ৩টা চাৰি কোবাই । এই সময়ছোৱাত পন্টৰ সৈতে ৰাহুলে টিম ইণ্ডিয়াক ২৫০ ৰানৰ সীমা অতিক্ৰম কৰাত সহায় কৰে ।

লৰ্ডছত একেৰাহে দ্বিতীয়টো শতক-

ৰাহুলৰ ৯৮ ৰানত দুপৰীয়াৰ আহাৰ খোৱাৰ পূৰ্বৰ শেষ অভাৰত তেওঁ আৰু ঋষভ পণ্টৰ মাজত হঠাতে ভুল বুজাবুজিৰ সৃষ্টি হয় আৰু পণ্ট ৰান আউট হয় । এনে পৰিস্থিতিত ভাৰতীয় বেটছমেনগৰাকীয়ে নিজৰ শতকৰ বাবে পৰৱৰ্তী অধিবেশনলৈ অপেক্ষা কৰিবলগীয়া হয় । তাৰ পিছত দ্বিতীয় অধিবেশন আৰম্ভ হোৱাত কে এল ৰাহুলে এটা ৰান লৈ টেষ্ট কেৰিয়াৰৰ নৱমটো শতক সম্পূৰ্ণ কৰে । ইয়াৰ লগে লগে ৰাহুলে লৰ্ডছত একেৰাহে দ্বিতীয়টো শতক সম্পূৰ্ণ কৰে । ২০২১ চনৰ ভ্ৰমণতো ৰাহুলে এই খেলপথাৰত শতক অৰ্জন কৰিছিল । সেয়া আছিল লৰ্ডছত ৰাহুলৰ প্ৰথম শতক আৰু এতিয়া এই ঐতিহাসিক স্থানত দ্বিতীয়বাৰৰ বাবে ১০০ৰ সীমা অতিক্ৰম কৰিছে তেওঁ ।

মাত্ৰ দ্বিতীয়জন ভাৰতীয় বেটছমেন হিচাপে পৰিগণিত ৰাহুল-

অৱশ্যে শতক অৰ্জন কৰাৰ পিছত ৰাহুলে বেছি সময় ক্ৰীজত তিষ্ঠি থাকিব নোৱাৰিলে আৰু শ্বোৱেইব বছিৰৰ বলত আউট হয় তেওঁ । ১৩টা চাৰিৰ সহায়ত ১৭৭টা বলত ১০০ ৰান সংগ্ৰহ কৰে তেওঁ । ৰাহুলে নিজৰ শতকক ডাঙৰ স্ক’ৰলৈ ৰূপান্তৰিত কৰিব পৰা নাছিল যদিও এই ইনিংছৰ জৰিয়তে তেওঁ নিশ্চিতভাৱে ইতিহাসৰ সৃষ্টি কৰিছে । লৰ্ডছ খেলপথাৰত এটাতকৈ অধিক শতক অৰ্জন কৰা মাত্ৰ দ্বিতীয়জন ভাৰতীয় বেটছমেন হিচাপে পৰিগণিত হৈছে ৰাহুল । তেওঁৰ পূৰ্বে ‘কৰ্ণেল’ নামেৰে বিখ্যাত কিংবদন্তি বেটছমেন দিলীপ ভেংছৰকাৰে এই খেলপথাৰত এটা বা দুটা নহয় ৩ শতক অৰ্জন কৰিছিল । ৰাহুলৰ এই কৃতিত্বও বিশেষ কাৰণ সুনীল গাভাস্কাৰ, শচীন তেণ্ডুলকাৰ, বিৰাট কোহলীৰ দৰে মহান ভাৰতীয় বেটছমেনে এই খেলপথাৰত এবাৰো শতক অৰ্জন কৰিব পৰা নাছিল ।

লগতে পঢ়ক : শুভমান গিলৰ অধিনায়কত্বৰ অনুৰাগী হ’ল শচীন টেণ্ডুলকাৰ; কৰিলে বিশেষ মন্তব্য

দ্বিতীয় ইনিংছতো দুৰ্দান্ত প্ৰদৰ্শন ঋষভ পন্টৰ

লীডছ টেষ্টত পুনৰবাৰ ইতিহাসৰ সৃষ্টি কৰিছে ভাৰতৰ উইকেটকীপাৰ-বেটছমেন ঋষভ পণ্টে । এই টেষ্টৰ প্রথম ইনিংছত ১৩৪ ৰানৰ দৰ্শনীয় শতক অর্জন কৰাৰ পাছত দ্বিতীয় ইনিংছতো আন এক শতক অৰ্জন কৰি এক বৃহৎ অভিলেখ গঢ়িবলৈ সক্ষম হৈছে পন্ট ৷ ইয়াৰ লগে লগে SENAৰ যিকোনো টেষ্ট মেচৰ দুয়োটা ইনিংছতে শতক অৰ্জন কৰা এছিয়াৰ প্ৰথমজন উইকেটকীপাৰ বেটছমেন হিচাপে পৰিগণিত হৈছে পন্ট । তেওঁৰ এই ইনিংছে লীডছ টেষ্টত টিম ইণ্ডিয়াক শক্তিশালী স্থানত ৰাখিছে ।

ঋষভ পন্টৰ ঐতিহাসিক ইনিংছ-

এই ইনিংছত ঋষভ পন্টে মাত্ৰ ১৩০টা বলত শতক সম্পূৰ্ণ কৰে । আনহাতে, প্ৰথম ইনিংছত তেওঁ ১৪৬ বলত এই কৃতিত্ব অৰ্জন কৰিছিল । টেষ্ট ক্ৰিকেটত এয়া পণ্টৰ অষ্টমটো শতক । বিশেষ কথাটো হ’ল তেওঁ এই শতকসমূহৰ ভিতৰত ৬টা শতক ভাৰতৰ বাহিৰত অর্জন কৰিছে ৷ একে সময়তে ইংলেণ্ডৰ বিৰুদ্ধে এয়া তেওঁৰ পঞ্চমটো শতকীয় ইনিংছ । ইংলেণ্ডত তেওঁ এই শতকসমূহৰ ভিতৰত ৪টা শতক অৰ্জন কৰিছে । এই শতক অৰ্জনৰ পিছতে বিদেশৰ মাটিত সৰ্বাধিক টেষ্ট শতক অৰ্জন কৰা উইকেটকীপাৰ বেটছমেনৰ তালিকাতো পণ্টৰ তৃতীয় স্থানত আছে ।

কে এল ৰাহুলৰ শতক-

এই টেষ্টৰ প্ৰথম ইনিংছত উজ্জ্বল প্ৰদৰ্শনৰ পিছতো অৰ্ধ শতকৰ পৰা বঞ্চিত হোৱা তাৰকা বেটছমেন কে এল ৰাহুলে দ্বিতীয় ইনিংছত দৰ্শনীয় শতক অৰ্জন কৰে । ধৈৰ্য সহকাৰে খেলি তেওঁ এই শতক অৰ্জন কৰি ভাৰতক এক বৃহত স্কৰ অৰ্জনৰ দিশে আগুৱাই নিছে । ২০২ টা বলত শতক সম্পূৰ্ণ কৰে ৰাহুলে । বৰ্তমান ২২৭ বলত ১২০ ৰান সংগ্ৰহ কৰি ক্ৰীজত আছে ৰাহুল । ইফালে ৰাহুল আৰু পন্টৰ শতকীয় ইনিংছৰ ভিত্তিত ভাৰতে বৰ্তমান ইংলেণ্ডৰ বিৰুদ্ধে ৩০৪ ৰানৰ অগ্ৰগতি লাভ কৰিছে ।

লগতে পঢ়ক : আন্তঃৰাষ্ট্ৰীয় ক্ৰিকেটত ১৮ বছৰ সম্পূৰ্ণ হিটমেনৰ; প্ৰথমটো হেলমেট শ্বেয়াৰ কৰি লিখিলে আৱেগিক বাৰ্তা