এন্টিবায়োটিক ঔষধৰ অতিৰিক্ত আৰু অপব্যৱহাৰ ৰোধৰ বাবে কেন্দ্ৰই এক গুৰুত্বপূৰ্ণ পদক্ষেপ লোৱাৰ দিশত আগবাঢ়িছে । শেহতীয়াকৈ প্ৰধানমন্ত্ৰীয়েও এন্টিবায়োটিকৰ অত্যধিক ব্যৱহাৰক লৈ গভীৰ চিন্তা প্ৰকাশ কৰিছে ।

এন্টিবায়টিকৰ অতিৰিক্ত ব্যৱহাৰ আৰু অপব্যৱহাৰ ৰোধ কৰাৰ লক্ষ্যৰে কেন্দ্ৰীয় চৰকাৰে এক গুৰুত্বপূর্ণ পদক্ষেপ গ্ৰহণ কৰিবলৈ আগবাঢ়িছে । চৰকাৰৰ পৰিকল্পনা অনুসাৰে, বজাৰত এন্টিবায়টিক ঔষধসমূহ এক সুকীয়া পৰিচয়েৰে বিক্ৰী কৰা হ’ব, যাতে সাধাৰণ ৰাইজে সহজেই বুজিব পাৰে যে কোনো ঔষধ এন্টিবায়টিক হয় নে নহয় ।

এই উদ্দেশ্যে কেন্দ্ৰীয় ড্ৰাগছ ষ্টেণ্ডাৰ্ড কণ্ট্ৰ’ল অৰ্গেনাইজেচন (CDSCO)ক প্ৰয়োজনীয় গাইডলাইন জাৰি কৰিবলৈ নিৰ্দেশ দিয়া হৈছে । জানিব পৰা মতে, চৰকাৰে প্ৰস্তাৱ আগবঢ়াইছে যে এন্টিবায়টিক ঔষধৰ পেকেজিঙত বিশেষ ক’ডিং, নিৰ্দিষ্ট ৰঙৰ ইংগিত বা স্পষ্ট চিহ্ন ব্যৱহাৰ কৰিব লাগে । ইয়াৰ ফলত ৰোগী আৰু ফাৰ্মাচিষ্ট দুয়োজনেই ঔষধৰ শ্ৰেণীটো তৎক্ষণাত চিনাক্ত কৰিব পাৰিব ।

শেহতীয়াকৈ প্ৰধানমন্ত্ৰী নৰেন্দ্ৰ মোদীয়েও এন্টিবায়োটিক ঔষধৰ অত্যধিক ব্যৱহাৰক লৈ গভীৰ চিন্তা প্ৰকাশ কৰিছে । প্ৰধানমন্ত্ৰীয়ে সাধাৰণ জনতাক অতি প্ৰয়োজন নোহোৱালৈকে এন্টিবায়োটিক ব্যৱহাৰ নকৰিবলৈ আহ্বান জনাইছে । এন্টিবায়োটিকৰ অতিমাত্ৰা ব্যৱহাৰৰ ফলত মানুহৰ দেহত ঔষধ-বিৰোধী প্ৰতিৰোধ ক্ষমতা (এন্টিবায়োটিক ৰেজিষ্টেন্স) গঢ় লৈ উঠিছে, যাৰ ফলত চিকিৎসা অধিক জটিল হৈ পৰিছে ।

কিয় লোৱা হৈছে এই পদক্ষেপ ?

এন্টি-মাইক্রোবিয়েল ৰেজিষ্টেন্স (এ এম আৰ)ৰ বৃদ্ধি পোৱা বিপদৰ প্ৰেক্ষাপটত এই গুৰুত্বপূর্ণ পদক্ষেপ লোৱা হৈছে । বাৰে বাৰে আৰু অপ্রয়োজনীয়ভাৱে এন্টিবায়োটিক গ্ৰহণ কৰাৰ ফলত বেক্টেৰিয়াই ঔষধৰ বিৰুদ্ধে প্ৰতিৰোধ ক্ষমতা গঢ়ি তুলিছে, যাৰ বাবে সাধাৰণ সংক্রমণো ক্ৰমে প্ৰাণঘাতী হৈ উঠিছে ।

বৰ্তমান বজাৰত উপলব্ধ বহু ঔষধৰ পেকিঙৰ পৰা সাধাৰণ ৰোগীয়ে সহজে বুজি নাপায় যে দিয়া ঔষধটো এন্টিবায়োটিক নে সাধাৰণ পেইনকিলাৰ নে ছাপোৰ্টিভ মেডিচিন । এই বিভ্ৰান্তিৰ সুযোগ লৈ বহু ঠাইত ডাক্তৰৰ পৰামৰ্শ অবিহনে এন্টিবায়োটিক বিক্ৰী কৰা হৈছে ।

চৰকাৰ আৰু চি ডি এছ চি অ’ (CDSCO)ৰ মাজত চলি থকা আলোচনাত এন্টিবায়োটিক ঔষধ চিনাক্ত কৰিবলৈ কেইবাটাও বিকল্পৰ ওপৰত গুৰুত্ব দিয়া হৈছে । এইসমূহৰ ভিতৰত এন্টিবায়োটিক ঔষধৰ বাবে বেলেগ ৰঙৰ ষ্ট্ৰিপ বা বক্স ব্যৱহাৰ, পেকেটত স্পষ্ট সতৰ্কবাণী বা বিশেষ চিহ্ন উল্লেখ, কিউ আৰ ক’ড বা আলফানিউমেৰিক ক’ড সংযোজন কৰি ঔষধৰ শ্ৰেণী সহজে চিনাক্ত কৰিব পৰা ব্যৱস্থা অন্তৰ্ভুক্ত আছে ।

ইয়াৰ মূল উদ্দেশ্য হৈছে যাতে ৰোগীয়ে নিজেই সজাগ হৈ অপ্রয়োজনীয়ভাৱে এন্টিবায়োটিক ব্যৱহাৰ নকৰে । ইয়াৰ লগতে কেন্দ্ৰীয় চৰকাৰে নতুন দিল্লীস্থিত ভাৰতীয় আয়ুৰ্বিজ্ঞান গৱেষণা পৰিষদ (ICMR)ক সাধাৰণ ভাষাত সাধাৰণ জনতাৰ বাবে সচেতনতামূলক বাৰ্তা প্ৰস্তুত কৰিবলৈও নিৰ্দেশ দিছে ।

লগতে পঢ়ক : ভোটাৰ তালিকাৰ পৰা বাদ পৰিল ২.৮৯ কোটি ভোটাৰৰ নাম…