২ কোটি ৮৯ লাখ ভোটাৰ তালিকাৰ পৰা কৰ্তন কৰা হৈছে । বৰ্তমান ৰাজ্যখনৰ খচৰা তালিকা অনুসৰি ভোটাৰৰ সংখ্যা প্ৰায় ১২ কোটি ।
উত্তৰ প্ৰদেশত ভোটাৰ তালিকাৰ বিশেষ পুনৰীক্ষণ (SIR) প্ৰক্ৰিয়াৰ পিছতে নিৰ্বাচন আয়োগে প্ৰকাশ কৰিছে ভোটাৰ তালিকাৰ খচৰা । মুঠ ২ কোটি ৮৯ লাখ ভোটাৰক খচৰাৰ পৰা আঁতৰোৱা হৈছে । আয়োগৰ মতে, ২৭ অক্টোবৰৰ পৰা আৰম্ভ হোৱা ১২খন ৰাজ্য আৰু কেন্দ্ৰীয় শাসিত অঞ্চলত চলি থকা এছ আই আৰ প্ৰক্ৰিয়াৰ অংশ হিচাপে এই তালিকা প্ৰস্তুত কৰা হৈছে ।
উত্তৰ প্ৰদেশৰ খচৰা তালিকা প্ৰকাশ তিনিবাৰকৈ পিছুৱাই দিয়াৰ পিছত আজি প্ৰকাশ পায় । ৰাজ্যৰ মুখ্য নিৰ্বাচনী বিষয়াই সংবাদমেলত কয় যে খচৰা ভোটাৰ তালিকাৰ প্ৰতিলিপি সকলো ৰাজনৈতিক দলকে দিয়া হৈছে । তেওঁ লগতে কয় যে প্ৰায় ১৮ শতাংশ ভোটাৰে প্ৰ-পত্ৰ জমা দিয়া নাই ।
তেওঁ কয় যে প্ৰথম অৱস্থাত উত্তৰ প্ৰদেশত প্ৰায় ১৫ কোটি ভোটাৰ আছিল, ইয়াৰে ১২.৫৫ কোটি (৮১.৩০%) ভোটাৰে নিজেই বা পৰিয়ালৰ কোনো সদস্যৰ জৰিয়তে স্বাক্ষৰ কৰি গণনা প্ৰ-পত্ৰ দাখিল কৰিছিল । তেওঁ কয় যে ভোটাৰসকলে গণনা প্ৰ-পত্ৰ জমা নিদিয়াৰ কেইবাটাও কাৰণ আছে :
-৪৬.২৩ লাখ ভোটাৰ (২.৯৯ শতাংশ) মৃত বুলি পোৱা গৈছে
-২.১৭ কোটি ভোটাৰ (১৪.০৬ শতাংশ) অনুপস্থিত বা বাসস্থান স্থানান্তৰিত হৈছে
-২৫.৪৭ লাখ ভোটাৰ (১.৬৫ শতাংশ) এটাতকৈ অধিক স্থানত পঞ্জীয়ন হোৱা দেখা গৈছে
এই কাৰণসমূহৰ বাবে খচৰা তালিকাৰ পৰা ২ কোটি ৮৯ লাখ নাম বাদ দিয়া হৈছে । বৰ্তমান উত্তৰ প্ৰদেশত খচৰা তালিকা অনুসৰি ভোটাৰৰ সংখ্যা প্ৰায় ১২ কোটি ।
মুখ্য নিৰ্বাচনী বিষয়াগৰাকীয়ে উল্লেখ কৰে যে, নিৰ্বাচন আয়োগৰ নিৰ্দেশনা অনুসৰি, এটা ভোটগ্ৰহণ কেন্দ্ৰত এতিয়া ১২০০ তকৈ অধিক ভোটাৰ নাথাকিব, যিটো পূৰ্বে প্ৰায় ১৫০০ ভোটাৰ আছিল । এই বাবেই নতুন ভোটকেন্দ্ৰ সৃষ্টি হ’ল, যাৰ বাবে অতিৰিক্ত সময়ৰ প্ৰয়োজন হয় ।
নিৰ্বাচন আয়োগে ২০২৬ চনৰ ৬ জানুৱাৰীৰ পৰা ৬ ফেব্ৰুৱাৰীলৈ, দাবী আৰু আপত্তি দাখিলৰ বাবে সময় প্ৰদান কৰিছে । খচৰা তালিকাত নাম নথকা ভোটাৰসকলে এই সময়ছোৱাত প্ৰয়োজনীয় নথি-পত্ৰসহ এখন প্ৰ-পত্ৰ পূৰণ কৰি পুনৰ নাম অন্তৰ্ভুক্ত কৰিব পাৰিব । ২৭ ফেব্ৰুৱাৰীৰ ভিতৰত সকলো দাবী আৰু আপত্তিৰ সমাধান হ’ব, আৰু ২০২৬ চনৰ ৬ মাৰ্চত চূড়ান্ত ভোটাৰ তালিকা প্ৰকাশ কৰা হ’ব ।
১৮ বছৰ সম্পূৰ্ণ হোৱা সকলো নতুন ভোটাৰকে নিজৰ নাম পৰীক্ষা কৰিবলৈ আহ্বান জনাইছে নিৰ্বাচন আয়োগে । নাম নথকাৰ বাবে তেওঁলোকে প্ৰ-পত্ৰ ৬ পূৰণ কৰিব পাৰে আৰু তেওঁলোকৰ নাম বা ঠিকনাৰ সংশোধনৰ বাবে তেওঁলোকে প্ৰ-পত্ৰ ৮ পূৰণ কৰিব পাৰে ।
লগতে পঢ়ক : প্ৰধানমন্ত্ৰীৰ বাসগৃহত মোদীক সাক্ষাৎ উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ…
