প্ৰধানমন্ত্ৰী পিছতে এইবাৰ মণিপুৰ ভ্ৰমণ কৰিব ৰাষ্ট্ৰপতি দ্ৰৌপদী মুৰ্মুৱে । আজি দুদিনীয়া ভ্ৰমণসূচীৰে ৰাজ্যখনত উপস্থিত হ’ব ৰাষ্ট্ৰপতিগৰাকী ।

১১ আৰু ১২ ডিচেম্বৰত মণিপুৰ ভ্ৰমণ কৰিব ৰাষ্ট্ৰপতি দ্ৰৌপদী মুৰ্মুৱে । ১১ ডিচেম্বৰত ইম্ফলত উপস্থিত হোৱাৰ লগে লগে ৰাষ্ট্ৰপতিগৰাকীক গাৰ্ড অব্ অনাৰ প্ৰদান কৰা হ’ব । ইয়াৰ পিছত তেওঁ ঐতিহাসিক মাপাল কাংজেইবুং ভ্ৰমণ কৰিব, য’ত তেওঁ প’লো প্ৰদৰ্শনী মেচ চাব ।

সন্ধিয়া ইম্ফলৰ চিটি কনভেনচন চেণ্টাৰত ৰাষ্ট্ৰপতিৰ সন্মানত ৰাজ্য চৰকাৰে নাগৰিক সম্বৰ্ধনা অনুষ্ঠান আয়োজন কৰিব । এই উপলক্ষে আধাৰশিলা স্থাপন কৰাৰ লগতে কেইবাটাও উন্নয়নমূলক প্ৰকল্প উদ্বোধন কৰিব ৰাষ্ট্ৰপতিগৰাকীয়ে ।

অহা ১২ ডিচেম্বৰত ৰাষ্ট্ৰপতিগৰাকীয়ে ইম্ফলৰ নুপি লাল স্মাৰক কমপ্লেক্স পৰিদৰ্শন কৰি মণিপুৰৰ বীৰাংগনাসকলক শ্ৰদ্ধাঞ্জলি জ্ঞাপন কৰিব । ইয়াৰ পিছতে সেনাপতি জিলাত এখন ৰাজহুৱা সভাত ভাষণ দিব, য’ত তেওঁ আধাৰশিলা স্থাপন কৰাৰ লগতে জিলাখনৰ বিভিন্ন প্ৰকল্প উদ্বোধন কৰিব ।

ইফালে ৰাষ্ট্ৰপতি দ্ৰৌপদী মুৰ্মুৰ দুদিনীয়া মণিপুৰ ভ্ৰমণৰ বাবে প্ৰস্তুতি তীব্ৰতৰ হৈ পৰিছে । ইম্ফল বিমানবন্দৰৰ পৰা নুপি লাল মেম’ৰিয়েল কমপ্লেক্সলৈকে প্ৰায় ৭ কিলোমিটাৰ দৈৰ্ঘ্যৰ পথটো পুনৰ ৰং কৰি ৰঙীন পতাকাৰে সজাই তোলা হৈছে ।

লগতে পঢ়ক : শ্বহীদ দিৱসত অসম আন্দোলনৰ শ্বহীদলৈ শ্ৰদ্ধাঞ্জলি জ্ঞাপন প্ৰধানমন্ত্ৰী মোদীৰ