সংযুক্ত আৰব আমিৰশ্বাহীৰ ৰাজধানীত অৱস্থিত BAPS হিন্দু মন্দিৰ আবুধাবি সাময়িকভাৱে বন্ধ কৰি দিয়া হৈছে

সাম্প্ৰতিক পৰিস্থিতিৰ বাবে সংযুক্ত আৰব আমিৰশ্বাহীৰ ৰাজধানীত অৱস্থিত BAPS হিন্দু মন্দিৰ আবুধাবি সাময়িকভাৱে বন্ধ কৰি দিয়া হৈছে । মন্দিৰ প্ৰশাসনে ঘোষণা কৰে যে সোমবাৰৰ পৰা পৰৱৰ্তী জাননী নিদিয়ালৈকে মন্দিৰটো ভক্ত আৰু দৰ্শনাৰ্থীৰ বাবে বন্ধ থাকিব । এই আদেশ প্ৰথমে ৯ মাৰ্চলৈকে বৃদ্ধি কৰা হৈছিল ।

মন্দিৰৰ আৱাসী স্বামী আৰু সন্তসকলে মন্দিৰৰ ভিতৰতে নিয়মীয়াকৈ প্ৰাৰ্থনা আৰু পূজা অব্যাহত ৰাখিব । মন্দিৰ প্ৰশাসনৰ মতে তেওঁলোকে শান্তি, নিৰাপত্তা আৰু দেশ আৰু বিশ্বৰ সকলো মানুহৰ মংগলৰ বাবে প্ৰাৰ্থনা কৰিব । মন্দিৰটোৱে জনসাধাৰণক শান্ত হৈ থাকিবলৈ, কোনো ধৰণৰ উৰাবাতৰি পৰিহাৰ কৰিবলৈ, যিমান পাৰি ঘৰৰ ভিতৰতে থাকিবলৈ আহ্বান জনাইছে । চৰকাৰী সংস্থাসমূহে জাৰি কৰা চৰকাৰী সুৰক্ষা নিৰ্দেশনাসমূহো কঠোৰভাৱে পালন কৰিবলৈ সকলোকে আহ্বান জনাইছে মন্দিৰ কৰ্তৃপক্ষই ।

সংযুক্ত আৰব আমিৰশ্বাহীৰ ৰাজধানীত অৱস্থিত বোচনৱাছি শ্ৰী অক্ষৰ পুৰুষোত্তম স্বামীনাৰায়ণ মন্দিৰ (BAPS) ইউ এ ইৰ সৰ্ববৃহৎ হিন্দু মন্দিৰ । ভাৰতীয় স্থাপত্য, সংস্কৃতি, বিশ্বাসৰ এক অনন্য প্ৰতীক হিচাপে ই আত্মপ্ৰকাশ কৰিছে । প্ৰায় ২৭ একৰ মাটিত বিস্তৃত এই মন্দিৰ কমপ্লেক্সটো পৰম্পৰাগত নাগাৰা শৈলীত নিৰ্মাণ কৰা হৈছে, যিয়ে উত্তৰ ভাৰতৰ প্ৰাচীন মন্দিৰ স্থাপত্যক প্ৰতিনিধিত্ব কৰে ।

লগতে পঢ়ক : ইৰাণৰ নতুন সৰ্বোচ্চ নেতা মোজতাবা খামেনেইক শুভেচ্ছা পুটিনৰ