ভাৰতৰ প্ৰাক্তন অল ৰাউণ্ডাৰ যুৱৰাজ সিঙে আই পি এল ২০২৭ৰ পৰা দিল্লী কেপিটেলছৰ সহায়ক কৰ্মচাৰীৰ সৈতে যোগদান কৰিব পাৰে।

আই পি এল ২০২৭ ৰ পূৰ্বে দিল্লী কেপিটেলছে নিজৰ চাপৰ্ট ষ্টাফ দলত এক ডাঙৰ পৰিৱৰ্তন কৰিবলৈ সাজু হৈছে। খবৰ অনুসৰি, ভাৰতীয় দলৰ প্ৰাক্তন তাৰকা অলৰাউণ্ডাৰ যুৱৰাজ সিঙক এতিয়া ফ্ৰেঞ্চাইজীটোৰ সৈতে এক নতুন ভূমিকাত দেখা পোৱা যাব পাৰে। যদি এনেকুৱা হয়, তেন্তে ই দিল্লী কেপিটেলচৰ বাবে এক ডাঙৰ টাৰ্ণিং পইণ্ট বুলি প্ৰমাণিত হ’ব পাৰে।

এক প্ৰতিবেদন অনুসৰি, ভাৰতৰ প্ৰাক্তন অলৰাউণ্ডাৰ যুৱৰাজ সিং আই পি এলৰ পৰা দিল্লী কেপিটেলছৰ চাপৰ্ট ষ্টাফত অন্তৰ্ভুক্ত হ’ব পাৰে। আনহাতে, সৌৰভ গাংগুলীয়ে পুনৰ ফ্ৰেঞ্চাইজীটোৰ নিয়ন্ত্ৰণ হাতলৈ লোৱাৰ লগে লগে তেওঁক চাপৰ্ট ষ্টাফৰ প্ৰধান হিচাপে নিযুক্তি দিয়াৰ সম্ভাৱনা আছে।

৪৪ বছৰীয়া যুৱৰাজ সিং যুৱ খেলুৱৈসকলৰ মাজত অতি জনপ্ৰিয়। তেওঁ অভিষেক শৰ্মা, শুভমন গিল আৰু প্ৰভচিমৰন সিঙৰ দৰে খেলুৱৈসকলক কোনোবা নহয় কোনোবা স্তৰত প্ৰশিক্ষণ দিছে। এই বাবেই দিল্লী কেপিটেলছে এই বিস্ফোৰক বেটছমেন আৰু কাৰ্যকৰী লেফট্-আৰ্ম স্পিনাৰজনক নিজৰ সৈতে জড়িত কৰাৰ সিদ্ধান্ত লৈছে। এটা সূত্ৰই কয়, “যুৱৰাজ সিঙৰ দৰে খেলুৱৈ এজন ডাগআউটত থকাটো কোনে নিবিচাৰিব? তেওঁৰ কেইবাজনো প্ৰাক্তন সতীৰ্থ যেনে আশীষ নেহৰা, জহীৰ খান আৰু বীৰেন্দ্ৰ সেহৱাগে ইতিমধ্যে আইপিএলত কোচিং কৰাইছে। যুৱৰাজে অলপ পলমকৈ হ’লেও যুৱ খেলুৱৈসকলৰ সৈতে বহুত সময় কটাইছে আৰু এই ভূমিকাৰ প্ৰয়োজনীয়তা ভালদৰে বুজি পাইছে।”

জানিব পৰা মতে, তেওঁ কেৱল প্ৰশিক্ষণেই নিদিয়ে, বৰঞ্চ খেলুৱৈসকলক মেণ্টৰশ্বিপো কৰে। এইয়া কেৱল ফোনকল বা ভাৰ্চুৱেল অধিবেশনতে সীমাবদ্ধ নহয়; তেওঁ খেলপথাৰত ঘণ্টাৰ পিছত ঘণ্টা সময় কটায় আৰু ৰ’দৰ মাজতে নেটৰ পিছফালে থিয় হৈ খেলুৱৈসকলৰ সৈতে কাম কৰে। তেওঁৰ এই বাস্তৱিক পদ্ধতি বহু খেলুৱৈৰ বাবে লাভজনক প্ৰমাণিত হৈছে।

যুৱৰাজ সিঙৰ আইপিএল কেৰিয়াৰ ১১ বছৰ দীঘলীয়া আছিল, য’ত তেওঁ ১৩২ খন মেচত ২৭৫০ ৰান সংগ্ৰহ কৰিছিল। তেওঁৰ গড় আছিল ২৪.৭৭ আৰু ষ্ট্ৰাইক ৰেট আছিল ১২৯। তেওঁ ১৩ টা অৰ্ধশতক অৰ্জন কৰিছিল, আনহাতে তেওঁৰ সৰ্বাধিক স্ক’ৰ আছিল ৮৩ ৰান। এতিয়া তেওঁৰ এই অভিজ্ঞতাই দিল্লী কেপিটেলছৰ পতনমুখী স্থিতি উন্নত কৰিব পাৰে। অক্ষৰ পেটেলৰ নেতৃত্বাধীন দলটোৱে আই পি এল ২০২৬ত আশা অনুসৰি প্ৰদৰ্শন কৰিব নোৱাৰিলে। দলটো গুৰুত্বপূৰ্ণ মুহূৰ্তত বেটিং ব্যৰ্থ হৈছিল, আনহাতে বলিং বিভাগো দুৰ্বল দেখা গৈছিল। বৰ্তমান দলটোৰ কোচিং ষ্টাফত ক্ৰিকেট ডাইৰেক্টৰ হিচাপে ভেনুগোপাল ৰাও, হেড কোচ হিচাপে হেমাং বদানী, এছিষ্টেণ্ট কোচ হিচাপে ইয়ান বেল আৰু বলিং কোচ হিচাপে মুনাফ পেটেল অন্তৰ্ভুক্ত হৈ আছে। এতিয়া যুৱৰাজ সিং এই ছেটআপৰ সৈতে জড়িত হ’লে দিল্লী কেপিটেলছক এক নতুন দিশ দিব পাৰিবনে নাই, সেয়া চোৱাটো আকৰ্ষণীয় হ’ব।

লগতে পঢ়ক: চলিত ফিফা বিশ্বকাপত দ্বিতীয়টো হেটট্ৰিকঃ কাটাৰক ৬-০ ব্যৱধানত ধূলিস্যাৎ আয়োজক কানাডাৰ