কাৰুৰ ঘটনা সন্দৰ্ভত অভিনেতা বিজয়ৰ প্ৰথমটো প্ৰতিক্ৰিয়া

শনিবাৰে তামিলনাডুৰ কাৰুৰত টিভিকেৰ এক ৰেলীত ভয়াৱহ ঘটনা সংঘটিত হয় । এই ঘটনাত পদপিষ্ট হৈ ৩৮ জন লোকৰ মৃত্যু হোৱা বুলি জানিব পৰা হৈছে । আনহাতে ঘটনাত আহত ৫০ জনতকৈ অধিক লোক চিকিৎসালয়ত চিকিৎসাধীন হৈ আছে । অভিনেতাৰ পৰা ৰাজনীতিবিদ হোৱা বিজয়ে এই শোকাৱহ ঘটনা সন্দৰ্ভত প্রথমটো প্রতিক্রিয়া প্রকাশ কৰিছে ৷

কাৰুৰৰ এই শোকাৱহ ঘটনা সন্দৰ্ভত ৰাজনীতিবিদ তথা অভিনেতা বিজয়ে প্ৰথম বিবৃতি প্ৰকাশ কৰিছে । তেওঁ কয় যে তেওঁ হৃদয় ভাগিছে আৰু অসহ্য যন্ত্ৰণাত ভুগিছে ।

ছ’চিয়েল মিডিয়া প্লেটফৰ্ম এক্সত বিজয়ে লিখিছে, “মোৰ হৃদয় ভাঙি গৈছে । মই শব্দৰে প্ৰকাশ কৰিব নোৱাৰা অসহ্য, অবৰ্ণনীয় যন্ত্ৰণা আৰু দুখত আছো । কাৰুৰত প্ৰাণ হেৰুওৱা মোৰ মৰমৰ ভাতৃ-ভগ্নী সকলৰ প্ৰতি গভীৰ শোক প্ৰকাশ কৰিছো আৰু পৰিয়ালবৰ্গলৈ সমবেদনা জ্ঞাপন কৰিছো ।”

লগতে চিকিৎসালয়ত চিকিৎসাধীন হৈ থকা আহতসকলৰ আশু আৰোগ্যৰ বাবেও বিজয়ে প্ৰাৰ্থনা কৰে । তেওঁ আহতসকল শীঘ্ৰেই আৰোগ্য লাভ কৰিব বুলি আশা প্ৰকাশ কৰে ।

ইফালে তামিলনাডু চৰকাৰে ঘোষণা কৰিছে যে এই দুৰ্ঘটনাত প্ৰাণ হেৰুওৱা লোকসকলৰ পৰিয়ালে মুখ্যমন্ত্ৰীৰ ৰাজহুৱা সাহায্য পুঁজিৰ পৰা ১০ লাখ টকাকৈ লাভ কৰিব । ইয়াৰ উপৰিও চিকিৎসালয়ত চিকিৎসাধীন হৈ থকাসকলে ১ লাখ টকাকৈ লাভ কৰিব ।

লগতে পঢ়ক : ৰাজনৈতিক সমাৱেশত ভয়ংকৰ ঘটনা; পদপিষ্ট হৈ ৩১ জনৰ মৃত্যু