নৰৱেৰ ৰাজধানী ওচলোত এক লাখতকৈও অধিক সমৰ্থক একত্ৰিত হৈ নিজৰ প্ৰিয় খেলুৱৈসকলক ৰাজকীয় আদৰণি জনায়
ফিফা বিশ্বকাপ ২০২৬-ত নৰৱেৰ স্মৰণীয় অভিযান কোৱাৰ্টাৰ ফাইনেলতে থমকি ৰ’ল । ইংলেণ্ডৰ বিৰুদ্ধে অতিৰিক্ত সময়ত ২-১ গ’লত পৰাজিত হৈ দলটোৰ বিশ্বকাপ জিকাৰ সপোন ভংগ হয় যদিও নিজ দেশত খেলুৱৈসকলক নায়কৰ দৰে আদৰণি জনোৱা হৈছে । সোমবাৰে নৰৱেৰ ৰাজধানী ওচলোত এক লাখতকৈও অধিক সমৰ্থক একত্ৰিত হৈ নিজৰ প্ৰিয় খেলুৱৈসকলক ভব্য আদৰণি জনায় আৰু সমগ্ৰ দেশজুৰি উৎসৱমুখৰ পৰিৱেশৰ সৃষ্টি হয় ।
ৰাজপ্ৰসাদত ৰজাৰ সৈতে সাক্ষাৎ
বিশ্বকাপৰ পৰা বিদায় লৈ ওচলোত উপস্থিত হোৱাৰ লগে লগে নৰৱে ফুটবল দলটোক পৰম্পৰাগত ‘ৱাটাৰ কেনন চালুট’ প্ৰদান কৰা হয় । ইয়াৰ পিছতে চহৰখনত এক বিশাল ৰোড শ্ব’ আয়োজন কৰা হয় । দলটোৰ খেলুৱৈসকলে প্ৰথমে ৰাজপ্ৰসাদত ৰজা হাৰাল্ডৰ সৈতে এক সৌজন্যমূলক সাক্ষাতত মিলিত হয় । ইয়াৰ পিছতে খেলুৱৈসকলে প্ৰসাদৰ বাৰাণ্ডাৰ পৰা সমবেত হাজাৰ হাজাৰ সমৰ্থকক অভিবাদন জনায় ।
এই আনন্দৰ মুহূৰ্ততে ক্ৰাউন প্ৰিন্স হাকনে নিজে ড্ৰাম বজাই দলৰ পৰম্পৰাগত শ্লোগান “ভাইকিং ৰ’ (Viking row)”-ৰ নেতৃত্ব দিয়ে । অৱশ্যে, এক জৰুৰী বিমান ধৰিবলগীয়া হোৱা বাবে দলৰ তাৰকা ষ্ট্ৰাইকাৰ আৰ্লিং হালেণ্ড আৰু মিডফিল্ডাৰ চাণ্ডাৰ বাৰ্গে এই উদযাপনত উপস্থিত থাকিব নোৱাৰিলে ।
“বাহিৰত থকাটো ভাল, ঘৰত থকাটোৱেই শ্ৰেষ্ঠ”
নৰৱেৰ ৰাষ্ট্ৰীয় ফুটবল দলে তেওঁলোকৰ অফিচিয়েল এক্স হেণ্ডেলত এই ঐতিহাসিক আদৰণিৰ এটা ভিডিঅ’ শ্বেয়াৰ কৰিছে । ইয়াৰ কেপচনত তেওঁলোকে নৰৱেৰ জনপ্ৰিয় প্ৰবাদ— “Borte bra, hjemme best” (বাহিৰত থকাটো ভাল, ঘৰত থকাটোৱেই শ্ৰেষ্ঠ)— বুলি উল্লেখ কৰিছে । সমগ্ৰ দেশে দলটোৰ এই অভূতপূৰ্ব প্ৰদৰ্শনক লৈ গৌৰৱ অনুভৱ কৰিছে ।
অভাৰহেড কেবল আৰু এক ব্যংগাত্মক সংযোগ!
ওচলোৰ মাজেৰে যোৱা মুকলি বাছৰ পেৰেডটোত ইমানেই ভিৰ হৈছিল যে আৰক্ষীয়ে সমৰ্থকৰ ভীৰ আঁতৰাই বাছখন কিছুসময় পিছহুহকাই আনিবলগীয়া হৈছিল । কেৱল এয়াই নহয়, ৰাস্তাৰ কম ওখ অভাৰহেড কেবলৰ (বিদ্যুৎ বা সংযোগকাৰী তাঁৰ) বাবে বাছখন স্তব্ধ হৈ পৰে আৰু ওপৰৰ ডেকত থকা খেলুৱৈসকল বহিবলৈ বাধ্য হয় ।
এই কেবলৰ ঘটনাটোক লৈ ছচিয়েল মিডিয়াত চৰ্চা আৰম্ভ হৈছে । আচলতে ইংলেণ্ডৰ বিৰুদ্ধে মেচখনৰ পিছত প্ৰশিক্ষক চলবাক্কেনে অভিযোগ কৰিছিল যে জুড বেলিংহামৰ সমতা স্থাপনকাৰী গ’লটোৰ ঠিক আগে আগে বলটোৱে ষ্টেডিয়ামৰ কেমেৰা কেবলত খুন্দা খাইছিল । অৱশ্যে ফিফাই এই দাবী বাৰে বাৰে নাকচ কৰি আহিছে ।
সকলো বাধা-বিঘিনি নেওচি অৱশেষত পেৰেডটো চিটি হ’ল স্কোৱাৰত উপস্থিত হয়, য’ত ধৈৰ্য্যৰে বাট চাই থকা হাজাৰ হাজাৰ সমৰ্থকে খেলুৱৈসকলৰ সৈতে নৰৱেৰ এই ঐতিহাসিক বিশ্বকাপ যাত্ৰাক উদযাপন কৰে ।
লগতে পঢ়ক : ফুটবল বিশ্বকাপৰ ৯৬ বছৰ: অলিম্পিকৰ পৰা মণ্টেভিডিঅ’ৰ ফাইনেললৈ ৰোমাঞ্চকৰ কাহিনী!
