নিশা বহু দেৰিলৈ ম’বাইল স্ক্রল কৰা, কামৰ হেঁচাত পলমকৈ শুৱা বা টোপনিৰ সৈতে বুজাবুজি কৰাটো বৰ্তমান সময়ত এক সুলভ অভ্যাসত পৰিণত হৈছে
বৰ্তমানৰ এই ব্যস্ততাপূৰ্ণ আধুনিক জীৱনশৈলীত বহু লোকৰ বাবেই অনিদ্ৰা বা টোপনিৰ সমস্যা এক ডাঙৰ প্ৰত্যাহ্বান হৈ পৰিছে । নিশা বহু দেৰিলৈ ম’বাইল স্ক্রল কৰা, কামৰ হেঁচাত পলমকৈ শুৱা বা টোপনিৰ সৈতে বুজাবুজি কৰাটো বৰ্তমান সময়ত এক সুলভ অভ্যাসত পৰিণত হৈছে । কিন্তু চিকিৎসক আৰু স্বাস্থ্য বিশেষজ্ঞসকলৰ মতে, ইয়াৰ কু-প্ৰভাৱ কেৱল টোপনিৰ ওপৰতেই নহয়, বৰঞ্চ পিছৰ দিনটোৰ কাৰ্যক্ষমতা, মানসিক মনোযোগ আৰু শাৰীৰিক শক্তিৰ ওপৰতো পৰে । সুস্বাস্থ্যৰ বাবে সুষম আহাৰ আৰু নিয়মিত ব্যায়াম যিমান প্ৰয়োজনীয়, শৰীৰৰ বাবে পৰ্যাপ্ত আৰু গভীৰ টোপনিও সিমানেই আৱশ্যকীয় ।
নিশাৰ ৰুটিন আৰু ‘চাৰ্কেডিয়ান ৰিদম’
বিশেষজ্ঞসকলৰ মতে, কেৱল বিছনালৈ যোৱাটোৱেই ভাল টোপনিৰ গেৰাণ্টি হ’ব নোৱাৰে । শুবলৈ যোৱাৰ ঠিক এক-দুই ঘণ্টা আগৰ আমাৰ অভ্যাসবোৰেহে টোপনিৰ মানদণ্ড নিৰ্ধাৰণ কৰে । প্ৰতিদিনে এক সুস্থ নিশাৰ ৰুটিন মানি চলিলে আমাৰ মগজুৱে জিৰণি লোৱাৰ সংকেত পায় । ই শৰীৰৰ প্ৰাকৃতিক স্লিপ-ৱেক চাইকেল অৰ্থাৎ ‘চাৰ্কেডিয়ান ৰিদম’ (Circadian rhythm) সক্ৰিয় কৰি ৰাখে, যাৰ ফলত স্বাভাৱিকভাৱে গভীৰ টোপনি আহে ।
শেহতীয়া এক সমীক্ষা আৰু চিকিৎসা বিজ্ঞানৰ গৱেষণাৰ আধাৰত, ৰাতি শুবলৈ যোৱাৰ আগতে গ্ৰহণ কৰিবলগীয়া ৫ টা স্বাস্থ্যকৰ নিয়ম তলত উল্লেখ কৰা হ’ল:
ভাল টোপনিৰ বাবে ৫ টা গোল্ডেন ৰুল-
শুবলৈ যোৱাৰ সময় স্থিৰ কৰক: প্ৰতিদিনে এক নিৰ্দিষ্ট সময়ত শুবলৈ যোৱা আৰু ৰাতিপুৱা প্ৰায় একেটা সময়তে বিছনা এৰাৰ অভ্যাস কৰক । আনকি বন্ধৰ দিন বা সপ্তাহান্ততো এই নিয়মৰ বেছি সালসলনি নকৰিব ।
ডিজিটেল ডিটক্স বা স্ক্ৰীন টাইম হ্ৰাস: শুবলৈ যোৱাৰ অন্ততঃ ৩০ ৰ পৰা ৬০ মিনিট আগতে ম’বাইল, লেপটপ আৰু টিভিৰ দৰে বৈদ্যুতিন সঁজুলি বন্ধ কৰি দিয়ক । এই স্ক্ৰীনবোৰৰ পৰা নিৰ্গত হোৱা ‘ব্লু লাইটে’ শৰীৰত মেলাটনিন হৰমনৰ উৎপাদন ব্যাহত কৰে, যাৰ বাবে টোপনি নাহে । ইয়াৰ পৰিৱৰ্তে কিতাপ পঢ়া বা মৃদু সংগীত শুনাৰ অভ্যাস কৰিব পাৰে ।
সময়মতে পাতল নৈশ আহাৰ: ৰাতিৰ আহাৰ সদায় শুবলৈ যোৱাৰ ২ ৰ পৰা ৩ ঘণ্টা আগতেই গ্ৰহণ কৰিব লাগে । গধুৰ বা তেলত ভজা খাদ্যই হজম ক্ৰিয়াত ব্যাঘাত জন্মায়, আনহাতে পাতল আৰু সুষম আহাৰে শৰীৰক আৰাম দিয়ে ।
কেফেইন আৰু মিঠা পানীয় বৰ্জন: সন্ধিয়া ৫ বজাৰ পিছত চাহ, কফি, কোনো ধৰণৰ এনাৰ্জি ড্ৰিংক বা অতিৰিক্ত চেনিযুক্ত পানীয় খোৱাৰ পৰা বিৰত থাকক । কেফেইনে মগজুক সজাগ কৰি ৰাখে, যাৰ ফলত টোপনিৰ স্বাভাৱিক প্ৰক্ৰিয়া নষ্ট হয় ।
শোৱা কোঠাৰ পৰিৱেশ: আপোনাৰ শোৱা কোঠাটো শান্ত, পৰিস্কাৰ আৰু অন্ধকাৰময় কৰি ৰাখক । কোঠাৰ উষ্ণতা যাতে অতি গৰম বা অতি ঠাণ্ডা নহয়, তাৰ প্ৰতি লক্ষ্য ৰাখিব । এনে পৰিৱেশে মগজুক ক্ষিপ্ৰতাৰে শান্ত হ’বলৈ সহায় কৰে ।
সাৱধান! এইবোৰ ভুলে কাঢ়ি নিব পাৰে আপোনাৰ নিশাৰ টোপনি
বিশেষজ্ঞসকসকলে সকীয়াই দিছে যে কেতবোৰ দৈনন্দিন ভুলে মানুহক লাহে লাহে ক্ৰনিক ইনচমনিয়া (অনিদ্ৰা ৰোগ)ৰ পিনে ঠেলি দিব পাৰে ।
টোপনি নষ্ট কৰা মূল কাৰকসমূহ:
-নিশা বহু দেৰিলৈ ছচিয়েল মিডিয়া চলাই থকা বা কাম কৰা ।
-শুবৰ পৰত মানসিক চাপ, চিন্তা বা উত্তেজনাপূৰ্ণ বিষয় লৈ চৰ্চা কৰা ।
-দিনৰ ভাগত বা আবেলি দীৰ্ঘসময় ধৰি শুই থকা ।
-শুবলৈ যোৱাৰ ঠিক আগে আগে উজ্জ্বল পোহৰৰ সংস্পৰ্শত থকা ।
যদি আপুনিও দিনটো এনাৰ্জেটিক আৰু ফ্ৰেছ হৈ থাকিব বিচাৰে, তেন্তে আজিৰ পৰাই নিজৰ নিশাৰ অভ্যাসবোৰ সলনি কৰক । মনত ৰাখিব, এক সুস্থ শৰীৰ আৰু তীক্ষ্ণ মগজুৰ মূল চাবিকাঠিয়েই হৈছে প্ৰতি নিশা ৭ ৰ পৰা ৮ ঘণ্টাৰ এক আৰামদায়ক টোপনি ।
লগতে পঢ়ক : সম্পৰ্কত দূৰত্ব বাঢ়িছে নেকি? আপোন সম্পৰ্কটোক পুনৰ জীয়াই তুলিবলৈ অনুসৰণ কৰক এই ৮ টা সহজ উপায়
