বাৰিষাৰ প্ৰাকৃতিক সৌন্দৰ্য উপভোগ কৰিবলৈ যদি আপুনি ওলাই যাব খোজে, তেন্তে আগতীয়াকৈ সঠিক প্ৰস্তুতি চলাই লোৱাটো অতি প্ৰয়োজনীয়
মৌচুমী বায়ুৰ আগমনৰ লগে লগে আৰম্ভ হোৱা ধাৰাসাৰ বৰষুণ আৰু ঠাণ্ডা বতাহজাক সকলোৰে বাবে অতি প্ৰিয় । কিন্তু এই সুন্দৰ ঋতুটোৱেই আকৌ ভ্ৰমণকাৰীসকলৰ বাবে কঢ়িয়াই আনিব পাৰে একাধিক প্ৰত্যাহ্বান । হঠাতে হোৱা প্ৰবল বৰষুণ, বানপানী আৰু পিছল ৰাস্তাৰ বাবে যাত্ৰাত ব্যাঘাত জন্মাটো এতিয়া এক স্বাভাৱিক কথা ।
তথাপিও, বাৰিষাৰ প্ৰাকৃতিক সৌন্দৰ্য উপভোগ কৰিবলৈ যদি আপুনি ওলাই যাব খোজে, তেন্তে আগতীয়াকৈ সঠিক প্ৰস্তুতি চলাই লোৱাটো অতি প্ৰয়োজনীয় । আজিৰ এই প্ৰতিবেদনত আমি আপোনাৰ বাবে লৈ আহিছোঁ কিছুমান সহজ অথচ অতি কাৰ্যকৰী মনছুন ট্ৰেভেল টিপছ, যাৰ সহায়ত আপোনাৰ যাত্ৰা হ’ব সুৰক্ষিত আৰু আৰামদায়ক ।
সঠিক কাপোৰ আৰু জোতা বাছনি কৰক-
-বাৰিষাৰ দিনত ভ্ৰমণ কৰোঁতে বেগৰ সামগ্ৰীসমূহ বৰষুণৰ পানীৰ পৰা সুৰক্ষিত কৰি ৰখাটো আটাইতকৈ গুৰুত্বপূৰ্ণ ।
-সদায় এনেকুৱা কাপোৰ লগত ৰাখক যিবোৰ সোনকালে শুকাই যায় আৰু বেছি সময় তিতি নাথাকে (যেনে- নাইলন বা পলিয়েষ্টাৰ)।
-আপোনাৰ বেগত এটা ভাল মানৰ ৰেইনকোট বা সহজে জাপি থব পৰা ছাটি নিশ্চিতভাৱে ৰাখিব ।
–জোতা বাছনি কৰোঁতে বিশেষ সাৱধান হওক । এনে জোতা পিন্ধক যিবোৰ মজবুত, পানী প্ৰতিৰোধী আৰু আটাইতকৈ গুৰুত্বপূৰ্ণভাৱে পিছল নোখোৱা হয় ।
-বৰষুণৰ দিনত চেন্দেল বা ফ্লিপ-ফ্লপ পিন্ধাৰ পৰা বিৰত থাকক, কাৰণ এইবোৰ বোকা-পানীত সোনকালে পিছল খায় ।
বতৰৰ আগজাননী পৰীক্ষা কৰক-
যিকোনো ঠাইলৈ যাত্ৰা কৰাৰ আগতে বতৰৰ খবৰ লোৱাটো অত্যন্ত জৰুৰী । বিশেষকৈ পাহাৰীয়া আৰু সাগৰ তীৰৰ অঞ্চলসমূহত বাৰিষাৰ সময়ত প্ৰবল বৰষুণ, ভূমিস্খলন আৰু কৃত্ৰিম বানৰ সমস্যা অধিক হোৱা দেখা যায় । বতৰৰ শেহতীয়া আপডেটসমূহ জানিবলৈ বিশ্বাসযোগ্য মোবাইল এপছ ব্যৱহাৰ কৰক, যাতে বেয়া বতৰৰ বাবে আপোনাৰ ভ্ৰমণৰ আনন্দ মাটি হৈ নাযায় ।
ইলেকট্ৰনিক সামগ্ৰী আৰু নথি-পত্ৰ সুৰক্ষিত কৰক-
বৰষুণৰ বতৰত সচৰাচৰ ব্যৱহৃত গেজেট যেনে- ফোন, পাৱাৰ বেংক, কেমেৰা আদি পানী সোমাই সোনকালে নষ্ট হ’ব পাৰে ।
-এইবোৰ সুৰক্ষিত কৰি ৰাখিবলৈ সদায় ৱাটাৰপ্ৰুফ পাউচ বা এয়াৰটাইট জিপ বেগ ব্যৱহাৰ কৰক ।
-কেৱল ইলেকট্ৰনিক সামগ্ৰীয়েই নহয়, আপোনাৰ চিনাক্তকৰণ পত্ৰ, ট্ৰেভেল ইনশ্বিঅ’ৰেন্স আৰু যাত্ৰাৰ অনুমতি পত্ৰৰ দৰে প্ৰয়োজনীয় নথি-পত্ৰৰ হাৰ্ড কপিও ৱাটাৰপ্ৰুফ কভাৰত সুমুৱাই ৰাখিব ।
-কেমেৰা বা ফোনৰ বেগত ওদাল বা সেমেকা ভাৱ দূৰ কৰিবলৈ ছিলিকা জেলৰ সৰু পেকেট ব্যৱহাৰ কৰিব পাৰে ।
ভ্ৰমণৰ পৰিকল্পনা নমনীয় কৰক-
বাৰিষাৰ সময়ত বতৰৰ অস্বাভাৱিক পৰিৱৰ্তনৰ বাবে ফ্লাইট, ট্ৰেইন বা পথ যাত্ৰাত পলম হোৱাটো এক সাধাৰণ সমস্যা । গতিকে আপোনাৰ ভ্ৰমণৰ সময়সূচী সদায় অলপ ফ্লেক্সিবল বা নমনীয় কৰি ৰাখক, যাতে সময়ৰ ইফাল-সিফাল হ’লেও আপুনি মানসিক চাপত পৰিবলগীয়া নহয় । ইয়াৰ উপৰিও, এনেকুৱা ট্ৰেভেল ইনশ্বিঅ’ৰেন্স লোৱাৰ কথা চিন্তা কৰিব পাৰে যিয়ে বেয়া বতৰৰ বাবে হোৱা লোকচান বা টিকট বাতিলৰ খৰচ কভাৰ কৰে ।
বাহিৰৰ খাদ্য খোৱাৰ পৰা বিৰত থাকক-
বাৰিষাৰ বতৰত পানী আৰু খাদ্যৰ জৰিয়তে সংক্ৰমণ হোৱাৰ সম্ভাৱনা আটাইতকৈ বেছি থাকে । গতিকে ভ্ৰমণৰ সময়ত বাট-পথৰ মুকলি খাদ্য বা ষ্ট্ৰীট ফুড খোৱাৰ পৰা একেবাৰেই বিৰত থাকক ।
-সংক্ৰমণৰ পৰা বাচিবলৈ সদায় সতেজ, পৰিষ্কাৰ আৰু গৰম খাদ্যহে গ্ৰহণ কৰিব ।
-জৰুৰীকালীন অৱস্থাৰ বাবে আৰু শৰীৰৰ শক্তি বজাই ৰাখিবলৈ নিজৰ ট্ৰেভেল বেগত সদায় বাদাম, প্ৰ’টিন বাৰ আৰু ড্ৰাই ফ্ৰুটছ আদি লগত ৰাখিব ।
বাৰিষাৰ ভ্ৰমণ আনন্দদায়ক হ’ব পাৰে যদিহে আপুনি সুৰক্ষাৰ দিশটাত গুৰুত্ব দিয়ে । ওপৰত উল্লেখ কৰা এই সৰু সৰু টিপছকেইটা অনুসৰণ কৰিলে আপুনি কোনো ধৰণৰ অপ্ৰত্যাশিত সমস্যাৰ সন্মূখীন নোহোৱাকৈয়ে বৰষুণৰ ঋতুৰ প্ৰাকৃতিক সৌন্দৰ্য্যৰ সম্পূৰ্ণ আনন্দ ল’ব পাৰিব ।
সতৰ্কীকৰণ: ইয়াত দিয়া তথ্যসমূহ সাধাৰণ বিশ্বাস আৰু বিভিন্ন মাধ্যমৰ পৰা সংগ্ৰহিত তথ্যৰ ওপৰত আধাৰিত । কোনো ধৰণৰ ভ্ৰমণ পৰিকল্পনা কৰাৰ পূৰ্বে বা জৰুৰীকালীন অৱস্থাত স্থানীয় প্ৰশাসনৰ অফিচিয়েল গাইডলাইন আৰু বতৰ বিজ্ঞান কেন্দ্ৰৰ সঠিক আগজাননী নিশ্চয়কৈ পৰীক্ষা কৰি ল’ব ।
লগতে পঢ়ক : সফলতা আৰু স্বাস্থ্যৰ বাবে অপৰিহাৰ্য ডিজিটেল উপবাস…
