ইংলেণ্ডৰ বিৰুদ্ধে টি-২০ ত ভাৰতৰ শোচনীয় পৰাজয়ৰ পিছত ফাষ্ট বলাৰ জোফ্ৰা আৰ্চাৰে কয় যে, এতিয়া হিচাপ সমান হৈছে।
ধাৰাবাহিকভাৱে দুখন মেচত পৰাজিত হোৱাৰ পিছত এফালে যিদৰে ভাৰতীয় টীম হতাশা হৈছে, আনফালে আকৌ ইংলেণ্ড দলৰ খেলুৱৈসকলে ভাৰতীয় বেটাৰসকলক কটাক্ষ কৰাৰ কোনো সুযোগেই এৰা নাই। তাৰকা ফাষ্ট বলাৰ জোফ্ৰা আৰ্চাৰৰ মতে, ভাৰতত বিশেষকৈ আইপিএলৰ সময়ত”সহজ উইকেট আৰু চুটি বাউণ্ডেৰী”ত খেলাৰ পিছত ইংলেণ্ডৰ পৰিৱেশত বলিং কৰাটো আচলতে “স্বাভাৱিক” অৱস্থালৈ ঘূৰি অহাৰ দৰে।
ট্ৰেণ্ট ব্ৰীজত অনুষ্ঠিত হোৱা মেচখনত ২০৩ ৰানৰ লক্ষ্য খেদিবলৈ গৈ ভাৰতীয় দলটো মাত্ৰ ১১.৪ অভাৰৰ ৭৬ ৰানতে অল-আউট হয়, যিটো টি-২০ ত ৰানৰ ক্ষেত্ৰত ভাৰতে নিজৰ ইতিহাসৰ আটাইতকৈ ডাঙৰ পৰাজয়ৰ মুখ দেখিবলগীয়া হয়।
টি-২০ আন্তঃৰাষ্ট্ৰীয় (T20I) ক্ৰিকেটত ৰানৰ হিচাপত মেচৰ শেষৰ সংবাদমেলত আৰ্চাৰক সোধা হৈছিল যে আইপিএলত ইমানবোৰ ভাৰতীয় বেটাৰৰ বিৰুদ্ধে খেলাৰ পিছত ইয়াত তেওঁলোকক বলিং কৰাৰ পৰিকল্পনা কিমান সলনি হয়? উত্তৰত আৰ্চাৰে কয়,”মোৰ ধাৰণা ইয়ালৈ আহিলে সকলো স্বাভাৱিক হৈ পৰে। আপুনি কেৱল এটা ভাল লেন্থত বলটো পোনকৈ পেলাবলৈ চেষ্টা কৰিব লাগে। কিন্তু ভাৰতত, যিহেতু উইকেটবোৰ ইমান সহজ আৰু বাউণ্ডেৰীবোৰ ইমান চুটি, আপুনি সঁচাকৈয়ে বহুত বেছি নিখুঁত হ’ব লগা হয়। ইয়াত মোৰ মনে কয় ভুল শুধৰোৱাৰ সুযোগ অলপ বেছি থাকে।”
এই শৃংখলাৰ আটাইতকৈ আকৰ্ষণীয় প্ৰতিযোগিতাবোৰৰ ভিতৰত অন্যতম আছিল আৰ্চাৰ আৰু তেওঁৰ ৰাজস্থান ৰয়েলছৰ সতীৰ্থ বৈভৱ সূৰ্যবংশীৰ মাজৰ যুঁজখন। ১৫ বছৰীয়া এই প্ৰতিভাশালী যুৱ খেলুৱৈজনে মানচেষ্টাৰত নিজৰ টি-২০ অভিষেক মেচখনতে আৰ্চাৰৰ প্ৰথমটো বলতে ছিক্সাৰ কোবাই নিজৰ আগমনৰ বাৰ্তা দিছিল।
কিন্তু ট্ৰেণ্ট ব্ৰীজত আৰ্চাৰে ইয়াৰ প্ৰত্যুত্তৰ দিয়ে। তেওঁ এই কিশোৰ বেটাৰজনক ১৪৫ কিমি প্ৰতি ঘণ্টাৰ এটা গতিশীল বাউন্সাৰেৰে পৰাস্ত কৰি মাত্ৰ ১৩ ৰানতে পেভিলিয়নলৈ উভতাই পঠিয়াই। এই বৰ্ধিত প্ৰতিযোগিতাৰ বিষয়ে সোধাত আৰ্চাৰে হাঁহি মুখে কয় “ঠিক আছে, হয়, মোৰ ধাৰণা এতিয়া হিচাব সমান হৈছে। কিন্তু আমাৰ হাতত এতিয়াও দুখন খেল বাকী আছে আৰু খেলখন যিকোনো দিশলৈ যাব পাৰে, গতিকে যি সৰ্বশ্ৰেষ্ঠ তেৱেঁই জিকক।”
আৰ্চাৰে লগতে কয় যে ট্ৰেণ্ট ব্ৰীজত ২০০ তকৈ অধিক ৰান কৰাটো সদায় কঠিন, আইপিএলৰ দৰে নহয়, য’ত এনে স্ক’ৰক প্ৰায়ে গড়তকৈ কম বুলি গণ্য কৰা হয়। তেওঁ আৰু কয় “আইপিএলত কেতিয়াবা ২০০ ৰানো সুৰক্ষিত নহয়। কিন্তু এই উইকেটত ২০০ ৰানৰ স্ক’ৰ থকাৰ পিছত মই এইটো ক’ব নিবিচাৰোঁ যে আমি একেবাৰে নিশ্চিত আছিলোঁ কিন্তু মোৰ অনুভৱ হৈছিল যে এই লক্ষ্যত উপনীত হ’বলৈ সঁচাকৈয়ে এটা বিশেষ ইনিংছৰ প্ৰয়োজন হ’ব। মই আনন্দিত যে সকলোৱে অৱদান আগবঢ়াইছে। আজি যিয়েই বলিং কৰিছে, তেৱেঁই উইকেট পাইছে, গতিকে এয়া এক নিখুঁত বলিং প্ৰদৰ্শন আছিল।”
ইউকেৰ পৰিৱেশ ভাৰতীয় বেটাৰসকলৰ বাবে বহুত বেছি প্ৰত্যাহ্বানমূলক প্ৰমাণিত হৈছে। আয়াৰলেণ্ডৰ বিৰুদ্ধে টি-২০ শৃংখলাত পৰাজিত হোৱাৰ পিছত, ভাৰতীয় দলটো এতিয়া ইংলেণ্ডৰ বিৰুদ্ধে পাঁচখনীয়া শৃংখলাত ০-২ ব্যৱধানত পিছপৰি পৰিছে।
যেতিয়া সোধা হৈছিল যে তেওঁলোকৰ গতি ভাৰতীয় বেটাৰসকলৰ বাবে অত্যাধিক আছিল নেকি, আৰ্চাৰে কয় যে এয়া কেৱল গতিৰে কথা নাছিল, বৰঞ্চ অনুশাসিত প্ৰয়োগৰ বাবেহে সম্ভৱ হৈছিল। তেওঁ আৰু কয় ” তেনে নহয়। মোৰ ধাৰণা আমি দুয়ো মানচেষ্টাৰতো যথেষ্ট ভাল বলিং কৰিছিলোঁ। তাত দেখুৱাবলৈ আমাৰ কাৰো হাতত উইকেট নাছিল, গতিকে আমি সুখী যে আজি কিছু উইকেট পালোঁ। মোৰ অনুভৱ হোৱা নাছিল যে বলিং ইমান বেছি গতিশীল আছিল, সঁচা ক’বলৈ গ’লে ইয়াতকৈ অলপ খৰতকীয়া হ’ব পাৰিলেহেঁতেন। কিন্তু বতাহ বহুত জোৰেৰে বলাৰ বাবে হাতৰ পৰা ওলোৱা গতিটো মই সিমান অনুভৱ কৰিব পৰা নাছিলোঁ।”
লগতে পঢ়ক: ক্ৰিকেট ইতিহাসৰ লজ্জাজনক পৰাজয়! ইংলেণ্ডৰ বিৰুদ্ধে ১২৫ ৰানত ধৰাশায়ী টীম ইণ্ডিয়া
