ফিফা বিশ্বকাপ ২০২৬ ত ইজিপ্তৰ দলটোৱে এক ঐতিহাসিক জয় অৰ্জন কৰে। দলটোৱে অষ্ট্ৰেলিকায় পেনাল্টী শ্বুটআউটত ৪-২ গ’লত পৰাস্ত কৰে।
ইজিপ্তে ইতিহাস ৰচনা কৰি ফিফা বিশ্বকাপৰ নকআউট পৰ্যায়ত নিজৰ প্ৰথমটো জয় পঞ্জীয়ন কৰিছে। পেনাল্টী শ্বুটআউটত ইজিপ্তে অ’ষ্ট্ৰেলিয়াক ৪-২ ব্যৱধানত পৰাস্ত কৰে। নিৰ্ধাৰিত আৰু অতিৰিক্ত সময়লৈকে দুয়োটা দলেই ১-১ গ’লত সমতা ৰক্ষা কৰি আছিল, যাৰ বাবে পেনাল্টী শ্বুটআউটৰ জৰিয়তে খেলখনৰ ভাগ্য নিৰ্ণয় কৰা হয়। এই ঐতিহাসিক জয়ৰ পিছত এতিয়া ৰাউণ্ড অৱ ১৬ ত ইজিপ্তৰ মুখামুখি হ’ব বৰ্তমানৰ চেম্পিয়ন আৰ্জেণ্টিনা। বিশেষ কথা এয়েই যে, বিশ্বকাপত ইজিপ্তৰ এয়া প্ৰথমখন নকআউট খেল আছিল।
খেলখনৰ ১৩ মিনিটত ইমাম আছৌৰে ইজিপ্তক উজ্জ্বল হেডাৰেৰে আগতীয়াকৈ ১-০ গ’লত অগ্ৰগতি প্ৰদান কৰে। দ্বিতীয়াৰ্ধৰ আৰম্ভণিতে ওমৰ মাৰমুছে অগ্ৰগতি দুগুণ কৰাৰ সুযোগ লাভ কৰিছিল যদিও তেওঁৰ শ্বটটো বাহিৰলৈ গৈছিল। ৫৫ মিনিটত অষ্ট্ৰেলিয়াই ১-১ গ’লত সমতা স্থাপন কৰে,অৱশ্যে ইজিপ্তৰ ডিফেণ্ডাৰ মহম্মদ হানিৰ ভুলৰ বাবেই এই গ’লটো আহিছিল। আইডেন অ’নিলে লোৱা ফ্ৰী কিকটো ক্লিয়াৰ কৰিবলৈ চেষ্টা কৰি থকাৰ সময়তে হানীয়ে নিজৰ গ’লৰক্ষক মোস্তাফা শ্বোবেইৰৰ পিছফালে বলটো নেটত ডিফ্লেক্ট কৰে।অৰ্থাৎ শেষত তেওঁ অ’ন গ’ল দিছিল।
পেনাল্টী শ্বুটআউটত ইজিপ্তৰ হৈ মেহমুদ ছাবেৰ, ৰামী ৰাবিয়া আৰু লিভাৰপুলৰ প্ৰাক্তন তাৰকা মহম্মদ ছালাহে প্ৰথম তিনিটা গ’ল কৰে। ইয়াৰ পিছত হোছাম আব্দেলমজীদে অন্তিমটো গ’ল দি নিজৰ দলৰ জয় নিশ্চিত কৰে। উল্লেখনীয় কথা এই যে, ছালাহে গ্ৰুপ পৰ্যায়ৰ অন্তিমখন খেলত হেমষ্ট্ৰীঙৰ আঘাত পোৱা স্বত্বেও এই খেলখনত খেলিবলৈ নামিছিল।
আনহাতে, অ’ষ্ট্ৰেলিয়াৰ আৰম্ভণি বেয়া আছিল যেতিয়া হেৰী সুটাৰে প্ৰথমটো শ্বট বতাহতে মাৰি পঠিয়াইছিল। ইয়াৰ পিছত ১৮ বছৰীয়া লুকাছ হেৰিংটনৰ চতুৰ্থটো প্ৰয়াস গ’ল পোষ্টৰ ওপৰৰ অংশত খুন্দা খায়। অ’ষ্ট্ৰেলিয়াৰ হৈ কেৱল জেকচন ইৰভিন আৰু এভাৰ মাবিলেহে শ্বুটআউটত গ’ল কৰিবলৈ সক্ষম হয়।
আটাইতকৈ আকৰ্ষণীয় কথাটো আছিল যে, অ’ষ্ট্ৰেলিয়াই শ্বুটআউটৰ বাবে অভিজ্ঞ গ’লৰক্ষক মেথিউ ৰিয়ানক পথাৰত নমাইছিল, কিন্তু তেওঁ ইজিপ্তৰ চাৰিটা শ্বটৰ এটাও ৰোধ কৰিব নোৱাৰিলে। এই পৰাজয়ৰ লগে লগে নকআউট পৰ্যায়ত অ’ষ্ট্ৰেলিয়াৰ ৰেকৰ্ড এতিয়া ০-৩ হ’ল, অৰ্থাৎ দলটোৱে একেৰাহে তৃতীয়বাৰৰ বাবে নকআউট মেচত পৰাজয়ৰ মুখ দেখিবলগীয়া হ’ল।
লগতে পঢ়ক: প্ৰি-কোৱাৰ্টাৰত আৰ্জেণ্টিনা; পৰাজয়ৰ পিছতো হৃদয় জয় কেপ ভাৰ্ডেৰ
