মুখ্যমন্ত্ৰী ড০ হিমন্ত বিশ্ব শৰ্মাই ভুৱা চিকিৎসক সন্দৰ্ভত এক ডাঙৰ তথ্য প্ৰদান কৰিছে। মুখ্যমন্ত্ৰী গৰাকীয়ে জনাইছে যে বিগত বছৰৰ পৰা ৬২ গৰাকী ভুৱা চিকিৎসকক গ্ৰেপ্তাৰ কৰা হৈছে।
মুখ্যমন্ত্ৰী ড০ হিমন্ত বিশ্ব শৰ্মাই সামাজিক মাধ্যম যোগে ২৬ জুনত ৰোগীক সুৰক্ষা প্ৰদান আৰু স্বাস্থ্যখণ্ডক অধিক শক্তিশালী কৰাৰ প্ৰয়াসত ২০২৫ চনৰ পৰা ৰাজ্যজুৰি ৬২ গৰাকী ভুৱা চিকিৎসকক গ্ৰেপ্তাৰ কৰাৰ কথা সদৰি কৰিছে।
তথ্য সদৰী কৰি মুখ্যমন্ত্ৰীগৰাকীয়ে কয় যে আৰক্ষীয়ে এতিয়ালৈকে এই অভিযানৰ সৈতে জড়িত ৫৯টা গোচৰ পঞ্জীয়ন কৰিছে। মুখ্যমন্ত্ৰী গৰাকীয়ে এক্স যোগে কৰা এক পোষ্টত কয়, “আমি আমাৰ সমাজৰ পৰা সকলো ধৰণৰ কু-সংস্কাৰ আঁতৰাবলৈ প্ৰতিশ্ৰুতিবদ্ধ। ড্ৰাগছ সৰবৰাহকাৰী আৰু বাল্য বিবাহৰ সৈতে জড়িত অপৰাধীসকলৰ বিৰুদ্ধে কঠোৰ ব্যৱস্থা গ্ৰহণৰ পিছত, এতিয়া আমি আমাৰ স্বাস্থ্যখণ্ডৰ পবিত্ৰতা ৰক্ষা কৰিবলৈ আৰু ৰোগীসকলক সুৰক্ষা দিবলৈ ভুৱা চিকিৎসকসকলৰ বিৰুদ্ধে এক অভিযান চলাই আছো।”
মুখ্যমন্ত্ৰী গৰাকীয়ে শ্বেয়াৰ কৰা এক ইনফোগ্ৰাফিকত উল্লেখ কৰা মতে, ৰাজ্যত ভুৱা চিকিৎসকৰ বিৰুদ্ধে চলাই থকা এই অভিযানৰ অধীনত এতিয়ালৈকে ৫৯টা গোচৰ পঞ্জীয়ন কৰা হৈছে আৰু ৬২ গৰাকী ভুৱা চিকিৎসকক গ্ৰেপ্তাৰ কৰা হৈছে।
ৰাজ্য চৰকাৰে বৈধ ডিগ্ৰী বা পঞ্জীয়ন নথকাকৈ চিকিৎসা সেৱা আগবঢ়োৱা ব্যক্তিসকলৰ বিৰুদ্ধে ব্যৱস্থা গ্ৰহণ তীব্ৰতৰ কৰি তুলিছে। বিগত এবছৰ ধৰি কৰ্তৃপক্ষই বিভিন্ন জিলাত অভিযান চলাই আইনী ব্যৱস্থা গ্ৰহণ কৰি আহিছে।
বিষয়া সকলৰ মতে, এই অভিযানৰ মূল লক্ষ্য হৈছে প্ৰৱঞ্চনামূলক চিকিৎসা ব্যৱস্থাক বাধা দিয়া, জনস্বাস্থ্য সুৰক্ষিত কৰা আৰু স্বাস্থ্যখণ্ডত বৃত্তিমূলক মানদণ্ড অক্ষুণ্ণ ৰখা।
লগতে পঢ়ক: ‘এটা দশকত অসমৰ মূলধনী ব্যয় ২৬ হাজাৰ কোটি টকা লৈ বৃদ্ধি হৈছে’; মুখ্যমন্ত্ৰী
