অভিষেক বেনাৰ্জীৰ কালিঘাটৰ ঘৰত উপস্থিত হৈ কেন্দ্ৰীয় বাহিনী আৰু কলকাতা আৰক্ষীয়ে সমগ্ৰ ঘৰটো ঘেৰাও কৰিছে।
তৃণমূল কংগ্ৰেছৰ সাংসদ তথা মমতা বেনাৰ্জীৰ ভতিজা অভিষেক বেনাৰ্জীৰ সমস্যা দিনে দিনে বৃদ্ধি পাইছে। এফালে চহী জালিয়াতিৰ অভিযোগ উত্থাপিত গোচৰৰ তদন্ত চলি আছে,তাৰ মাজতে শনিবাৰে পুৱা কলকাতা আৰক্ষী আৰু কেন্দ্ৰীয় বাহিনীৰ এটা দল তেওঁৰ বাসগৃহত উপস্থিত হয়। সমগ্ৰ ঘৰটো কেন্দ্ৰীয় বাহিনী আৰু কলকাতা আৰক্ষীয়ে ঘেৰাও কৰি লয়।
শনিবাৰে পুৱা শালবানী আৰক্ষী থানাৰ বিষয়াসকল কালীঘাটস্থিত অভিষেক বেনাৰ্জীৰ বাসগৃহত উপস্থিত হৈছিল। এই সময়ছোৱাত কলকাতা আৰক্ষীৰ জোৱানসকলৰ লগতে কেন্দ্ৰীয় বাহিনীৰ জোৱানসকলো ঘটনাস্থলীত উপস্থিত আছিল। অভিষেক বেনাৰ্জীৰ ঘনিষ্ঠ সহযোগী তথা ব্যক্তিগত সহায়ক সুমিত ৰায়ৰ সন্ধানত আৰক্ষী তেওঁৰ বাসগৃহত উপস্থিত হৈছিল। এই গোচৰটো শালবানী আৰক্ষীৰ সৈতে জড়িত।
অভিষেকৰ বাসগৃহত আৰক্ষী উপস্থিত হোৱাৰ খবৰ পোৱাৰ লগে লগে মমতা বেনাৰ্জীও ঘটনাস্থলীত উপস্থিত হয়। কিন্তু কিছু সময় তাত থকাৰ পিছত তেওঁ গুচি যায়। প্ৰাথমিক খবৰ অনুসৰি, অভিষেক বেনাৰ্জীৰ এজন সহায়কৰ সন্ধানত আৰক্ষী তেওঁৰ বাসগৃহত উপস্থিত হৈছিল। আৰক্ষীয়ে ঘৰৰ ভিতৰত তালাচী চলায়।
উল্লেখযোগ্য যে কথিত স্বাক্ষৰ জালিয়াতিৰ গোচৰতো চিআইডিয়ে তদন্ত চলাই আছে। বিগত কেইটামান দিনত কেইবাবাৰো চিবিআই আৰু চিআইডি তেওঁৰ বাসগৃহত উপস্থিত হৈছে। ইয়াৰ পূৰ্বে ভুৱা স্বাক্ষৰৰ গোচৰত বৃহস্পতিবাৰে চিআইডিয়ে অভিষেক বেনাৰ্জীক সোধা-পোছা কৰিছিল। উচতনিমূলক মন্তব্য গোচৰতো চিআইডিয়ে অভিষেক বেনাৰ্জীক জাননী জাৰি কৰিছে। চিআইডি পূৰ্বেও কালীঘাটস্থিত চৌহদ আৰু তৃণমূল কংগ্ৰেছৰ কাৰ্যালয়ত উপস্থিত হৈছিল। তদন্তৰ মূল কেন্দ্ৰবিন্দু হৈছে একাংশ বিধায়কৰ স্বাক্ষৰ কথিতভাৱে ভুৱা বুলি কৰা অভিযোগসমূহ।
অভিযোগ অনুসৰি অভিষেকৰ পি এ সুমিত ৰায়ে তৃণমূলৰ প্ৰাক্তন বিধায়ক সুজয় হাজৰাৰ পৰা বৃহৎ পৰিমাণৰ ধন লৈছিল। বিধানসভা নিৰ্বাচনৰ বাবে তৃণমূল কংগ্ৰেছৰ টিকট নিশ্চিত কৰাৰ নামত এই ধন লোৱা হৈছিল যদিও টিকট দিয়া হোৱা নাছিল। টিকটৰ পৰা বঞ্চিত হোৱাৰ পিছতে শালবাণী থানাত এজাহাৰ দাখিল কৰে সুজয় হাজৰাই।
লগতে পঢ়ক: ‘মই ভগৱান শিৱৰ দৰে বিষ পান কৰি আছো’; মিত্ৰজোঁটৰ বৈঠকত ৰাহুল গান্ধীৰ ডাঙৰ মন্তব্য
