প্ৰধানমন্ত্ৰী হিচাপে নৰেন্দ্ৰ মোদীয়ে ১২ বছৰ সম্পূৰ্ণ কৰিলে। দেশৰ প্ৰথম প্ৰধানমন্ত্ৰী পণ্ডিত জৱাহৰ লাল নেহৰুক পিছ পেলাই আগবাঢ়ি গ’ল নৰেন্দ্ৰ মোদী।
স্বাধীন ভাৰতৰ ৰাজনৈতিক ইতিহাসত আজি এক নতুন অধ্যায়ৰ সূচনা হ’ল । দেশৰ প্ৰথম প্ৰধানমন্ত্ৰী পণ্ডিত জৱাহৰলাল নেহৰুৰ এক বিশেষ অভিলেখ ভংগ কৰি প্ৰধানমন্ত্ৰী নৰেন্দ্ৰ মোদীয়ে দেশৰ আটাইতকৈ দীঘলীয়া কাৰ্যকালৰ বাবে নিৰ্বাচিত প্ৰধানমন্ত্ৰী হিচাপে কাৰ্যনিৰ্বাহ কৰা নেতাৰ গৌৰৱ অৰ্জন কৰিছে ।
২০১৪ চনৰ ২৬ মে’ত প্ৰথমবাৰৰ বাবে প্ৰধানমন্ত্ৰী হিচাপে শপত গ্ৰহণ কৰা নৰেন্দ্ৰ মোদীৰ শাসনকালৰ আজি একেৰাহে ১২ বছৰ সম্পূৰ্ণ হ’ল । আজি ২০২৬ চনৰ ৯ জুনলৈকে এজন নিৰ্বাচিত প্ৰধানমন্ত্ৰী হিচাপে তেওঁৰ কাৰ্যকালৰ ৪৩৯৮ দিন (১২ বছৰ ১৫ দিন) সম্পূৰ্ণ হৈছে ।
নেহৰুৰ ১২ বছৰীয়া অভিলেখ ভংগ-
পণ্ডিত জৱাহৰলাল নেহৰুৱে ১৯৫২ চনৰ ১৩ মে’ত প্ৰথমবাৰৰ বাবে নিৰ্বাচিত প্ৰধানমন্ত্ৰী হিচাপে শপত লৈছিল আৰু তেওঁ একেৰাহে ৪৩৯৭ দিন (১২ বছৰ ১৪ দিন) এই পদত আছিল । আজি প্ৰধানমন্ত্ৰী মোদীয়ে ৪৩৯৮ দিন সম্পূৰ্ণ কৰি নেহৰুৰ এই অভিলেখ অতিক্ৰম কৰে ।
পণ্ডিত নেহৰুৱে ১৯৪৭ চনৰ ১৫ আগষ্টতে প্ৰধানমন্ত্ৰীৰ দায়িত্ব লৈছিল যদিও ১৯৫২ চনৰ প্ৰথম লোকসভা নিৰ্বাচনৰ পূৰ্বলৈকে তেওঁ প্ৰায় ৫ বছৰ (১৭৩৩ দিন) অন্তৱৰ্তীকালীন চৰকাৰৰহে মুৰব্বী আছিল । গতিকে সামগ্ৰিকভাৱে নেহৰুৰ মুঠ কাৰ্যকাল ৬১৩০ দিন হ’লেও, নিৰ্বাচিত প্ৰধানমন্ত্ৰী হিচাপে মোদীয়েই এতিয়া শীৰ্ষত । ইয়াৰ পূৰ্বে ২০২৫ চনৰ ২৫ জুলাইত মোদীয়ে প্ৰাক্তন প্ৰধানমন্ত্ৰী ইন্দিৰা গান্ধীৰ একেৰাহে ৪০৭৭ দিন প্ৰধানমন্ত্ৰী হৈ থকাৰ অভিলেখো ভংগ কৰিছিল ।
১০ জুনত এনডিএ-ৰ শক্তি প্ৰদৰ্শন
এই ঐতিহাসিক ক্ষণক উদযাপন কৰিবলৈ অহা ১০ জুনত নতুন দিল্লীত এনডিএ শাসিত ৰাজ্যসমূহৰ মুখ্যমন্ত্ৰীসকলৰ এক গুৰুত্বপূৰ্ণ বৈঠক আহ্বান কৰা হৈছে । এই বৈঠকত মিত্ৰজোঁটৰ একতা আৰু শক্তি প্ৰদৰ্শন কৰা হ’ব । অন্ধ্ৰপ্ৰদেশৰ মুখ্যমন্ত্ৰী তথা টিডিপি প্ৰধান এন চন্দ্ৰবাবু নাইডুৱে বৈঠকত এটা বিশেষ প্ৰস্তাৱ উত্থাপন কৰিব, য’ত প্ৰধানমন্ত্ৰী মোদীৰ বিগত ১২ বছৰৰ শাসনকালৰ সাফল্যৰ খতিয়ান উল্লেখ কৰা হ’ব । এই প্ৰস্তাৱক মিত্ৰজোঁটৰ অন্যান্য সহযোগী দলৰ নেতাসকলেও সমৰ্থন জনাব ।
নৰেন্দ্ৰ মোদীৰ নামত আন কিছুমান বিৰল অভিলেখ :
শাসনকালত সৰ্বাধিক সময়ৰ ৰেকৰ্ড : ২০২৬ চনৰ মাৰ্চ মাহত প্ৰধানমন্ত্ৰী মোদীয়ে গুজৰাটৰ মুখ্যমন্ত্ৰী আৰু দেশৰ প্ৰধানমন্ত্ৰী হিচাপে নিজৰ দুয়োটা কাৰ্যকাল মিলাই ৮৯৩১ দিনতকৈও অধিক সময় ক্ষমতাৰ শীৰ্ষত থকাৰ অভিলেখ গঢ়িছিল । ইয়াৰ সৈতে তেওঁ ছিকিমৰ প্ৰাক্তন মুখ্যমন্ত্ৰী পৱন চামলিঙৰ (8৯৩০ দিন) সৰ্বাধিক দিন চৰকাৰ চলোৱাৰ অভিলেখ ভংগ কৰে ।
সৰ্বপ্ৰথম অনা-কংগ্ৰেছী প্ৰধানমন্ত্ৰী : ভাৰতৰ ইতিহাসত নৰেন্দ্ৰ মোদীয়েই হৈছে আটাইতকৈ দীৰ্ঘদিন ধৰি শাসনভাৰ চম্ভালা প্ৰথমজন অনা-কংগ্ৰেছী প্ৰধানমন্ত্ৰী । তেওঁ একেৰাহে দুবাৰকৈ পূৰ্ণ সংখ্যাগৰিষ্ঠতাৰ চৰকাৰ চলোৱাৰ পিছত এতিয়া তৃতীয়বাৰৰ বাবে এনডিএ চৰকাৰৰ সফল নেতৃত্ব দিছে ।
নেহৰুৰ পিছত দ্বিতীয়জন নেতা : পণ্ডিত নেহৰুৰ পিছত নৰেন্দ্ৰ মোদী দেশৰ দ্বিতীয়গৰাকী প্ৰধানমন্ত্ৰী, যিয়ে একেৰাহে তিনিটা লোকসভা নিৰ্বাচনত (২০১৪, ২০১৯ আৰু ২০২৪) নিজৰ দল বা মিত্ৰজোঁটক বিজয়ী কৰাই একেৰাহে তিনিবাৰকৈ প্ৰধানমন্ত্ৰী পদৰ শপত লৈছে ।
স্বাধীন ভাৰতত জন্মগ্ৰহণ কৰা প্ৰথম প্ৰধানমন্ত্ৰী : ১৯৫০ চনৰ ১৭ ছেপ্টেম্বৰত জন্মগ্ৰহণ কৰা নৰেন্দ্ৰ মোদী দেশৰ প্ৰথমগৰাকী প্ৰধানমন্ত্ৰী, যাৰ জন্ম স্বাধীনতাৰ পিছত হৈছে । তেওঁৰ পূৰ্বৰ আটাইকেইগৰাকী প্ৰধানমন্ত্ৰীৰে জন্ম ১৯৪৭ চনৰ পূৰ্বে হৈছিল ।
লগতে পঢ়ক: প্ৰধানমন্ত্ৰী মোদীৰ ঐতিহাসিক ইউৰোপ ভ্ৰমণ: অংশ ল’ব জি-৭ সন্মিলনত
