আন এক ইতিহাস ৰচিবলৈ সাজু হৈছে ইছৰো । বুধবাৰে মহাকাশ সংস্থাটোৱে আন এক কৃতিত্ব অৰ্জন কৰিব ।
বৰদিনৰ মাত্ৰ এদিন পূৰ্বে ভাৰত আৰু আমেৰিকাই এক ঐতিহাসিক অংশীদাৰিত্বৰ সূচনা কৰিবলৈ সাজু হৈছে । ভাৰতৰ বাহুবলী ৰকেটে পুৱা ৮:৫৪ বজাত আমেৰিকাৰ উদ্ভাৱক এ এছ টি স্পেচম’বাইলৰ পৰৱৰ্তী প্ৰজন্মৰ যোগাযোগ উপগ্ৰহ ব্লু বাৰ্ড ৬ মহাকাশলৈ উৎক্ষেপণ কৰি দেশৰ মহাকাশ ইতিহাসত আন এক মাইলৰ খুঁটি চিহ্নিত কৰিব । এই উপগ্ৰহ ভাৰতে মহাকাশলৈ প্ৰেৰণ কৰা এতিয়ালৈকে সৰ্বাধিক গধুৰ উপগ্ৰহ । ব্লু বাৰ্ডৰ ওজন প্ৰায় ৬,১০০ কিলোগ্ৰাম । ইয়াৰ ফলত ই কেৱল এক অভিলাষী আৰু প্ৰত্যাহ্বানমূলক অভিযানেই নহয়, বিশ্ব মহাকাশ বাণিজ্যত ভাৰতৰ শক্তিশালী উপস্থিতিৰো সংকেত ।
ইছৰোৰ অধ্যক্ষ ড০ ভি নাৰায়ণনৰ মতে এয়া ভাৰতীয় উৎক্ষেপণ বাহনে এতিয়ালৈকে উৎক্ষেপণ কৰা আটাইতকৈ গধুৰ উপগ্ৰহ । এই কৃতিত্বক ইছৰোৰ কাৰিকৰী ক্ষমতা আৰু নিৰ্ভৰযোগ্য অভিযান্ত্ৰিকতাৰ এক ডাঙৰ প্ৰমাণ হিচাপে গণ্য কৰা হৈছে ।
প্ৰায় ৪৩.৫ মিটাৰ ওখ আৰু প্ৰায় ৬৪০ টন ওজনৰ এল ভি এম-৩ ভাৰতৰ আটাইতকৈ শক্তিশালী ৰকেট । ই ৪,২০০ কিলোগ্ৰাম পৰ্যন্ত পেলোড GTO (Geosynchronous Transfer Orbit) আৰু তাতোকৈ অধিক LEO (Low Earth Orbit) লৈ কঢ়িয়াই নিব পাৰে । এই ক্ষমতাই ইয়াক “বাহুবলী” উপনাম দিছে আৰু এই নামটো এই অভিযানত সম্পূৰ্ণৰূপে ন্যায্য ।
লগতে পঢ়ক : হুইল চেয়াৰৰ পৰা মহাকাশলৈ… জাৰ্মান মহিলা অভিযন্তাই ৰচিলে ইতিহাস
