মঙলবাৰে অনুষ্ঠিত হোৱা এন ডি এৰ সংসদীয় দলৰ বৈঠকত প্ৰধানমন্ত্ৰী মোদীয়ে পশ্চিম বংগৰ নিৰ্বাচনৰ সৈতে জড়িত কেইবাটাও বিষয়ৰ ওপৰত বক্তব্য ৰাখে ।
অহা বছৰ পশ্চিম বংগত বিধানসভা নিৰ্বাচন অনুষ্ঠিত হোৱাৰ কথা । ইতিমধ্যে সকলো ৰাজনৈতিক দলে এই নিৰ্বাচনৰ বাবে তেওঁলোকৰ প্ৰস্তুতি চলাইছে । মঙলবাৰে এন ডি এৰ সংসদীয় দলৰ বৈঠকত প্ৰধানমন্ত্ৰী মোদীয়ে পশ্চিম বংগৰ নিৰ্বাচনৰ সৈতে জড়িত কেইবাটাও বিষয়ৰ ওপৰত বক্তব্য ৰাখে । পশ্চিম বংগৰ নিৰ্বাচন সন্দৰ্ভত প্ৰধানমন্ত্ৰী মোদীয়ে কয় যে বিহাৰত জয়লাভৰ পিছত বংগৰ পাল । বিহাৰৰ পৰা বংগলৈ গংগা বৈ যায় । পশ্চিম বংগতো আমি জয়ী হ’ব লাগিব ৷
দেশ এতিয়া ৰিফৰ্ম এক্সপ্ৰেছৰ দৌৰত-বৈঠকত প্ৰধানমন্ত্ৰী মোদী
জানিব পৰা মতে এন ডি এৰ সংসদীয় দলৰ বৈঠকত প্ৰধানমন্ত্ৰীয়ে কয় যে দেশ এতিয়া সম্পূৰ্ণৰূপে “ৰিফৰ্ম এক্সপ্ৰেছ”ৰ যুগত, য’ত সংস্কাৰ দ্ৰুতগতিত আৰু স্পষ্ট উদ্দেশ্যেৰে চলি আছে । প্ৰধানমন্ত্ৰীয়ে জোৰ দি কয় যে চৰকাৰৰ সকলো সংস্কাৰ নাগৰিককেন্দ্ৰিক—কেৱল অৰ্থনৈতিক বা ৰাজহ বৃদ্ধিৰ বাবে নহয় । ইয়াৰ লক্ষ্য হৈছে জনসাধাৰণৰ দৈনন্দিন সমস্যাসমূহ সমাধান কৰা, যাতে ই নিজৰ সম্পূৰ্ণ সম্ভাৱনাক লাভ কৰিব পাৰে ।
সাংসদসকলে সাধাৰণ জনতাৰ সমস্যাসমূহ সক্ৰিয়ভাৱে ভাগ-বতৰা কৰিব লাগেঃ প্ৰধানমন্ত্ৰী
-এন ডি এৰ সংসদীয় দলৰ বৈঠকত প্ৰধানমন্ত্ৰী মোদীয়ে সাংসদসকলক সাধাৰণ জনতাৰ প্ৰকৃত সমস্যাসমূহ সক্ৰিয়ভাৱে ভাগ-বতৰা কৰিবলৈ আহ্বান জনায়, যাতে সংস্কাৰ এক্সপ্ৰেছ প্ৰতিখন ঘৰলৈ যায় আৰু দৈনন্দিন সমস্যাসমূহ দূৰ কৰিব পৰা যায় ।
-৩০-৪০ পৃষ্ঠাৰ প্ৰ-পত্ৰ আৰু অপ্ৰয়োজনীয় কাগজ-পত্ৰৰ সংস্কৃতিৰ অন্ত পেলাব বিচাৰে বুলিও তেওঁ কয় । সেৱাসমূহ নাগৰিকৰ দুৱাৰমুখলৈ অনাৰ প্ৰয়োজন আৰু একে তথ্য বাৰে বাৰে জমা দিয়াৰ বাধ্যবাধকতা নাইকিয়া কৰিব লাগে ।
-প্ৰধানমন্ত্ৰী মোদীয়ে কয় যে চৰকাৰে নাগৰিকৰ ওপৰত আস্থা প্ৰদৰ্শন কৰি আত্মপ্ৰমাণীকৰণ ব্যৱস্থা প্ৰৱৰ্তন কৰিছিল আৰু বিগত ১০ বছৰে এই ব্যৱস্থা কোনো অপব্যৱহাৰ নকৰাকৈ সফল হৈছে । তেওঁ কয় যে ইজ অৱ লাইফ আৰু ইজ অৱ ডুইং বিজনেছ দুয়োটা মোদী চৰকাৰৰ বাবে শীৰ্ষ অগ্ৰাধিকাৰ ।
লগতে পঢ়ক : ‘বন্দে মাতৰমৰ প্ৰতি বিশ্বাসঘাতকতা,কংগ্ৰেছে কৰিছিল খণ্ড’; সংসদত মোদীৰ কেইবাটাও গুৰুত্বপূৰ্ণ বিষয় উত্থাপন
