শ্বেখ হাছিনাক মৃত্যুদণ্ড
বাংলাদেশৰ প্ৰাক্তন তথা নিৰ্বাসিত প্ৰধানমন্ত্ৰী শ্বেখ হাছিনাক মানৱতাৰ বিৰুদ্ধে গুৰুতৰ অপৰাধৰ দোষী সাব্যস্ত কৰিছে আন্তঃৰাষ্ট্ৰীয় অপৰাধ ন্যায়াধিকৰণে । এই গোচৰত তিনিজনীয়া ন্যায়াধিকৰণে শ্বেখ হাছিনাক মৃত্যুদণ্ডৰ শাস্তি প্ৰদান কৰে । শ্বেখ হাছিনাৰ লগতে প্ৰাক্তন গৃহমন্ত্ৰী আৰু প্ৰাক্তন আৰক্ষী মহাপৰিদৰ্শককো মৃত্যুদণ্ডৰ শাস্তি প্ৰদান কৰা হয় । ন্যায়াধীশ গুলাম মুৰ্তাজাৰ নেতৃত্বত তিনিজনীয়া ন্যায়াধীশে ছটা ভাগত ৰায়দান কৰে যি ৪০০ পৃষ্ঠাৰ আছিল ।
ন্যায়াধীশ মুৰ্তাজাৰ নেতৃত্বত গঠিত এই ন্যায়াধিকৰণত ন্যায়াধীশ মহম্মদ ছাফিউল আলম মাহমুদ আৰু মহম্মদ মহিতুল হক এনাম চৌধুৰী আছে । ট্ৰিবিউনেলে এটা গোচৰত ৰায় দিয়ে যে প্ৰাক্তন প্ৰধানমন্ত্ৰী হাছিনাক মৃত্যুৰ আগলৈকে কাৰাগাৰত বন্দী কৰি ৰাখিব লাগে । এই ৰায়দানৰ বাবে মানৱ অধিকাৰ সংগঠন আৰু অন্যান্য সংগঠনৰ অসংখ্য প্ৰতিবেদন বিবেচনা কৰা বুলি ন্যায়াধিকৰণে উল্লেখ কৰে । ইয়াত অত্যাচাৰৰ বিষয়েও বিতংভাৱে উল্লেখ কৰা হৈছে । শ্বেখ হাছিনাই মানৱতাৰ বিৰুদ্ধে অপৰাধ সংঘটিত কৰিছিল বুলি কৈছে ন্যায়াধিকৰণে ।
ন্যায়াধিকৰণৰ ৰায়দানত বহু সংখ্যক প্ৰতিবাদকাৰীৰ মৃত্যু হোৱা বুলিও উল্লেখ কৰা হৈছে । শান্তিপূৰ্ণভাৱে প্ৰতিবাদ সাব্যস্ত কৰা ছাত্ৰ-ছাত্ৰীৰ ওপৰত হেলিকপ্টাৰ পৰা বোমা পেলোৱাৰ নিৰ্দেশ দিছিল হাছিনাই । ন্যায়াধিকৰণে লগতে কয় যে আৱামী লীগৰ কৰ্মীসকলে দলীয় নেতৃত্বৰ সম্পূৰ্ণ জ্ঞাতসাৰে ৰাজপথলৈ ওলাই আহি পূৰ্ব পৰিকল্পিত আক্ৰমণ সংঘটিত কৰাৰ অভিযোগ উত্থাপন কৰিছে ।
ন্যায়াধিকৰণৰ এই সিদ্ধান্তৰ পিছতে বাংলাদেশৰ ৰাজধানী ঢাকাৰ পৰিস্থিতি অধিক অৱনতি ঘটিছে । শ্বেখ হাছিনাৰ সমৰ্থকসকল ৰাজপথলৈ ওলাই আহি প্ৰতিবাদ কৰিবলৈ আৰম্ভ কৰে । ইফালে হাছিনাই ন্যায়াধিকৰণৰ এই সিদ্ধান্তক পক্ষপাতদুষ্ট আৰু ৰাজনৈতিক উদ্দেশ্যপ্ৰণোদিত বুলি অভিহিত কৰে । বাংলাদেশৰ প্রাক্তন গৃহমন্ত্রী আছাদুজ্জামান খান কমলে আই চি টিৰ এই সিদ্ধান্তক অবৈধ আদালত আখ্যা দি আৱামী লীগৰ নেতৃত্ব নির্মূলৰ প্রয়াস বুলি অভিহিত কৰে ৷
ন্যায়াধিকৰণে উল্লেখ কৰিছে যে ১৮ জুলাইত গুলীত আঘাতপ্ৰাপ্ত হৈ ২০০ৰো অধিক চিকিৎসালয়ত উপস্থিত হৈছিল । ১৯ জুলাইতো একেধৰণৰ সংখ্যা আহিছিল । এই ক্ষেত্ৰতো শ্বেখ হাছিনাই প্ৰতিবাদকাৰীক হত্যাৰ নিৰ্দেশ দিয়া বুলিও উল্লেখ কৰিছে ন্যায়াধিকৰণে । ন্যায়াধিকৰণে কয় যে হাছিনা সৰ্বোচ্চ শাস্তিৰ যোগ্য ।
লগতে পঢ়ক : মেক্সিকোত তীব্ৰতৰ হৈ উঠিছে জেন-জি আন্দোলন; ব্যাপক সংঘৰ্ষ-আটক
