গুৱাহাটী টেষ্টত দক্ষিণ আফ্ৰিকাৰ ৰানৰ পাহাৰ
গুৱাহাটীৰ বৰ্ষাপাৰা ক্ৰিকেট ষ্টেডিয়ামত ভাৰত আৰু দক্ষিণ আফ্ৰিকাৰ মাজত অনুষ্ঠিত হৈ আছে শৃংখলাৰ অন্তিমখন টেষ্ট । এই টেষ্টৰ প্ৰথম ইনিংছত ৰানৰ পাহাৰ গঢ়িছে দক্ষিণ আফ্ৰিকাই । দক্ষিণ আফ্ৰিকাই প্ৰথম ইনিংছত ৪৮৯ ৰান সংগ্ৰহ কৰে । ইতিমধ্যে দ্বিতীয় দিনৰ খেলৰ সমাৰণি পৰিছে । দ্বিতীয় দিনটোৰ শেষত ভাৰতে প্ৰথম ইনিংছত কোনো উইকেট নেহেৰুৱাকৈ ৯ ৰান সংগ্ৰহ কৰে । যশস্বী জয়ছোৱালে ৭ ৰানত আৰু কে এল ৰাহুলে ২ ৰানত অপৰাজিত হৈ আছে । ভাৰতৰ প্ৰথম ইনিংছত ৪.৪ অভাৰৰ খেল হৈছে । প্ৰথম ইনিংছৰ ভিত্তিত দক্ষিণ আফ্ৰিকাই ৪৮০ ৰানত অগ্ৰগতি লাভ কৰিছে ।
উল্লেখ্য যে, কলকাতা টেষ্টত ভাৰত ৩০ ৰানত পৰাস্ত হয় । এই জয়ে দক্ষিণ আফ্ৰিকাক শৃংখলাত ১-০ ব্যৱধানত অগ্ৰগতি প্ৰদান কৰিছে । শৃংখলা ড্ৰ’ কৰিবলৈ হ’লে এই মেচত জয়ী হ’ব লাগিব টিম ইণ্ডিয়া ।
দক্ষিণ আফ্ৰিকাৰ প্ৰথম ইনিংছ-
গুৱাহাটী টেষ্টৰ প্ৰথম দিনটো যথেষ্ট ৰোমাঞ্চকৰ আছিল । দক্ষিণ আফ্ৰিকাৰ বেটছমেনসকলে ৰান সংগ্ৰহ কৰে যদিও ভাৰতীয় বলাৰসকলেও উইকেট ল’বলৈ সক্ষম হয় । প্ৰথম ইনিংছত দক্ষিণ আফ্ৰিকাৰ শীৰ্ষ ক্ৰমৰ বেটছমেন এইডেন মাৰ্ক্ৰাম (৩৮ ৰান), ৰিয়ান ৰিকেলটন (৩৫ ৰান), ট্ৰিষ্টান ষ্টাবছ (৪৯ ৰান) আৰু অধিনায়ক টেম্বা বাভুমাই (৪১ ৰান) ভাল প্ৰদৰ্শন আগবঢ়ায় । ভাৰতীয় দলৰ হৈ প্ৰথম দিনাই সৰ্বাধিক উইকেট দখল কৰি স্পীনাৰ কুলদীপ যাদৱে । তেওঁ ৩টা উইকেট দখল কৰে ।
খেলৰ দ্বিতীয় দিনা চেনুৰাণ মুথুস্বামী আৰু কাইল ভেৰেইনে দক্ষিণ আফ্ৰিকাৰ ইনিংছ চম্ভালে । সপ্তম উইকেটৰ বাবে তেওঁলোকে ৮৮ ৰানৰ অংশীদাৰিত্ব গঢ়ে । এই অংশীদাৰিত্ব ভংগ কৰে ৰবীন্দ্ৰ জাডেজাই । জাডেজাই ভেৰেইনক আউট কৰে । ভেৰেইনে ১২২টা বলত ৪৫ ৰান সংগ্ৰহ কৰে, য’ত ৫টা চাৰি আছিল । ভেৰেইনক আউট কৰাৰ পিছত মুথুস্বামীৰ সৈতে মাৰ্কো জেন্সেনে দক্ষিণ আফ্ৰিকাৰ ইনিংছৰ দায়িত্ব লয় । অষ্টম উইকেটৰ বাবে জেন্সেন আৰু মুথুস্বামীয়ে ৯৭ ৰানৰ অংশীদাৰিত্ব গঢ়ে ।
মুথুস্বামীয়ে ২০৬টা বলত ১০৯ ৰান সংগ্ৰহ কৰে । তেওঁৰ এই শতকীয় ইনিংছত ১০টা চাৰি আৰু দুটা ৬ন আছিল । এয়া আছিল মুথুস্বামীৰ প্ৰথম টেষ্ট শতক । মুথুস্বামী আউট হোৱাৰ পিছত দক্ষিণ আফ্ৰিকাই ছাইমন হাৰ্মাৰক হেৰুৱাইছিল যদিও মাৰ্কো জেন্সেনে নিজৰ বিস্ফোৰক বেটিং অব্যাহত ৰাখে । জেন্সেনে ৯১টা বলত ৯৩ ৰান সংগ্ৰহ কৰে । তেওঁৰ এই ইনিংছত ৭টা ছয় আৰু ৬টা চাৰি আছিল । ভাৰতৰ হৈ কুলদীপ যাদৱে ৪টা উইকেট দখল কৰে ।
উইকেট পতন : ১-৮২ (এইডেন মাৰ্ক্ৰাম, ২৬.৫ অভাৰ), ২-৮২ (ৰিয়ান ৰিকেলটন, ২৭.২ অভাৰ), ৩-১৬৬ (টেম্বা বাভুমা, ৫৭.২ অভাৰ), ৪-১৮৭ (ট্ৰিষ্টান ষ্টাবছ, ৬৩.১ অভাৰ), ৫-২০১ (ৱিয়ান মুল্ডাৰ, ৬৭.১ অভাৰ), ৬-২৪৬ (টনি ডি জোৰ্জি, ৮১.১ অভাৰ), ৭-৩৩৪ (কাইল ভেৰেইন, ১২০.৩ অভাৰ), ৮-৪৩১ (চেনুৰাণ মুথুস্বামী, ১৩৮.১ অভাৰ), ৯-৪৬২ (চাইমন হাৰমাৰ, ১৪৩.১ অভাৰ), ১০-৪৮৯ (মাৰ্কো জেন্সেন, ১৫১.১ অভাৰ) ।
এই মেচখনৰ বাবে ভাৰতীয় দলটোৱে নিজৰ মূল একাদশত দুটা সালসলনি কৰিছিল । শুভমন গীলৰ ঠাইত নীতিশ কুমাৰ ৰেড্ডী, অক্ষৰ পেটেলৰ ঠাইত ছাই সুদৰ্শনে একাদশত স্থান লাভ কৰে । আনহাতে দক্ষিণ আফ্ৰিকাই এটা পৰিৱৰ্তন কৰে । তেওঁলোকে কৰ্বিন বছক বাদ দি স্পীনাৰ ছেনুৰাণ মুথুস্বামীক মূল একাদশত অন্তৰ্ভুক্ত কৰে । আফ্ৰিকান দলটোৱে তিনিজন স্পিনাৰক লৈ খেলখনত প্ৰৱেশ কৰে: কেশৱ মহাৰাজ, চাইমন হাৰ্মাৰ, আৰু মুথুস্বামী।
লগতে পঢ়ক : ক্ৰিকেটৰ ইতিহাসত প্ৰথমবাৰৰ বাবে… গুৱাহাটীত ভংগ হ’ল ১৪৮ বছৰীয়া এক পৰম্পৰা
