উত্তৰ পূৰ্বাঞ্চলক সাঙুৰি বিতৰ্কিত মানচিত্ৰ প্ৰকাশ বাংলাদেশৰ
ভাৰতৰ অখণ্ডতা আৰু সাৰ্বভৌত্বক ভেঙুচালি কৰাৰ ধৃষ্টতা বাংলাদেশৰ । শেহতীয়াকৈ বাংলাদেশে উত্তৰ পূৰ্বাঞ্চলক নিজৰ দেশৰ মানচিত্ৰত সাঙুৰি লোৱাৰ দুঃসাহস প্ৰকাশ কৰিছে । বাংলাদেশৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছৰ এই ধৃষ্টতাই পুনৰ বিতৰ্কৰ সৃষ্টি কৰিছে । এইবাৰ ইউনুছে এগৰাকী পাকিস্তানী জেনেৰেলক বাংলাদেশৰ অংশ হিচাপে অসমৰ লগতে উত্তৰ পূৰ্বাঞ্চলৰ আন ৰাজ্যসমূহক সাঙুৰি দেখুওৱা এখন বিতৰ্কিত মানচিত্ৰ তুলি দিয়া দেখা গ’ল ।
প্ৰকাশিত বাতৰি অনুসৰি পাকিস্তানৰ জইন্ট চীফ অব্ ষ্টাফ কমিটীৰ অধ্যক্ষ জেনেৰেল ছাহিৰ ছামছাদ মিৰ্জাই শেহতীয়াকৈ ঢাকা ভ্ৰমণ কৰি ইউনুছক সাক্ষাৎ কৰিছিল । ১৯৭১ চনৰ মুক্তিযুদ্ধৰ পিছৰে পৰা অৱনতি ঘটা দুয়োখন দেশৰ মাজৰ সম্পৰ্ক শেহতীয়াকৈ ঘনিষ্ঠ হৈ অহাৰ সময়তে এই বৈঠক অনুষ্ঠিত হয় ।
দেওবাৰে মহম্মদ ইউনুছে পাকিস্তানী জেনেৰেল ছাহিৰ ছামছাদ মিৰ্জাৰ সৈতে হোৱা বৈঠকৰ ফটো ছ’চিয়েল মিডিয়াত শ্বেয়াৰ কৰে । কিন্তু ইউনুছে মিৰ্জাক “আৰ্ট অৱ ট্ৰাইমফ” শীৰ্ষক এখন কিতাপ উপহাৰ দিয়াৰ কথা পোহৰলৈ অহাত বিতৰ্কৰ সৃষ্টি হয়, যিখন কিতাপৰ প্ৰচ্ছদত ভাৰতৰ উত্তৰ-পূবৰ সাতখন ৰাজ্যক বাংলাদেশৰ অংশ হিচাপে দেখুওৱা এখন বিতৰ্কিত মানচিত্ৰ আছিল ।
উল্লেখ্য যে, ইয়াৰ পূৰ্বেও বাংলাদেশৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছে উত্তৰ পূবাঞ্চলক লৈ বিতৰ্কিত মন্তব্য কৰি আহিছে । ইফালে বাংলাদেশ চৰকাৰৰ এই কাৰ্যক লৈ ভাৰতৰ বৈদেশিক পৰিক্ৰমা মন্ত্ৰালয়ে কোনো প্ৰতিক্ৰিয়া এতিয়ালৈকে প্ৰকাশ কৰা নাই ।
লগতে পঢ়ক : আমেৰিকা-চীনৰ মাজত শীঘ্ৰে হ’ব বাণিজ্যিক চুক্তি; ট্ৰাম্পৰ গুৰুত্বপূৰ্ণ ঘোষণা
