ভাৰতীয় সেনাৰ লেফটেনেণ্ট কৰ্ণেল হ’ল নীৰজ চোপ্ৰা
দুবাৰৰ অলিম্পিক পদক বিজয়ী তথা ভাৰতৰ তাৰকা জেভেলিন থ্ৰ’ৱাৰ নীৰজ চোপ্ৰাক ভাৰতীয় সেনাবাহিনীত লেফটেনেণ্ট কৰ্ণেল পদবী প্ৰদান কৰা হৈছে । প্ৰতিৰক্ষা মন্ত্ৰী ৰাজনাথ সিং আৰু সেনা প্ৰধান উপেন্দ্ৰ দ্বিবেদীয়ে নীৰজক এই উপাধি প্ৰদান কৰে । প্ৰতিৰক্ষা মন্ত্ৰী আৰু সেনা প্ৰধানৰ উপস্থিতিত নীৰজক লেফটেনেণ্ট কৰ্ণেলৰ সন্মানীয় পদবী প্ৰদান কৰা হয় । এই অনুষ্ঠানত নীৰজক সেনাবাহিনীৰ পোছাক পৰিধান কৰা দেখা যায় ।
হাৰিয়ানাৰ পানীপাটৰ খণ্ডৰা গাঁৱৰ ২৭ বছৰীয়া জেভেলিন থ্ৰ’ৱাৰগৰাকীয়ে ২০২০ চনৰ টকিঅ’ অলিম্পিকত সোণৰ পদক লাভ কৰে । আনহাতে ২০২৪ চনৰ পেৰিছ অলিম্পিকত ৰূপৰ পদক লাভ কৰে তেওঁ ।
নীৰজ চোপ্ৰাক এইবাৰ টেৰিটৰিয়েল আৰ্মীত লেফটেনেণ্ট কৰ্ণেলৰ সন্মানীয় পদবী আগবঢ়োৱা হৈছিল । বুধবাৰে এক অনুষ্ঠানত নীৰজ চোপ্ৰাক এই উপাধি প্ৰদান কৰা হয় । ইয়াৰ পূৰ্বে নীৰজ ভাৰতীয় সেনাবাহিনীত চুবেদাৰ মেজৰ আছিল । নীৰজৰ পূৰ্বে ভাৰতীয় ক্ৰিকেটাৰ মহেন্দ্ৰ সিং ধোনীকো ২০১১ চনত টেৰিটৰিয়েল আৰ্মীত লেফটেনেণ্ট কৰ্ণেলৰ সন্মানীয় পদবী প্ৰদান কৰা হৈছিল ।
চলিত বৰ্ষৰ মে’ মাহত প্ৰতিৰক্ষা মন্ত্ৰালয়ৰ সৈন্য পৰিক্ৰমা বিভাগে নীৰজক লেফটেনেণ্ট কৰ্ণেল পদবী প্ৰদান নিশ্চিত কৰি এক অধিসূচনা জাৰি কৰিছিল ।
লগতে পঢ়ক : প্ৰত্যাৱৰ্তন মেচত নচলিল ৰোহিত-কোহলীৰ যাদু; শুভমনেও কৰিলে হতাশ
