দ্বিতীয় টেষ্টত দৰ্শনীয় শতকেৰে ইতিহাস সৃষ্টি শুভমন গীলৰ
ৱেষ্ট ইণ্ডিজৰ বিৰুদ্ধে চলিত দ্বিতীয় টেষ্টত আজি শতক অৰ্জেনেৰে ইতিহাস সৃষ্টি কৰিছে বৰ্তমানৰ ভাৰতীয় টেষ্ট দলৰ অধিনায়ক শুভমন গীলে । অধিনায়কগৰাকীয়ে ১২৯ ৰানত অপৰাজিত হৈ থাকে । লগতে তেওঁ এই শতকেৰে বহু অভিলেখো ভংগ কৰে ।
উল্লেখ্য যে অধিনায়ক হিচাপে যোৱা ১২টা টেষ্ট ইনিংছত এইটো হৈছে শুভমন গীলৰ পঞ্চমটো শতক । যশস্বী জয়ছোৱালৰ ১৭৫ ৰানৰ পিছত গীলৰ অপৰাজিত এই শতকৰ বাবেই টিম ইণ্ডিয়াই প্ৰথম ইনিংছত ৫১৮ ৰান সংগ্ৰহ কৰিবলৈ সক্ষম হয় । ভাৰতে ৫১৮ ৰানত নিজৰ ইনিংছ ঘোষণা কৰে । এই শতক অৰ্জনৰ লগে লগে গীলে ভংগ কৰে পাঁচটা ডাঙৰ অভিলেখ ।
শুভমন গীলে ভংগ কৰিলে ৫টা ডাঙৰ অভিলেখ-
ভাৰতীয় টেষ্টৰ অধিনায়কৰ দ্বাৰা এবছৰত সৰ্বাধিক শতকঃ অধিনায়ক হোৱাৰ পাছত শুভমন গীলে পাঁচটা শতক অৰ্জন কৰিছে । ভাৰতৰ কোনো টেষ্ট অধিনায়কে এবছৰত সৰ্বাধিক শতক অৰ্জন কৰাৰ বিৰাট কোহলীৰ অভিলেখ স্পৰ্শ কৰিছে তেওঁ । বিৰাটে ২০১৭ আৰু ২০১৮ চনত অধিনায়ক হিচাপে পাঁচটাকৈ শতক অৰ্জন কৰিছিল । শচীন টেণ্ডুলকাৰে অধিনায়ক হিচাপে চাৰিটা শতক অৰ্জন কৰিছিল ।
ঘৰুৱা টেষ্ট মেচত সৰ্বাধিক ব্যক্তিগত স্ক’ৰঃ ঘৰুৱা টেষ্ট মেচত এয়া হৈছে শুভমন গীলৰ সৰ্বোচ্চ টেষ্ট স্ক’ৰ । ভাৰতীয় মাটিত তেওঁৰ পূৰ্বৰ সৰ্বোচ্চ ব্যক্তিগত স্ক’ৰ আছিল ১২৮, যিটো তেওঁ ২০২৩ চনত অষ্ট্ৰেলিয়াৰ বিৰুদ্ধে অৰ্জন কৰিছিল । এতিয়া তেওঁ নিজৰ স্ক’ৰ উন্নত কৰি ১২৯ ৰান সংগ্ৰহ কৰিছে ।
বিশ্ব টেষ্ট চেম্পিয়নশ্বিপত ভাৰতৰ হৈ সৰ্বাধিক ৰানঃ বিশ্ব টেষ্ট চেম্পিয়নশ্বিপত ভাৰতৰ হৈ আগশাৰীৰ ৰাণ সংগ্ৰহকাৰী হিচাপে পৰিগণিত হৈছে শুভমন । এতিয়া তেওঁৰ নামত আছে ২,৮২৬ ৰান । বিশ্ব টেষ্ট চেম্পিয়নশ্বিপত এই পৰ্যন্ত ২৭৩১ ৰান সংগ্ৰহ কৰা ঋষভ পণ্টক অতিক্ৰম কৰিছে গীলে । ২,৭১৬ ৰানেৰে দ্বিতীয় স্থানত আছে ৰোহিত শৰ্মা আৰু ২৬১৭ ৰানেৰে চতুৰ্থ স্থানত আছে বিৰাট কোহলী ।
বাবৰ আজমক অতিক্ৰমঃ বাবৰ আজম আৰু ৰোহিত শৰ্মাক অতিক্ৰম কৰি বিশ্ব টেষ্ট চেম্পিয়নশ্বিপত অধিনায়ক হিচাপে সৰ্বাধিক শতক অৰ্জন কৰিবলৈ সক্ষম হৈছে গীলে । ডব্লিউ টি চিত এতিয়া গীলৰ পাঁচটা শতক আছে, আনহাতে ৰোহিত শৰ্মা আৰু বাবৰ আজমে অধিনায়ক হিচাপে চাৰিটাকৈ শতক অৰ্জন কৰিছে । ডব্লিউ টি চিৰ অধিনায়ক হিচাপে আঠবাৰকৈ ১০০ ৰানৰ সীমাত উপনীত হোৱা জো ৰুটে বেছিভাগ শতকৰ অভিলেখ গঢ়িছে ।
এবছৰত সৰ্বাধিক টেষ্ট শতকঃ এবছৰত সৰ্বাধিক টেষ্ট শতক অৰ্জন কৰাৰ ক্ষেত্ৰত শুভমন গীলে সুনীল গাভাস্কাৰ আৰু বিৰাট কোহলীৰ অভিলেখ স্পৰ্শ কৰিছে । একেটা বছৰতে ৫টা টেষ্টত শতক অৰ্জন কৰাৰ কৃতিত্বও অৰ্জন কৰিছে তেওঁ । অৱশ্যে এবছৰত টেষ্টত সৰ্বাধিক শতক অৰ্জন কৰাৰ ভাৰতীয় অভিলেখ ২০১০ চনত ৭টা শতক অৰ্জন কৰা শচীন টেণ্ডুলকাৰৰ হাতত আছে ।
লগতে পঢ়ক : ১৫ ডিচেম্বৰত অনুষ্ঠিত হ’ব পাৰে আই পি এল ২০২৬ৰ নিলাম…
