২০২৪ চনৰ এপ্ৰিল-ছেপ্টেম্বৰত ভাৰতত প্ৰত্যক্ষ বিদেশী বিনিয়োগ (এফ ডি আই) ৪৫ শতাংশ বৃদ্ধি হৈ ২৯.৭৯ বিলিয়ন আমেৰিকান ডলাৰ হৈছে । সেৱা, কম্পিউটাৰ ছফ্টৱেৰ আৰু হাৰ্ডৱেৰ, টেলিকম, ফাৰ্মা আৰু ৰাসায়নিক পদাৰ্থৰ দৰে খণ্ডত শক্তিশালী বিনিয়োগৰ দ্বাৰা এই বৃদ্ধি হৈছে । উদ্যোগ আৰু আভ্যন্তৰীণ বাণিজ্য বিভাগে প্ৰকাশ কৰা তথ্য অনুসৰি, ২০২৩-২৪ বিত্তীয় বৰ্ষৰ একে সময়তে এফ ডি আইৰ প্ৰবাহ আছিল ২০.৫ বিলিয়ন আমেৰিকান ডলাৰ ।
জুলাই-ছেপ্টেম্বৰত ৪৩% বৃদ্ধি-
২০২৪ৰ জুলাই-ছেপ্টেম্বৰ, এই তিনিমাহত, এফ ডি আই প্ৰবাহ ৪৩ শতাংশ বৃদ্ধি পাইছে আৰু ১৩.৬ বিলিয়ন আমেৰিকান ডলাৰত উপনীত হৈছে । পূৰ্বৰ বিত্তীয় বৰ্ষৰ একে সময়তে এই পৰিসংখ্যা আছিল ৯.৫২ বিলিয়ন আমেৰিকান ডলাৰ । এপ্ৰিল-জুনৰ তিনিমাহত এফ ডি আই ৪৭.৮ শতাংশ বৃদ্ধি পাইছে আৰু ১৬.১৭ বিলিয়ন আমেৰিকান ডলাৰত উপনীত হৈছে ।
মুঠ এফডিআই ২৮% বৃদ্ধি হৈছে-
মুঠ এফ ডি আইৰ কথা ক’লে, যাৰ ভিতৰত আছে ইকুইটি প্ৰবাহ, পুনৰ বিনিয়োগ কৰা উপাৰ্জন আৰু অন্যান্য মূলধন, প্ৰথমাধিকাৰত ২৮ শতাংশ বৃদ্ধি হৈ ৪২.১ বিলিয়ন আমেৰিকান ডলাৰ হৈছে । যোৱা বিত্তীয় বৰ্ষৰ একে সময়তে ই ৩৩.১২ বিলিয়ন আমেৰিকান ডলাৰ আছিল ।
ই দেশসমূহে ভাৰতত প্ৰচুৰ বিনিয়োগ কৰিছে-
ভাৰতত বিনিয়োগ কৰা প্ৰধান দেশসমূহৰ ভিতৰত আছে মৰিচাছ, ছিংগাপুৰ, আমেৰিকা, নেদাৰলেণ্ড আৰু ইউ এ ই আদি । মৰিচাছৰ পৰা বিনিয়োগ ৫.৩৪ বিলিয়ন মাৰ্কিন ডলাৰ আছিল, যিটো যোৱা বছৰ আছিল ২.৯৫ বিলিয়ন । একে সময়তে ছিংগাপুৰৰ পৰা ৭.৫৩ বিলিয়ন মাৰ্কিন ডলাৰৰ বিনিয়োগ আহিছিল, যিটো আগতে ৫.২২ বিলিয়ন আছিল । আনহাতে, আমেৰিকাৰ পৰা বিনিয়োগ আছিল ২.৫৭ বিলিয়ন মাৰ্কিন ডলাৰ, যিটো যোৱা বছৰ আছিল ২ বিলিয়ন । ইউ এ ইৰ পৰা বিনিয়োগৰ কথা ক’বলৈ গ’লে ইয়াৰ পৰাই সৰ্বাধিক বৃদ্ধি ৰেকৰ্ড কৰা হৈছে, যিটো ১.১ বিলিয়নৰ পৰা ৩.৪৭ বিলিয়ন মাৰ্কিন ডলাৰলৈ বৃদ্ধি পাইছে । অৱশ্যে জাপান আৰু ব্ৰিটেইনৰ পৰা বিনিয়োগ হ্ৰাস পোৱা দেখা গৈছে ।
এই খণ্ডসমূহত বিনিয়োগ-
খণ্ড ভিত্তিকভাৱে চালে সৰ্বাধিক বিনিয়োগ সেৱা, কম্পিউটাৰ চফ্টৱেৰ আৰু হাৰ্ডৱেৰ, টেলিকম, ফাৰ্মা আৰু অগতানুগতিক শক্তিৰ দৰে খণ্ডত হোৱা দেখা গৈছে । সেৱা খণ্ডৰ প্ৰত্যক্ষ বিদেশী বিনিয়োগ প্ৰথমাৰ্ধত ৫.৬৯ বিলিয়ন মাৰ্কিন ডলাৰত উপনীত হয়, যিটো যোৱা বছৰৰ একে সময়ছোৱাত ৩.৮৫ বিলিয়ন মাৰ্কিন ডলাৰ । আনহাতে, অগতানুগতিক শক্তি খণ্ডত ২ বিলিয়ন মাৰ্কিন ডলাৰ বিনিয়োগ কৰা হৈছিল ।
