বিৰাট কোহলীৰ ওপজা দিন
ভাৰতীয় ক্ৰিকেটৰ অন্যতম নিৰ্ভৰযোগ্য আৰু বিস্ফোৰক বেটছমেন বিৰাট কোহলীয়ে আজি ৩৭ বছৰ সম্পূৰ্ণ কৰিলে । ২০০৮ চনত আন্তঃৰাষ্ট্ৰীয় ক্ৰিকেটত অভিষেক ঘটোৱা দিল্লীৰ খেলুৱৈগৰাকীয়ে পৰৱৰ্তী ডেৰ দশকত এনে এক স্থানত উপনীত হ’ল য’ত উপস্থিত হোৱাটো সপোনতকৈ কোনোগুণে কম নহয় । নিজৰ প্ৰদৰ্শন, আবেগ, ফিটনেছৰ জৰিয়তে বিৰাটে ভাৰতীয় ক্ৰিকেটক এক নতুন দিশ দিছে ।
১৯ বছৰ অনুৰ্ধ বিশ্বকাপৰ সৈতে যাত্ৰাৰ শক্তিশালী আৰম্ভণি-
বিৰাট কোহলীয়ে ২০০৮ চনত ভাৰতক ১৯ বছৰ অনুৰ্ধ বিশ্বকাপ জয়ৰ দিশত আগুৱাই লৈ বিশ্বৰ দৃষ্টি আকৰ্ষণ কৰিছিল । তেতিয়া স্পষ্ট হৈ পৰিছিল যে এই যুৱ খেলুৱৈগৰাকীয়ে কিছু বিশেষ কৰিব । তেওঁ শচীন তেণ্ডুলকাৰ, ৰাহুল দ্ৰাবিড় আৰু সৌৰভ গাংগুলীৰ পৰা প্ৰেৰণা লৈ ভাৰতীয় ক্ৰিকেটৰ নতুন প্ৰজন্মৰ মুখ হিচাপে নিজকে প্ৰতিষ্ঠা কৰিছিল ।
টেষ্ট ক্ৰিকেটৰ তাৰকা-
বিৰাট কোহলীয়ে ভাৰতৰ হৈ ১২৩খন টেষ্ট মেচ খেলি ৪৬.৮৫ গড়ে, ৩০ টা শতক আৰু ৩১টা অৰ্ধশতকৰ সহায়ত ৯,২৩০ ৰান সংগ্ৰহ কৰিছে । তেওঁৰ সৰ্বোত্তম স্ক’ৰ আছিল ২৫৪ । ২০১৬ চনৰ পৰা ২০১৯ চনৰ ভিতৰত তেওঁৰ প্ৰদৰ্শন অসাধাৰণ আছিল । ৪৩খন টেষ্টত ১৬ টা শতক, গড় ৬৬.৭৯ আৰু ৭টা দ্বি শতক এই সময়ছোৱাত আহিছিল । অধিনায়ক হিচাপে বিৰাটে ভাৰতক নতুন উচ্চতালৈ লৈ যায়, য’ত ৬৮খন মেচত ৪০খনত বিজয় সাব্যস্ত কৰে দলে । এয়া যিকোনো ভাৰতীয় অধিনায়কৰ বাবে সৰ্বোত্তম অভিলেখ । SENA দেশত ৭খন টেষ্ট জয় আৰু ২০১৯ চনত অষ্ট্ৰেলিয়াত এক ঐতিহাসিক ছিৰিজ জয়কে ধৰি বিদেশতো তেওঁ জয়লাভ কৰে । তেওঁৰ অধিনায়কত্বৰত ভাৰতে ৪৩ মাহ ধৰি টেষ্ট ৰেংকিঙত প্ৰথম স্থান দখল কৰি আছিল ।
এদিনীয়াৰ চেজ মাষ্টাৰ বিৰাট-
বিৰাট কোহলীক সৰ্বকালৰ সৰ্বশ্ৰেষ্ঠ এদিনীয়া বেটছমেন বুলি গণ্য কৰা হয় । ৩০৫খন খেলত তেওঁ ৫৭.৭১ গড়ে, ৫১টা শতক আৰু ৭৫টা অৰ্ধশতকৰ সহায়ত ১৪,২৫৫ ৰান সংগ্ৰহ কৰিছে । ৰান চেজৰ সময়ত তেওঁৰ বেটিং ব্যতিক্ৰমী, ৰাণ চেজত গড়ে ৮৯.২৯ত ৬ হাজাৰৰো অধিক ৰান সংগ্ৰহ কৰিছে তেওঁ । ৮,০০০ আৰু ১৪,০০০ এদিনীয়া ৰান সংগ্ৰহ কৰা দ্ৰুততম খেলুৱৈ বিৰাট কোহলী । ২০২৩ চনৰ বিশ্বকাপত তেওঁ ৭৬৫ ৰান (গড়ে ৯৫+) কৰি ইতিহাস ৰচনা কৰি টুৰ্ণামেণ্টৰ শ্ৰেষ্ঠ খেলুৱৈ হিচাপে পৰিগণিত হয় । ২০১১ চনৰ বিশ্বকাপ আৰু ২০১৩ আৰু ২০২৫ চনৰ চেম্পিয়নছ ট্ৰফীত ভাৰতৰ জয়ৰ ক্ষেত্ৰত তেওঁ গুৰুত্বপূৰ্ণ ভূমিকা পালন কৰিছিল ।
নিৰ্ভৰযোগ্য টি-২০ ৰান-মেচিন-
টি-২০ আন্তঃৰাষ্ট্ৰীয় মেচত বিৰাটে ১২৫খন মেচত গড়ে ৪৮.৬৯ আৰু ১৩৭+ ষ্ট্ৰাইক ৰেটত ৪,১৮৮ ৰান সংগ্ৰহ কৰিছে, য’ত এটা শতক আৰু ৩৮টা অৰ্ধশতক আছে । লক্ষ্য অনুসৰণ কৰাৰ সময়ত তেওঁ ৪২খন মেচত গড়ে ৭৮ ৰান সংগ্ৰহ কৰিছে । তেওঁ দুবাৰকৈ টি-২০ বিশ্বকাপ প্লেয়াৰ অৱ দ্য টুৰ্ণামেণ্ট (২০১৪, ২০১৬) হিচাপে নিৰ্বাচিত হৈছে । ২০২৪ চনৰ টি-২০ বিশ্বকাপৰ ফাইনেলত তেওঁৰ মেচ বিজয়ী ইনিংছ ৭৬ ৰানে ভাৰতক খিতাপ দখল কৰাত সহায় কৰিছিল ।
আই চি চিৰ প্ৰতিযোগিতাত বিৰাটৰ আধিপত্য-
আই চি চিৰ প্ৰতিযোগিতাত ৯০খন মেচত ৬১.৩৩ গড়ে ৩৮০০ৰো অধিক ৰান সংগ্ৰহ কৰিছে বিৰাটে । তেওঁ তিনিবাৰকৈ প্লেয়াৰ অৱ দ্য টুৰ্ণামেণ্টৰ সন্মান লাভ কৰিছে । এই সন্মান অৰ্জন কৰা তেওঁ একমাত্ৰ ক্ৰিকেটাৰ । আই চি চিৰ নকআউট মেচত তেওঁৰ ১০০০+ ৰাণে ডাঙৰ প্ৰতিযোগিতাত তেওঁৰ নিৰ্ভৰযোগ্যতা প্ৰদৰ্শন কৰে ।
আই পি এলত কিং কোহলীৰ ৰাজকীয় চফৰ-
বিৰাট কোহলীয়ে আই পি এলৰ সমগ্ৰ কেৰিয়াৰত কেৱল ৰয়েল চেলেঞ্জাৰছ বেংগালুৰু (আৰ চি বি)ৰ হৈ খেলিছে । ২৬৭খন মেচত ৮৬৬১ ৰান সংগ্ৰহ কৰিছে তেওঁ । য’ত ৮টা শতক আৰু ৬৩টা অৰ্ধশতক অন্তৰ্ভূক্ত আছে । কোহলীয়ে ২০১৬ চনৰ আই পি এল ছিজনত ৯৭৩ ৰান সংগ্ৰহ কৰি ইতিহাস ৰচনা কৰে আৰু ২০২৪ চনত ৭৪১ ৰাণেৰে পুনৰ অৰেঞ্জ কেপ লাভ কৰে । এইবাৰ ১৮ বছৰৰ দীঘলীয়া অপেক্ষাৰ অন্তত তেওঁ আৰ চি বিক প্ৰথম খিতাপ দখল কৰিবলৈ নেতৃত্ব দিয়ে ।
উল্লেখ্য যে, ভাৰতীয় ক্ৰিকেটত ফিটনেছক নতুন উচ্চতালৈ উন্নীত কৰিছে বিৰাট কোহলীয়ে । তেওঁৰ নেতৃত্বত যো-য়ো পৰীক্ষাৰ দৰে মানদণ্ড ৰূপায়ণ কৰা হৈছিল । তেওঁ দলৰ ভিতৰত আত্মবিশ্বাস, আক্ৰমণাত্মকতা আৰু অনুশাসনৰ এক অনন্য ভাৰসাম্য গঢ়ি তুলিছে । বিৰাট কোহলী কেৱল ৰান মেচিন নহয়, এটা যুগ । তেওঁ প্ৰমাণ কৰিছে যে ক্ৰিকেট কেৱল খেল নহয়, আবেগ আৰু ফিটনেছৰো খেল । ৩৭ বছৰ বয়সতো বিৰাট ভাৰতীয় ক্ৰিকেটৰ বাবে এক গুৰুত্বপূৰ্ণ আদৰ্শ হৈয়ে আছে ।
লগতে পঢ়ক : শক্তিশালী প্ৰদৰ্শনৰ পিছতো ৰেংকিঙত অৱনমিত স্মৃতি মান্ধানা; জেমিমাহৰ দীঘল জাঁপ
